تاريخ دبلة الخطوبة اعرفه وانت بتشتري دبلة عروستك

تاريخ دبلة الخطوبة وبداية ظهورها واستخدامها في إعلان الجواز والارتباط كتير مننا ميعرفوهوش.

احنا كبرنا لاقينا الناس بتلبس دبل في اليمين وهم بيتخطبوا، وبينقلوها للشمال لما يتجوزوا وخلاص على كدة؛ فبنعمل زيهم وخلاص!

بس بما إننا هنلبس الدبلة دي لبقية عمرنا بعد كدة؛ فعلى الأقل لازم نعرف تاريخها وبداية ظهورها كانت إزاي؟

وايه المعاني اللي ممكن تكون بترمز ليها؟ وفي المقال ده احنا حاولنا نختصر لك الموضوع على مر تاريخه، وكمان نقدم لك شوية نصايح ممكن تساعدك.

وده عشان تقدر تختار الدبلة المناسبة اللي هتحطها في ايد عروستك، وتبقى رمز حبك ليها للأبد.

فتابع معانا المقال للنهاية.

تاريخ دبلة الخطوبة بيرجع في أصله لمصر:

من مصادفات القدر إننا نلاقي إن أصل الموضوع كله جاي من عندنا برضه.

المصريين القدماء هم اللي ابتكروا فكرة خواتم الجواز وتبادلها بين العريسين، وكانوا بيشوفوا انها رمز للأبدية اللي بيعتقدوا فيها.

وكانت دايرة الخاتم بتمثل بالنسبة لهم دايرة الحياة، والمعنى فيها إن الروح هتعيش بعد موت الجسم.

وكان الخاتم الشهير عندهم في الطقوس دي هو خاتم أوروبوروس، وكان بيتجسد عليه زخارف مشهورة بتعبر عن أسطورة الحياة والموت.

والزخارف دي عبارة عن تعبان بيبلع ديله، وده كان بيرمز لدورة الحياة واستمرارها.

وحتى فكرة لبس الخاتم في اصبع البنصر من الايد الشمال دي كانت فكرتهم برضه.

ففي اعتقاد المصريين القدماء كانوا بيشوفوا ان اصبع البنصر ده فيه وريد متصل بالقلب على طول، وسموه وريد الحب.

وعشان كدة كانوا بيلبسوا خواتم الجواز في الصباع ده دليل على استمرار الحب وأبديته بين الزوجين.

وعلى الرغم إن الاكتشافات العلمية والطبية الحديثة أثبتت إن دي مجرد اسطورة ومفيش وريد بالشكل ده.

إلا إنها تفضل دي فكرة في قمة الرومانسية في تاريخ دبلة الخطوبة استمرت لآلاف السنين.

انتقال فكرة خواتم الجواز من مصر للعالم:

وبعد سنين لما الإسكندر الأكبر ملك اليونان القديمة جه غزا مصر وضمها لمملكته، واختلطت الشعوب اليونانية والرومانية بالمصرية.

من بعدها اتنقلت فكرة تبادل خواتم الجواز من المصريين لليونانيين، واتبنوها في جوازاتهم، واعتبروها دليل على الحب والإخلاص.

ومن بعدهم بدأ الأزواج في روما القديمة يتبادلوا الخواتم الحديد والنحاس في طقوس جوازهم.

وفضلت دي الخواتم الرسمية في الجواز لحد القرن التاني الميلادي لما بدأت الخواتم الدهب تكون هي الأكتر انتشاراً.

تاريخ دبلة الخطوبة بين الحب والإخلاص وبين الرسمية والإشهار:

على الرغم إن في الوقت الحالي خواتم الجواز وتاريخها بيتبص له على إنه رمز للحب والإخلاص الأبدي إلا إنه مكنش كدة في الحقيقة على طول الخط.

فمع إن الخواتم كانت معروفة من زمن قديم أوي إلا إنها مكنتش منتشرة بين العامة بالشكل الكافي.

ولحد قرون قليلة فاتت كان الجواز مفيهوش توثيق وأوراق وكان بيتم بس بمجرد اتفاقيات لفظية.

وكان بيتم التعامل مع الجواز وكإنه تبادلات تجارية والتزامات عائلية مش طريقة تعبر بيها عن حبك والتزامك الأبدي بشريك حياتك.

وحتى بعد ما أعلنت الكنيسة الجواز على إنه سر مقدس في القرن الاتناشر الميلادي، وإنه لازم يتم من خلال حفل جواز رسمي في الكنيسة.

وكان من ضمن أساسياته ان العريس يلبس عروسته خاتم الجواز في ايدها، إلا إن ده في الحقيقة مغيرش كتير من نظرة الناس للجواز وتعاملهم معاه.

كانت النتيجة بس استخدام الخاتم ده كنوع من المجوهرات يثبت بيه العريس قيمته ومكانته المادية والتزامه القانوني بالجواز.

وفي تاريخ دبلة الخطوبة في الفترة دي كان بيتم النظر ليها على إنها مجرد شكل من أشكال الدفع المادي المطلوب من العريس بموجب العرف أو القانون.

وده بدل الدفع المادي النقدي واستخدام العملات، كجزء من الشبكة يعني زي ما بنعمل دلوقتي، وكانت الخواتم دي هي اللي بتدي الحق للعروسة إنها تقدر تتنقل لبيت جوزها وتعيش فيه.

وده كان معترف بيه ومقر في الإسلام برضه فجه في حديث لأحد الصحابة كان عايز يتجوز؛ فقال له الرسول عن اللي يقدمه لعروسته في سبيل الخطبة: “وَلَوْ خَاتَمًا مِنْ حَدِيدٍ”.

شكل خواتم الجواز على مر الزمان:

بدأ تاريخ دبلة الخطوبة في شكلها وأنواعها مختلف كتير عن اللي نعرفه دلوقتي؛ ففي الغالب كانت الست بس هي اللي بتلبس الخاتم.

غير دلوقتي ان العروسين كل واحد فيهم بيلبس التاني خاتم خاص بيه، وكان في الغالب خاتم عادي من غير أحجار كريمة أو أي نقوش مميزة.

لكن طبعاً الأمور كانت مختلفة إلى حد ما بين الطبقات العليا وطبقات الأمراء والحكام، وظهر الماس لأول مرة في خواتم الجواز في أواخر القرن الثامن عشر.

وفضلت خواتم الألماس قرن كامل محصورة على طبقات الحكام، ومبدأتش تدخل رسمي في خواتم الجواز لعامة الشعب إلا في أواخر القرن التاسع عشر.

وفي سنة 1886م قدم تشارلز لويس تيفاني مؤسس شركة تيفاني آند كو، خاتم الألماس اللي سماه باسمه “خاتم تيفاني” وبقى أشهر أنواع خواتم الألماس دلوقتي.

وبدأت فكرة لبس خواتم الجواز للرجالة خلال الحرب العالمية التانية لما الجنود قرروا يلبسوا دبل تفكرهم بزوجاتهم أو حبيباتهم اللي وعدوهم بالجواز وبيتمنوا يرجعوا لهم بعد الحرب.

وبعد الحرب ما خلصت انتشرت الفكرة من الجنود لبقية الرجالة المدنيين، وبقت طقس معمول بيه في كل حفلات الخطوبة والجواز.

وفي نهاية المقال بعد ما عرفت تاريخ دبلة الخطوبة على مر العصور نتمنى إن ده يكون مساعد ليك وانت بتختار الدبلة اللي هتقدمها لعروستك.

وتكون الدبلة دي هي طريقتك اللي تعبر ليها بيها عن حبك ومشاعرك والتزامك الأبدي معاها.

ونتمنى لكم بداية حياة جديدة سعيدة مع بعض مليانة حب وفرح وهنا وسعادة تدوم للأبد.