فرح في ديسمبر… إزاي تستعدوا له؟

فرح في ديسمبر يعني خلاص على الأبواب، ومع طقس بارد وموسم احتفالات يا ترى خططتم لفرحكم في الوقت ده كويس؟

طب ايه هي الحاجات اللي لازم تاخدوها في اعتباركم وانتم بتخططوا لفرحكم في الوقت ده؟ ايه مميزات وعيوب إن الفرح يكون في آخر شهور السنة؟

ديسمبر شهر المناظر الرائعة وبيتمتع بسحر خاص مالوش وجود في أي شهر تاني من شهور السنة.

وعشان كدة كتير من الأفراح بتكون في الشهر ده.

لكن برضه حفل زفاف في الشتاء والأجواء الباردة دي بيكون ليه تحدياته الخاصة.

وعشان كدة احنا هنا في المقال ده هنحاول نعرفكم مميزات وعيوب الموضوع.

وده عشان تقدروا توازنوا بين المميزات والعيوب وتشوفوا أنهي كفة هي الأرجح بالنسبة لكم.

ولو فضلتم مقتنعين بإنكم عايزين فرحكم يكون في شهر ديسمبر برضه.

فهنقدم لكم أهم النصايح والخطوات اللي لازم تحطوها في اعتباركم وانتم بتستعدوا للفرح.

فتابعوا معانا المقال.

مزايا إنكم تعملوا فرح في ديسمبر:

طبعاً أهم مزايا الموضوع إن ده في النهاية شهر موسم أعياد الميلاد وراس السنة والكريسماس.

الدنيا كلها بتحتفل معاكم مش انتم بس، وكمان تقدروا تمزجوا أضواء وديكورات احتفالات نهاية السنة في ديكورات فرحكم.

خصوصاً لو ميعاد فرحكم هيكون في آخر الشهر، كمان ده هيخليكم تقدروا تحتفلوا بنهاية العام وبداية سنة جديدة مع بعض ومع ضيوفكم.

وهيفضل فرحكم ذكرى جميلة عندكم وعند كل ضيوفكم بتتجدد كل سنة.

أما عن عيوب الموضوع:

طبعاً أهم عيوب فرح في ديسمبر إنه هيكون في عز البرد، خصوصاً لو ناويين تعملوا فرح في الهواء الطلق.

فلازم تحطوا في اعتباركم إنكم توفروا وسايل تدفئة لضيوفكم وإن الجو في المكان ميكونش برد تلج.

كمان لازم تحطوا في اعتباركم احتمالية انشغال كتير من ضيوفكم بمواعيد مسبقة.

زي إنهم يكونوا محضرين للسفر في الأجازات أو مرتبطين بحفلات تانية؛ فلازم تأكدوا عليهم ميعاد فرحكم من بدري.

ومن الحاجات اللي لازم تاخدوا بالكم منها هي اختلاف ساعات الليل والنهار في الشتاء النهار بيكون قصير.

فلو ناوين تعملوا فرح بالنهار لازم تتأكدوا من المواعيد كويس.

وتخططوا تفاصيل اليوم بناء على مواعيد غروب الشمس عشان تقدروا تستمتعوا بفرحكم لأطول وقت.

اعتبارات أزياء فرح في ديسمبر:

ما دام هتعملوا فرحكم في الشتا يبقى لازم تاخدوا بالكم كويس من اللي هتلبسوه.

وتحاولوا تنسقوا الموضوع بحيث يكون لبسكم شيك وأنيق وفي نفس الوقت يدفيكم.

بالنسبة للعريس فممكن يختار بدلته من الصوف الدافي.

ويكون ليها بليزر قطيفة مع كرافات أو فيونكة رقبة حرير هيكون مظهره ولا أروع.

أما بالنسبة لعروستنا الحلوة فتقدر تدفي روحها بانها تختار فستان زفاف ملكي بأكمام.

فكونه هيكون مقفل من كل حتة ده هيديكي الدفا اللي محتاجاه.

وكمان تقدري تضيفي عليه شال فرو أبيض لو حسيتي إن الجو أبرد من إنك تقدري تستحمليه.

أما بالنسبة للجزم فسواء للعريس أو العروسة تقدروا تختاروا جزم مناسبة لزيكم اللي اختارتوه في فرح في ديسمبر.

لكن من الأنسب إنها تكون من جلد الغزال أو القطيفة عشان تدفي رجلكم طول الفرح.

أفكار تقدروا تستخدموها في ديكورات وضيافة الفرح:

زي ما قولنا الفرح كدة هيكون في وقت الاحتفالات بأعياد الميلاد والكريسماس.

فعشان كدة تقدروا تستخدموا في ديكورات الفرح الشرايط الفضية أو الزرقاء الجليدية.

وتقدروا كمان تنشروا كرات قطن في المكان وعلى الطاولات بشكل يشبه التلج.

وممكن تستخدموها بدل الورد، وتكون هي اللي بتستقبلكم في المكان وقت دخولكم قاعة الفرح.

الديكورات دي هتعبر عن برودة الشتاء وأجواء الاحتفالات فيه، وكمان تقدروا تستخدموا ديكورات أشجار الكريسماس وبابا نويل في الفرح.

وبالنسبة للضيافة فبدل ما تقدموا العصاير والحاجة الساقعة في الجو البارد ده.

هيكون من الأفضل إنكم تقدموا مشروبات سخنة مناسبة مع أجواء فرح في ديسمبر.

وفي نهاية المقال نتمنى إننا نكون قدمنا لكم نصايح وأفكار مفيدة وممتعة تقدروا تستخدموها في فرح في ديسمبر لو كان ده خياركم.

ونتمنى لكم حياة مليانة بالأفراح وبداية حياة جديدة سعيدة مع بعض تكون كلها حب وود وهنا.