بدل وصيفات العروسة خيار أفضل من الفستان… أفكار مختلفة تختاروا منها

بدل وصيفات العروسة دي أجدد فكرة في موضات الأفراح دلوقتي لو عايزة تستثمريها في فرحك وتبقي من أول الناس اللي طبقتها.

المنتشر دايماً إن الوصيفات اللي بيكونوا من الأصدقاء المقربين للعروسة أو أخواتها أو قرايبها بيلبسوا كلهم فستان واحد بنفس الشكل واللون.

لكن في الحقيقة إن الفستان ده ممكن ميكونش عملي أبداً وميقدروش يستغلوه بعد كدة في أي مناسبة تانية ويتركن.

في حين إن فكرة البدل والجمبسوت هي فكرة عملية هيقدروا يستغلوها في أي مناسبة تانية أو حتى في خروجات رسمية.

وبكدة مش هيحسوا بالحسرة على فستان عمره ما هيتلبس تاني.

وعشان كدة البدل دي بقى ليها شعبية كبيرة في الأفراح برة.

بس كالعادة كل حاجة بتاخد وقت على ما توصل عندنا وتحقق نفس الشعبية؛ فكوني انت نقطة البداية واختاريها لصحابك.

وعشان نساعدك تتميزي في اختياراتك؛ فاحنا هنا في المقال ده هنجمع لك أفضل أفكار البدل اللي ممكن تناسب أي نوع من أنواع أو أفكار الأفراح.

وكل اللي عليكي تعمليه هو إنك تختاري ستايل البدلة اللي هتناسب ذوقك وذوق صحابك، وموضوع وأجواء فرحك.

فتابعي معانا المقال.

جمبسوت من الشيفون:

عشان تكون بدل وصيفات العروسة مناسبة لأجواء الفرح مهم تختاروها من قماش مطابق لأنواع قماش فساتين السواريه.

وأكيد مفيش أفضل من قماش الشيفون يكون مناسب لطبيعة الأفراح وأجوائها.

وكمان ده هيساعد صحباتك إنهم يظهروا أناقتهم فيها وقوامهم الممشوق.

الميزة في النوع ده من البدل إنها بتكون متوافرة بكل الألوان تقريباً.

فهتقدروا تختاروا براحتكم اللون اللي يناسب ذوقكم ويناسب موضوع أو فكرة الفرح اللي اختارتوها.

بدل وصيفات العروسة بسيقان واسعة:

ودي هتكون مناسبة في حرية الحركة والتنقل طول الفرح؛ لإنها مش هتحسسهم بالتقييد والتكتيف.

كمان هتكون مناسبة لمحبي الفساتين؛ لإنها هتديهم نفس الإحساس بالوسع والانطلاق، ومش هتحسسهم إنهم لابسين بنطلونات مش فساتين.

وكمان هتكون مناسبة لو واحدة من وصيفاتك حامل فهتداري بطنها في وسعها ومحدش هيلاحظها.

جمبسوت حرير:

أما لو كنتم من محبي الفخامة والشياكة العالية؛ فأكيد مفيش أشيك ولا أفخم من الحرير، تقدروا تختاروا جمبسوت حرير في بدل وصيفات العروسة.

وتقدروا تختاروها بفتحة صدر واسعة وحمالات رفيعة تبرز جمالكم وأناقتكم، أما لو محجبات فممكن تلبسوا فوقها جاكيت أو برولو شيك يزود حلاوتها.

بدل وصيفات العروسة من الترتر:

ولسة الترتر بيتربع على عرش السواريه دايماً، وإذا كنتم هتتخلوا عن خيار الفستان؛ فده مش معناه إنكم تتخلوا عن تميز لبس الأفراح.

تقدروا تختاروا البدل تكون بالترتر سواء كان جمبسوت أو البدل الكاملة، وخصوصاً الترتر الدهبي الوردي.

هيدي مظهر ملكي ولا أروع لصحابك وهم واقفين جنبك وانت بفستان الفرح، هتبقوا فعلاً زي ملكة ووصيفاتها حواليها.

جمبسوت دانتيل:

كل القماش المستخدم في الفساتين بقى بيستخدم دلوقتي سواء في بدل وصيفات العروسة أو الجمبسوت.

عشان كدة تقدروا تختاروا براحتكم وانتم مطمنين إن مهما كان ذوقكم هتلاقوه؛ فلو بتحبوا قماش الدانتيل الرقيق تقدروا بكل سهولة تختاروا جمبسوت من الدانتيل.

ودي هتكون مناسبة جداً لو الفرح نهاري أوبن اير وعلى الشط مثلاً أو في سفينة في النيل أو البحر.

وأكتر ألوان هتكون مناسبة في الحالة دي هي ألوان الأصفر والبرتقالي والأحمر والفيروزي أو النيلي.

وقماش الدانتيل المفرغ تقدروا تستثمروه في انكم تختاروه بالتصميمات اللي تعجبكم وتتناسب مع أجواء الفرح.

جمبسوت قطيفة:

ولو الفرح شتوي وهيكون في مكان احتمالية ان يكون جوه بارد عالية؛ فأكيد هتكونوا محتاجين لبس يديكم دفا تقدروا بيه تتحركوا براحتكم في المكان.

وعشان كدة هيكون من المناسب انكم تختاروا جمبسوت من قماش القطيفة اللي زي ما بيدفي إلا إنه بيكون فخم في مظهره وشياكته.

بدل وصيفات العروسة المنقوشة:

لو الفرح هيكون نهاري وأوبن اير وطابعه كاجوال؛ فده معناه إنكم مش ملتزمين بالمظهر الرسمي في اللبس.

فبالتالي مش هتحتاجوا لازم فساتين أو جمبسوت سواريه، وإنما ممكن تبدلوها ببدل شيك منقوشة.

الميزة في البدل دي كمان إنها هتبقى طقم جاهز دايماً في دولاب كل واحدة فيهم تقدر تلبسها في أي وقت، وتفتكر يوم فرحك بابتسامة حلوة للذكرى.

وتقدروا تختاروا النوع حسب النقشات اللي هتديكم الانطباع اللي انتم عايزينه في الفرح.

وفي نهاية المقال نتمنى انكم تكونوا لاقيتم معانا بدل وصيفات العروسة اللي تناسب ذوقكم وتناسب موضوع الفرح اللي اخترتوه.

ونتمنى لكم فرح سعيد وإن صداقتكم تدوم للأبد، وتكونوا سند لبعض دايماً في الأفراح.