كتير مننا وسط لخمة الفرح وتجهيزاته وتجهيز الشقة بننسى نستعد لرحلة شهر العسل، بتبقي حضرتي شنط هدومك اللي هتتنقلي بيها مع عريسك في بيتكم الجديد لكن معملتيش حسابك تحضري شنطة هدوم وفساتين رحلة شهر العسل.

وبتلاقي نفسك فجأة اتزنقتي بعد الفرح وانتم خلاص مسافرين ومش عارفة تاخدي ايه معاكي؟ عشان كدة احنا هنا عشان نساعدك، وهنقولك من بدري ايه اللي المفروض تحضريه في شنطة هدومك اللي هتاخديها معاك في رحلة شهر العسل.

طبعاً ده بخلاف ملابسك الداخلية واللانجيري اللي هتلبسيه لجوزك، احنا هنا بنتكلم عن هدوم الخروج وفساتين رحلة شهر العسل اللي هتخرجي بيها معاه وانتم بتتفسحوا بالنهار أو في عشا رومانسي بالليل على أضواء الشموع في مكان مفتوح؛ فتابعي معانا.

تونيك منقوش:

أول اقتراح ممكن نقترحه عليكي هنا هو التونيك المنقوش، وده هيكون مناسب جداً لخروجات النهار أو في فترة المغرب، وممكن تلبسيه لوحده كإنه فستان قصير، أو مع بنطلون جينز.

وعلى حسب نوعية الخروجة اللي خارجينها أو ذوقك وتفضيلاتك الخاصة ممكن يبقى معاه جزمة إسبارديل بكعب عريض أو صندل كاجوال.

المهم تكوني مرتاحة في اللي هتلبسيه، وزي ما بيقولوا راحة الجسم تبدأ من راحة القدمين.

فستان مكسي مزهر:

تاني اقتراح لينا لفساتين رحلة شهر العسل اللي ممكن تاخديها معاكي في شنطة هدومك هو الفستان ده، هيبقى مناسب أوي لو نازلين تتمشوا في منطقة ساحلية أو عازمك ع العشا ع البحر في الهواء الطلق.

لو خارجين بالنهار ممكن تلبسيه مع جذمة فلات وهيديكي حرية في الحركة أكتر، أما لو خارجين بالليل وهتسهروا في مطعم أو مكان شيك؛ فممكن تلبسي عليه جزمة بكعب إسفيني هتديكي لمسة من الأناقة.

فستان صيفي أبيض:

لو عاوزة تفضلي مستمتعة باللون الأبيض كعروسة ومحتفظة ببراءته يبقى نرشح لك انك تاخدي معاكي في فساتين رحلة شهر العسل اللي هتخرجي بيها مع عريسك فستان صيفي أبيض يفضل محافظ على شكلك كعروسة جديدة وفي نفس الوقت يديكي حرية في الحركة.

فستان قصير بكتف واحد:

لو هتقضي شهر العسل في مكان صيفي جوه دافي يبقى هتحتاجي الفستان ده، هيلفت ليكي الأنظار في كل مكان.

طبعاً لو محجبة ممكن تتغاضي عن الفكرة دي وتتابعي معانا بقية الأفكار.

فستان مكسي كروشيه:

مفيش أحلى من الكروشيه في الأجازات، خفيف ولو رايحة البحر أو حمام السباحة ممكن تلبسيه بسهولة فوق المايوه.

وكمان سهل تشيليه في الشنطة بمنتهى الأريحية في أي مكان فاضي وانت مش شايلة هم إنه يتكرمش أو تحتاجي تكويه.

فستان ميدي كذة طبقة:

وده من أنواع الفساتين المريحة جداً، مناسب لخروجات النهار وبالليل، بالنهار البسيه مع صنادل أو جزم كاجوال ورياضية.

وبالليل لو خارجين في سهرة رومانسية وشاعرية تقدري تلبسيه مع جزمة شيك بكعب وشوية إكسسوارات أنيقة تحول مظهرك من كاجوال لكلاسيكي أنيق.

فستان كتان كاجوال:

أياً كان مكان رحلة شهر العسل اللي هتطلعوها إلا إن الفستان ده هيبقى مناسب لأي مكان، وهيديكي تألق لمظهرك أياً كانت المغامرة اللي بتعملوها وتستكشفوها في شهر عسلكم.

سواء كنتم بتقضوا يوم في مكان ريفي أو بتستكشفوا مكان تاريخي.

فستان قماش خفيف بطبعة هندسية:

الفستان ده هيكون مناسب جداً انك تتمشي بيه مع عريسك على شط البحر لو هتقضوا رحلة شهر العسل في بلد ساحلي أو حتى لو هتسترخوا مع بعض عند حمام السباحة في الفندق اللي نازلين فيه.

   نتمنى تكون الأفكار دي هتساعدك في تحضير شنطتك وانك تعرفي تختاري بسهولة فساتين رحلة شهر العسل اللي تخليكي تقضي أحلى وقت مع عريسك تفضلي فاكراه للأبد.

واتصوروا كتير بقى عشان تخلدوا الذكريات دي للأبد وتفرجوها لعيالكم بعد كدة.