رفايع في جهاز العروسة لا غنى عنها

من بعد الخطوبة على طول وممكن من قبلها بتبدأ العروسة تجهز قائمة بالطلبات. لكن بتركز في الحاجات الكبيرة وغالبًا بتنسى معظم الرفايع، عشان كدا هنقولك على رفايع في جهاز العروسة لا غنى عنها وضرورية جدًا وممكن تنسيها وإنتي بتشتري احتياجاتك.

تشتري منين الرفايع اللي محتاجاها؟

مبدأيًا كدا كل رفايع في جهاز العروسة ممكن تشتريها من أي حتة. فعليًا هتلاقي محلات في كل مكان بتبيع رفايع سواء رفايع حمام أو مطبخ أو غرفة النوم أو غيره. ولكن لو عايزة تشتري معظم الرفايع من مكان واحد وفي نفس الوقت هنقولك على أشهر أماكن بيع جهاز العروسة واللي هتلاقي فيها كل الرفايع:

منطقة العتبة والموسكي

ودي هتقسميها لمنطقة رفايع غرفة النوم وهتلاقي كل احتياجاتك في العتبة والموسكي الجزء الملاصق للعتبة. وبعد الكوبري هتلاقي الجزء التاني من الموسكي واللي فيه حمام التلات ودرب سعادة. ودي الأماكن اللي فيها رفايع مطبخ أو حمام أو اكسسوارات للشقة.

فروع المرشدي ورنين

ودي أماكن هتختصر عليكي لف في الشوارع لو مش حابة تروحي أماكن زحمة. وهتلاقي في فروعهم كل احتياجاتك تقريبًا من الرفايع وبأسعار حلوة جدًا ومش هتحتاجي تفاصلي. وهتلاقي هناك رفايع في جهاز العروسة انتي نفسك مشوفتيهاش قبل كدا، لإنهم بيهتموا بالرفايع جدًا.

منطقة النزهة

ودي في مصر الجديدة وتقريبًا تشبه الموسكي والعتبة، هتلاقي فيها كل احتياجاتك. وفيها محلات كبيرة ممكن تتدخليها وتخرجي بكل الرفايع اللي ممكن تفكري فيها.

رفايع في جهاز العروسة لغرفة النوم

دلوقتي لو مش عارفة انتي محتاجة إيه في الرفايع هنحاول نساعدك ونقولك كل مكان في الشقة محتاج ايه. ونبدأ بغرفة النوم ومن أهم رفايع بتحتاجيها على سبيل المثال:

• منظمات الأدراج: ودي ركزي في جميع أحجامها، واشتري منها اللي بيقسم الدرج. أو بيقسم الرف لأكثر من جزء، دا هيساعدك تنظمي لبسك وخاصة القطع الصغيرة.
• المنظمات الأكريليك: دي بقى هتنظم حياتك نفسها، لكل مجموعة حاجات هتحتاجي منظم. يعني مثلًا منظم للمكياج، ومنظم لأدوات العناية الشخصية. كمان منظم للكريمات واللوشن، ومنظم للاكسسوارات، حاولي تشتري منظمات أحجامها مناسبة لاحتياجك.
• علاقات الملابس: مش هتكتفي بس بالشماعات البلاستيك العادية، لإنك عروسة وهتحتاجي شماعات شكلها ألطف. هتلاقي شماعات خشب، وشماعات شغل يدوي متزينة بشرايط.
• مفارش الدولاب: لزوم التنظيم والشياكة، اختاري خامة لطيفة ومفيهاش ألوان عشان متأثرش على اللبس.

رفايع في جهاز العروسة للمطبخ

أكتر حاجة رفايعها لا تنتهي إلا يوم الفرح هو المطبخ. حاجة كدا بتبلع الرفايع، هتلاقي الدرج محتاج رفايع والأرفف عايزة رفايع. وعشان رفايع المطبخ كتير هنحاول نقولك على أهمها:

• رفايع الدرج: ودي تشمل السكاكين الصغيرة المشرشرة. وقشارة البطاطس، وقطاعة البيتزا، وسنانة السكاكين، كمان الاسبيتيولا وفُرش الزيت.
• رفايع الأرفف: التركيز فيها بيكون على المفارش، يعني تشتري مفارش بمقاسات مناسبة. وقفل حماية لزوم الأطفال فيما بعد. هتحتاجي منظمات غطيان الحلل عشان تنظميها في الأرفف. ومنظمات الأطباق.
• علب التخزين: هتحتاجي منها للتلاجة بأحجام مختلفة وخامات مختلفة. كمان علب تخزين للتوابل والبقوليات والمكرونات.
• فوط التنظيف: مجموعة فوط التنظيف والتلميع وإزالة الدهون وتجفيف الأطباق.

رفايع في جهاز العروسة للحمام

الفكرة في رفايع جهاز العروسة للحمام إنك تركزي على المنظمات والستاير. يعني هتحتاجي منظمات في الأركان لتنظيم مستلزمات الاستحمام. وستاير للدش ومشاية للأرضية.

لو منطقة الغسيل عندك داخل الحمام هتحتاجي سلة غسيل. ومنظم لمساحيق الغسيل ومستلزمات التنظيف. هتحتاجي فوط للحمام للاستخدام اليومي أو التلميع والتنظيف.

رفايع في جهاز العروسة لغرفة المعيشة

طبعًا يهمك منطقة المعيشة والاستقبال تبقى من ألطف الأماكن في شقتك، عشان كدا هتحتاجي رفايع مهمة:

• مفارش للترابيزات: سواء ترابيزات القهوة أو في الأركان.
• كوشنز: دي هتختاري منها قطع بألوان مميزة وخامات مريحة. ومعاها قطع فرو أو مفارش تريكو للترابيزات عشان تنسقيهم مع بعض.
• منظمات: هتكون خاصة بريموتات التحكم، وللمجلات مثلًا.
• ديكورات لطيفة من شموع ومجسمات بشكل وتصميم يتناسب مع باقي الشقة.

وزي ما قولنا كل رفايع في جهاز العروسة هتلاقيها في أي مكان قريب منك. كمان هتلاقيها متوفرة أون لاين في متاجر كتير اعملي بس سيرش وهتظهر قدامك لوحدها.

اقرأ أيضًا: أماكن بيع جهاز العروسة في مصر.

اقرأ أيضًا: أماكن بيع الأثاث في مصر الأفضل والأضمن.