ديكور حائط مكرمية لتزيين غرف الاستقبال

تعرفوا إن ديكورات المكرمية من أقدم الديكورات التي زينت بيوت الأجداد خاصة في شمال إفريقيا وتركيا، ودلوقتي بقى في أشكال كتير من ديكور حائط مكرمية تختلف عن ديكورات السابق في ألوانها وشياكتها.

خاصة وإن ديكور المكرمية بقى يتنفذ منه أشكال وموديلات كثيرة جدًا، منها الاستايل البوهيمي، والمودرن، والكلاسيك.

ليه تختاري ديكور حائط مكرمية؟

خلينا الأول نعرف إيه هو المكرمية، هو في الأصل حرفة قديمة جدًا كانت بتستخدم لصناعة شباك الصيد بخامات مختلفة. ودلوقتي أصبحت من أحدث وأجمل ديكورات للحوائط خاصة مع الديكورات البوهيمي والمودرن.

والسبب في جمال ديكورات المكرمية إن الخيوط الصوفية أو القطنية بتمنح شعور بالدفء، وبتمنح المساحة شكل جمالي مميز جدًا ولافت للنظر. ومع تنسيق الديكور مع أثاث ومفروشات مناسبة هتحسي بتميز الديكور فعًلا.

ستايلات ديكور حائط مكرمية متنوعة

تقدري تنوعي في ديكور المكرمية حسب احتياجك، سواء كان التصميم الداخلي عندك كلاسيكي أو مودرن هتلاقي ستايلات تناسبك. ومن أشهر أشكال مكرمية الحوائط على سبيل المثال:

• الحبال المتدلية، شكلها بسيط للغاية، والتركيز فيها بيكون على الجزء العلوي فقط، بحيث يكون فيه شكل مميز وباقي الشكل عبارة عن حبال متدلية بشكل منظم، والاستايل داب يناسب التصاميم الكلاسيكية.
• التفاصيل المعقدة والأشكال الهندسية بتكون مثالية جدًا مع التصميم البوهيمي.
• المكرمية الملونة، سواء البسيطة أو المعقدة بتكون مناسبة أكثر للتصاميم المودرن.

إزاي تختاري ديكور حائط مكرمية مناسب؟

عند اختيار الديكور في تفاصيل بسيطة هتساعدك تختاري الديكور المناسب للمكان والمساحة اللي عندك، وعشان الاختيار يطلع مناسب ركزي في التفاصيل دي:

• لو الحائط صغير هتحتاجي التصميم يكون بسيط جدًا وحجمه صغير ولكن شكله مميز. بحيث يكون لافت للنظر وفي نفس الوقت لا يسبب ازدحام بصري.
• لو الحائط كبير اختاري مكرمية بحجم كبير وتفاصيلها بسيطة لو الأثاث حواليها كثير. لكن لو الأثاث قليل جنبها يبقى هتحتاجي تفاصيل المكرمية تكون معقدة وكثيرة ولافتة للنظر.
• ركزي على الألوان اللي تتماشى مع التصميم الداخلي السائد في المكان، سواء باختيار ألوان فاتحة أو سادة.
• لو الحائط فارغ تمامًا زي مدخل للبيت أو حائط بجانب التلفزيون تقدري تخلي المكرمية وظيفية، زي رف للكتب أو الزرع.

تنسيق المكرمية مع الديكورات المحيطة

لو محتاجة توصلي لأفضل شكل لديكور البيت فالأفضل تنسقي المكرمية مع ديكورات ملائمة ليها، ممكن على سبيل المثال تضيفي:

• تعليق نباتات طبيعية صغيرة بجانب المكرمية، أو تصميم مكرمية لتعليق النباتات يكون لها رف عريض.
• إضافة إضاءة خافتة، ممكن باستخدام فوانيس صغيرة، أو شموع، أو فروع ليد.
• إضافة مكتبة صغيرة بجانب المكرمية، سواء مخصصة لكتب أو ديكورات بسيطة.

في النهاية أي ديكورات من النباتات أو الأرفف أو الإضاءة الخافتة هتكون مكملة للديكور، وهتزيد من جمال التصميم الداخلي.

تقدري تشتري ديكور حائط مكرمية من صفحات أونلاين أو جروبات الهاند ميد، هتلاقي خيارات كتير وبأسعار مناسبة.

اقرأ أيضًا: أفكار تصميم جلسة بلكونة مميزة ومريحة وعملية.

اقرأ أيضًا: ديكورات شقق عرسان مودرن.