راحة ضيوف الفرح

راحة ضيوف الفرح مسئوليتك فإزاي تحققها؟

يمكن تشوف إنك ببساطة تقدر تقدم دعوة لضيوفك عشان يحضروا فرحك، وتتوقع إنهم يكونوا موجودين في الميعاد وخلاص على كدة، لكن هل فكرت في راحة ضيوف الفرح خلال الفترة دي؟

إذا كنت عايز ضيوفك وحبايبك يستمتعوا بوقت جميل في فرحك؛ فلازم يكون عندك استعداد إنك تبذل جهد شوية.

وده عشان تضمن إنهم يستمتعوا ويفضل فرحك ذكرى جميلة عندهم لوقت طويل.

وعشان كدة احنا هنا في المقال ده هنقدم لك أفكار مختلفة.

راحة ضيوف الفرح
راحة ضيوف الفرح مسئوليتك

والأفكار دي تقدر تستعين بيها وتحطها في اعتبارك وانت بتجهز لفرحك.

وقد تكون بعض الأفكار خارج نطاق ميزانيتك اللي حددتها من الأول.

ففي النقطة دي نحب نفكرك إنك تقدر توازن بين إمكانيتك في دفع فلوس زيادة عن الميزانية شوية في سبيل الوصول لراحة ضيوفك.

أو إنك تختار تنفذ بعض الأفكار بس اللي في حدود ميزانيتك، وتتغاضى عن الباقي، أو تكيفهم بطرق مختلفة تناسب ميزانيتك.

فتابع معانا المقال.

Comfort of wedding guests

صمم موقع إلكتروني أو إيفنت على الفيس لفرحك:

تقدر تعمل موقع إلكتروني خاص بيك يبقى فيه كل تفاصيل الفرح وتبعته لضيوفك.

أو تعمل إيفنت على الفيس بوك وتضيفهم كلهم عليه، والموضوع ده مش مجرد حاجة لطيفة للتباهي ومسايرة الموضة.

لا فعلاً هو أمر مهم، ومهم تعمله من بدري عشان كل الضيوف يقدروا يشوفوه ويتابعوه.

أهمية الموضوع ده في راحة ضيوف الفرح إنه بيوفر لهم كل المعلومات اللي هيحتاجوا يعرفوها ويظبطوا وقتهم ومواعيدهم عليها من بدري.

Comfort of wedding guests

حط كل التفاصيل المهمة زي التاريخ والوقت والمكان وتفاصيل السفر لو ضيوفك هيحتاجوا يسافروا من مكانهم عشان يحضروا فرحك.

وبكدة ده هيريحك ويريحهم في سهولة الوصول لكل المعلومات المهمة.

وبالتالي محدش هيضطر يزعجك بمكالمات طول الوقت عشان يسألوك عن التفاصيل.

وتقدر كمان تساعدهم من خلال الموقع في إنك تعرفهم طبيعة اللبس اللي هيحتاجوا يلبسوه في فرحك.

سواء عشان يتوافقوا مع موضوع الفرح اللي انت مختاره، أو بس في سبيل راحة ضيوف الفرح عشان اللبس يتلاءم مع الجو والمكان.

راحة ضيوف الفرح
وفر كل المعلومات المهمة في سبيل راحة ضيوف الفرح

زي إنك لو عامل الفرح أوبن اير في الشتا واحتمال ان الجو يكون برد؛ فيحتاجوا يتقلوا.

أو يعملوا حسابهم إن المكان عبارة عن حديقة مثلاً فميلبسوش جزم بكعب ممكن تغرز في الطين وميكونوش واخدين حريتهم في الحركة.

Comfort of wedding guests

تحديد الهدايا اللي تحب تتلاقاها:

كتير هيجيلك سؤال من المقربين منك من أهلك وصحابك إنك تحب يجيبوا لك هدية ايه بمناسبة جوازك؟

وطبعاً الإجابات العشوائية على السؤال ده أو أي حاجة واللي تجبوه، دي مش إجابات عملية، كدة كدة هم هيجيبوا هدية.

وانتم في حاجات كتير هتكونوا محتاجينها في بداية حياتكم وتأسيسكم لعش الزوجية؛ فكون محدد وانت بترد على الأسئلة دي.

Comfort of wedding guests

بدل ما يجيبوا هدايا في الآخر تضطر تركنها ومتستخدمهاش لإنكم اشترتوا زيها فعلاً أو هي أصلاً مش مفيدة ليكم.

فتقدر تعمل على راحة ضيوف الفرح بإنك تكون محدد في طبيعة الهدايا اللي تحب تتلاقاها.

وممكن تقعد مع عروستك وتحطوا قايمة بنوعية الهدايا دي.

وتقدر كمان تضيفها في جزء من الموقع اللي عملته لفرحك أو على الإيفنت، وبكدة ترفع الحرج من عليك وعلى الناس في السؤال والإجابة.

واللي عايز يجيب هدية هيختار يجيب حاجة من القايمة اللي انت منزلها، وبكدة تبقى ريحت نفسك وريحتهم.

راحة ضيوف الفرح
أهمية راحة ضيوف الفرح في السفر والوصول للقاعة

راحة ضيوف الفرح في السفر:

لو ضيوفك هيكونوا مضطرين يسافروا من مكانهم لمكان تاني عشان يحضروا فرحك.

فلازم تحط في اعتبارك إنهم يكونوا مرتاحين في النقطة دي، حاول توفر لهم مكان يقدروا ينزلوا يباتوا فيه أو يستريحوا.

ولو مكنش عندك مكان خاص بيك؛ فتقدر توفر لهم حجز في غرف فندقية سواء في مكان الفرح نفسه أو قريب من الفرح، ولو ميزانيتك مش هتسمح إنك تتكفل بالحجز ليهم؛ فعلى الأقل عرفهم ايه هي أقرب الأماكن اللي يقدروا يحجزوا فيها وطريقة الحجز.

Comfort of wedding guests

تقدر توفر كل المعلومات دي على الموقع اللي اتكلمنا عنه في الأول أو الإيفنت، ده هيساعد كتير في راحة ضيوف الفرح.

كده انت هتبقى وفرت عليهم على الأقل الوقت والجهد اللي كانوا هيبذلوه وهم بيدوروا على الفنادق ويفاضلوا ما بينها ويختاروا الأنسب.

كمان لو تقدر توفر وسائل نقل مخصصة تساعد الضيوف في الوصول للمكان بسهولة من غير ما يتوهوا أو يشيلوا هم إنهم يلاقوا مكان يركنوا فيه.

أو لو معندهمش عربية خاصة بيهم وهيضطروا يركبوا مواصلات؛ فكدة هتبقى وفرت عليهم الحيرة والتعب ده، وهتخليهم يوصلوا فرحك وهم مبسوطين ومرتاحين.

راحة ضيوف الفرح

أما بالنسبة للناس اللي هتوصل لمكان فرحك من السفر على طول؛ فهيكون شيء لطيف إنهم يوصلوا يلاقوا في استقبالهم سلة ترحيب بسيطة فيها إزازة مية وسناكس لطيف مع رسالة شكر على تلبيتهم الدعوة وهدية ذكرى بسيطة للفرح.

وفي النهاية نتمنى إننا نكون قدرنا نقدم لك نصايح مفيدة تقدر تستغلها في راحة ضيوف الفرح، ويكون فرحك ذكرى متتنسيش بالنسبة لهم.

ونتمنى لك بداية حياة زوجية سعيدة تدوم للأبد في حب وهنا، وألف مبروك مقدماً.

هل محتوى المقال دة كان مفيد بالنسبة لك؟
نعم، مفيد!لا!
عجبك المقال؟ شارك مع اللي يهمك!
سارة الليثي
سارة الليثي

كاتبة محتوى وقاصة وصحفية
باحثة ماجستير في الصحافة والإعلام بجامعة أسيوط
الأعمال المنشورة:
"خضار الروح" مجموعة قصصية صادرة عن الملتقى للنشر والتوزيع في يناير 2023.

المقالات: 60

أكتب رأيك في المقال!

لن يتم نشر عنوان بريدك الإلكتروني. بيانات ضرورية عليها علامة *

شغالين على حاجة جديدة
وهننطلق قريب اوي … استنونا