ديكورات مطبخ جديدة لتنظيمه وترتيبه

أكثر حاجة بتركز فيها البنات في قائمة تجهيزات العروسة هي ديكورات مطبخ جديدة وديكورات للشقة كلها بشكل عام. وكأن الديكورات بالنسبالها أهم من الأثاث نفسه، ودا بالمناسبة مش تفاهة منها، وإنما دا احتياج حقيقي بالنسبالها.

يعني احتياج حقيقي إنها تحس إن كل مكان في الشقة فيه قطعة صغيرة بتبسطها أو أول ما تشوفها تبتسم. أي بنت محتاجة الإحساس دا في بيتها الجديد، محتاجة تحس إن في كل مكان لمسة صغيرة تسعدها.

عشان كدا هنقولك على شوية ديكورات مطبخ جديدة تقدري تعمليها بحيث تنظم شكل المطبخ، وفي نفس الوقت يبقى فيه لمسة جميلة تدخل الفرحة في قلبك.

ملاحظات ضرورية لاختيار ديكورات مطبخ جديدة

في ملاحظات أساسية تاخدي بالك منها في تصميم المطبخ نفسه، سواء تصميم مطبخ صغير أو كبير.

اختيار الألوان المناسبة

حجم المطبخ بيتحكم بشكل كبير في اختيار لونه، سواء كان كبير أو صغير. يعني لو المطبخ كبير معاكي حرية في اختيار أي لون تحبيه وطبعًا فرصة لو بتحبي الألوان الغامة. أما لو المطبخ صغير فاختيارك محصور في الألوان الفاتحة جدًا عشان تديكي شعور باتساع المساحة.

الاهتمام باستغلال المساحة

ركزي جدًا على استغلال المساحة، سواء كبيرة أو صغيرة حسن الاستغلال هيساعدك الشكل النهائي يبقى مميز. وطبعًا نقصد بالاستغلال تحديد تصميم مناسب لأركان المطبخ، أو سقف منحني، أو عمود بارز وهكذا.

التركيز على التفاصيل

في حاجات كتير من ديكورات مطبخ جديدة ممكن تضيفيها في تصميم المطبخ نفسه. زي الاكسسوارات من مقابض الدواليب أو شرايط ليد، أو سقف مدمج في دولاب المطبخ فيه لمبات ليد.

اختيار خامة مناسبة

على حسب ذوقك في المطابخ اختاري خامة تحقق احتياجاتك. خامة تتحمل الاستخدام اليومي، وتقدري تنظفيها بسهولة، وفي نفس الوقت تديكي الفينش النهائي اللي حباه.

أفكار ديكورات تنظيمية للمطبخ

تقدري تضيفي ديكورات مطبخ جديدة في تصميم المطبخ نفسه، بحيث تكون قطعة واحدة متكاملة، ودا مناسب جدًا للمساحات الضيقة:

• الأرفف المدمجة: عبارة عن أرفف داخل دواليب المطبخ، ممكن تكون طولية أو عرضية. الهدف منها تزيين المطبخ ببعض الكؤوس والأكواب المزخرفة أو أطباق مزخرفة.
• وحدات تخزين مفتوحة: عبارة عن وحدات تخزين من رف أو رفين داخل الدواليب ولكن من غير أبواب. فهي نفس المساحة العادية تقدري تنظمي فيها طاقم التقديم أومجموعة كاملة من الكؤوس.
• الأرفف الخارجية: ممكن تنظمي عليها التوابل أو بوت زرع أعشاب عشان تكون قريبة منك وقت تحضير الأكل.
• أرفف فوق الحوض: هتكون فيها بعض الأعشاب برضو عشان تديكي شعور لطيف وإنتي بتغسلي الأطباق. كمان هتخلي ريحة المكان مميزة وشكلها طبعًا أفضل من قطع ديكورات كتير.

أماكن تصنيع ديكورات مطبخ جديدة

• لو مطبخك خلاص جاهز ومحتاجة تضيفي عليه جزء جديد من يحسن من شكله، أو محتاجه تنفيذ قطعة ديكور محددة تقدري تشوفي المتاجر المتخصصة في ديكورات المطابخ، هتلاقي أماكن في كل مكان في مصر، ومنها ورش بتصنع وتبيع أون لاين دي هتكون سهلة.

• ممكن كمان تزوري معارض الأثاث والمطابخ، ودي معارض بتكون في نطاق معين في كل محافظة. هتلاقي فيها أشكال وتصاميم كتيرة، وسهل جدًا تلاقي احتياجك أو على الأقل تختاري شكل جديد يناسب ذوقك.

• وطبعًا خدي لفة حلوة في أيكيا سواء أون لاين أو في الفروع. هتلاقي اختيارات كتيرة جدًا وعملية جدًا. هتلاقي ديكورات مطبخ جديدة من أرفف ووحدات تخزين أو وحدات إضاءة خاصة بالمطبخ.

إزاي تشتري ديكورات مطبخ جديدة أون لاين؟

خطوة بسيطة وسهلة هتوفر عليكي الوقت والجهد لكن ضروري تاخدي بالك من أمور مهمة عشان اللي هتشتريه يكون مناسب لتوقعاتك:

• اشتري من متجر موثوق: هتلاقي كتير إعلانات بتظهر قدامك عن متاجر ديكورات مطابخ وغيره لكن مش كل المتاجر هتكون موثوقة. وعشان تتأكدي من المتجر شوفي نماذج الأعمال، مش بس تقييمات العملاء، الأهم تشوفي مراحل التنفيذ والنتيجة النهائية.
• قيسي المساحة بالظبط: المساحة اللي هتستخدمي فيها الديكور لازم تقيسيها بالظبط عشان ميحصلش مشكلة عند التركيب. خاصة وإنك مش هتقدري ترجعي القطعة تاني وتعيدي تظبيطها.
• استفيدي من التخفيضات: الميزة في المتاجر الإلكترونية إن العروض والتخفيضات هتكون واضحة وظاهرة قدامك. وبالطريقة دي تقدري تختاري قطع مناسبة ليكي وفي نفس الوقت عليها عرض أو تخفيض.

ديكورات مطبخ جديدة لا غنى عنها

في تفاصيل بسيطة بتفرق في مظهر المطبخ، وبتحوله من مجرد مساحة مخصصة لتحضير الأكل لمساحة لطيفة تقدري تقضي فيها وقت طويل بدون زهق:

• إضاءة: LED  ليها مفعول السحر، بتخلي المطبخ وكأنه مكان رومانسي من مسلسل قديم.
• مقابض لامعة: المقابض تقدري تلعبي في أشكالها وألوانها، ولكن لو ليها لامعة مع تصميم لطيف هيكون انعكاسها مع الإضاءة مذهل.
• قطع تخزين مدمجة: تقدري تعتمدي عليها بشكل مكثف، سواء تخزين توابل أو بقوليات أو حتى رفايع المطبخ. القطع دي بتوفر في المساحة وبتنظم كل الأدوات في المطبخ.

وعشان متحتاريش في اختيار ديكورات مطبخ جديدة تتناسب مع تصميم مطبخك شوفي صور كتير في مواقع كتير وخاصة مواقع تصميم المطابخ. هتاخدي فكرة عن احتياجك وتشوفيه متطبق بشكل عملي.

أتمنى أكون قدمت معلومات تفيدك وتساعدك على تصميم مطبخ مميز تقضي فيه وقتك بسعادة.

اقرأ أيضًا: أفكار هدايا رومانسية للعريس تحسسه إنك مهتمة بيه.

اقرأ أيضًا: قائمة تجهيزات العروسة قبل الفرح.