نصائح للعروسة يوم الصباحية

علشان يهمنا سعادتك، فاحنا بنقدم لك أهم نصائح للعروسة يوم الصباحية. لأن اليوم دا من أهم الأيام في حياة العروسة المصرية تحديدًا، وبيعتبر البداية الفعلية للحياة الزوجية. وبيكون مليان مشاعر مختلطة من الفرحة، التوتر، والترقب. علشان كده، مهم إنك تكوني مستعدة ليه بشكل كويس علشان تقدري تستمتعي بيه وتخلي اليوم ده ذكرى جميلة لكِ ولجوزك.

10 نصائح للعروسة المصرية يوم الصباحية

اهتمي بمظهرك

أول حاجة هتشغلك يوم الصباحية هي مظهرك. طبيعي إنك بعد ليلة الفرح تكوني تعبانة، لكن مهم تبدأي يومك بمظهر حلو ونظيف. أول ما تصحي من النوم خدي دوش جميل واستخدمي مرطب خفيف عشان بشرتك تفضل نضرة. لو حابة، ممكن تعملي مكياج بسيط وخفيف، يديكي شكل طبيعي ومنتعش.

لازم نفكرك إن الجمال مش بالمكياج الكتير، بلاش يصحى يلاقي على وشك 20 لون. أنت إنسانة عادية مش عروسة حلاوة. الجمال يا عزيزتي بيكمن في البساطة، يعني رتوش خفيفة، بس علشان تخفي التعب وتخلي شكلك حيوي مش أكتر.

وأهم حاجة رحيتك لازم تكون دايمًا حلوة، وياريت تختاري ريحة معينة يربطها بيكي. ريحة الست من أكبر عوامل جذب الراجل ليها، يعني مهما كنت مشغولة بتحضير أكل أو ترتيب بيت، اوعي تنسي تهتمي بنفسك.

حضري فطار بسيط

الفطار يوم الصباحية من اللحظات اللطيفة اللي بتجمع بينك وبين جوزك. مش ضروري تعملي فطار معقد، حاجات بسيطة زي شاي، قهوة، وعصير. مع شوية حاجات خفيفة زي كرواسون أو توست بالجبنة والعسل كفاية جدًا. الفطار دا بيكون بداية لطيفة ليومكم الجديد مع بعض. يعني بلاش تتحدي نفسك، وجو الفطار التركي اللي بتحلمي تفطريه مع جوزك، مش لازم يوم الصباحية أجليه ليوم تاني، يكون إرهاق الفرح راح.

طبعًا الكلام دا لعروسة المدن، أما العروسة المصرية في الأقاليم، فعادة يوم الصباحية ليه تقاليد معينة. مثلًا، أهل العروسة بيروحلها من بدري بالفطير المشلتت والعسل والأكل، ويصبحوا عليها. زمان أيام جدتي وجدتك، كانوا أهلها بيصحوها من الساعة 6 الصبح، لكن دلوقتي الأمور اتغيرت، وبقت الصباحية على آخر اليوم.

 ولو هقولك نصيحة من أهم نصائح العروسة يوم الصباحية، هتكون إنك تطلبي من أهلك يأجلوا الصباحية لتاني يوم.

الهدوء في التعامل

يوم الصباحية ممكن يكون فيه شوية توتر طبيعي، لأن دي أول مرة تعيشي فيها مع جوزك. هتصحي في بيت جديد وسرير جديد مع شخص جديد، وحياة جديدة. وطبعًا أغلب العرايس بتكون مكسوفة تتحرك في البيت أو تتصرف على طبيعتها، وبيجلها إحساس ” أنا فين، عايزة أروح لأمي”.

 انصحك تاخدي الأمور بهدوء، وتتعاملي مع المواقف اللي ممكن تحصل بعقلانية ومن غير توتر. فكرة إنكم تكونوا مرتاحين مع بعض هتسهل عليكم كتير وهتخلي اليوم يمشي بشكل سلس. وبلاش تضيعي أيام مش هتتكرر تاني بسبب التوتر والخجل.

خدي راحتك لو حسيتي إنك محتاجة شوية وقت لوحدك للاسترخاء، مفيش مشكلة. ممكن تاخدي شاور دافيء أو تقعدي شوية مع نفسك.

الاهتمام بالتفاصيل الصغيرة

التفاصيل الصغيرة ولمستك في البيت بتفرق جدًا في اليوم ده مع جوزك. زي  مثلًا، إنك تحطي ورد حلو في مزهرية، أو تحطي موسيقى هادية في الخلفية، أو ترشي البيت بمعطر مميز.  التفاصيل دي بتخلق جو مريح ومبهج ليكم انتو الاتنين، وهتخلي يوم الصباحية مختلف ومميز وهيفضل في ذاكرة جوزك طول العمر.

كوني عفوية

يوم الصباحية مليان مشاعر وتوقعات، وأهم نصيحة إنك تكوني على طبيعتك. العفوية في التعامل هتساعدك تتغلبي على التوتر وهتخليكي تستمتعي باللحظات الصغيرة مع جوزك. متحاوليش تكوني مثالية، كوني نفسك وهتلاقي كل حاجة بتمشي كويس جدًا.

التحضير للزيارات

يوم الصباحية عند معظم العائلات المصرية، بيكون فيه زيارات من الأهل والأصدقاء عشان يباركوا لكم. حضري نفسك نفسيًا لده، وحاولي تستمتعي بالوقت مع الناس اللي بيحبوكِ. غالبًا لو عيلتكم كبيرة، فاليوم هيبقى كله زيارات، وهتقضيها ضيافة، والحوض هيتملي مواعين، وهتلاقي نفسك في النهاية لابسة مريلة المطبخ، واليوم ماشي بطريقة غير اللي تخيلتيها.

لو الموضوع هيمثل عبئ كبير عليكي، ممكن تطلبي إن الزيارات تتأجل عادي جدًا. أو ممكن تهربي على شهر العسل علطول، ولما ترجعوا تبدأو تستقبلوا الناس.

تعاملي مع جوزك بحب وود

يوم الصباحية بداية جديدة لحياتك الجاية كلها مع جوزك. حاولي تعامليه بلطف وود، وخدي بالك إن اليوم ده بيفتح باب لحياة جديدة، وبإيدك تخليها مليانة حب ومشاركة أو توتر وقلق. وكل ما تكوني قريبة منه ومتفهمة ليه، كل ما هتقوي علاقتكم ببعض.

بلاش معاملة الند بالند، وجو سيب وأنا سيب، الست الذكية بتعرف تمشي حياتها زي ما هي عايزة لكن وجوزها مستريح ومبسوط. خلي لسانك حلو ونظرة عنيكي ليه كلها حب، لو قصر في حاجة عادي مش نهاية الكون. استري أخطائه وكملي نقصه، وحوطي على بيتك بالحب والرضا. الحياة الزوجية يا عزيزتي محتاجة كتير من التغافل والتناسي، علشان تحطي راسك جنبه آخر الليل وأنت مرتاحة. 

مش لازم اليوم يكون مثالي

ممكن تكوني مخططة إن كل حاجة تكون مثالية يوم الصباحية، بس الواقع ممكن يكون مختلف تمامًا. ما تقلقيش لو حصلت أي حاجة مش متوقعة، زي إن حد يزوركم فجأة أو يحصل حاجة صغيرة تضايقك. خدي الأمور ببساطة واعتبريها جزء من اليوم اللي هتفتكريه بعدين وتضحكي عليه. خليكي مرنة وسهلة ولينة، علشان فرحتكم ببعض تكمل من غير نكد ملهوش لازمة.

احتفظي بذكريات اليوم دا

حاولي تحتفظي بذكريات اليوم ده بطرق مختلفة. ممكن تاخدي صور مع جوزك في اللحظات الحلوة، أو تكتبي شوية ملاحظات عن مشاعرك وأفكارك. الذكريات دي هتكون حاجة جميلة ترجعي ليها بعدين وتفتكري اليوم ده بكل تفاصيله.

حتى علشان لما تزعلوا مع بعض بعد كدا، وتفتحوا الذكريات دي، تحنوا وتعيدوا أمجاد الماضي. وكمان علشان تعملي ذكريات لأولادكم حلوة يتفرجوا عليها بعدين.

التحضير لليوم التالي

بعد يوم الصباحية، هتبدأ حياتكم العادية كزوج وزوجة مصريين عاديين. مهم إنك تكوني مستعدة لتاني يوم، سواء من حيث تحضير البيت أو التخطيط للحاجات اللي هتعملوها مع بعض. وجود خطة بسيطة بيساعد في تخفيف الضغط وبيخلي الأمور تمشي بشكل سلس.  استفيدي من نصايح اللي حواليكي، اسألي الأمهات أو أصحابك المتجوزين لو عندهم أي نصايح ليكِ. ممكن يكونوا مروا بتجارب مفيدة.

والأفضل طبعًا لو كان في ميزانية لشهر العسل، إنكم تطلعوا على مكان حلو ومناسب للهاني مون. سواء بقى جوا مصر أو براها.

الاستمتاع باللحظات الحلوة

خدي بالك إن يوم الصباحية يوم مميز جدًا، من الأيام اللي بتعدي ومش بتتكرر تاني. حاولي تستمتعي بكل لحظة فيه، سواء كانت لحظات هادية مع جوزك، أو وقت بتقضيه مع الأهل والأصدقاء، استمتعي بيه وخليه يوم مليان حب وسعادة. ودي أهم نصيحة من نصائح للعروسة يوم الصباحية.

وأخيرًا، يوم الصباحية هو بداية جديدة لحياة مليانة تحديات وأفراح. بالاستعداد الجيد والاهتمام بالتفاصيل، هتقدري تخلي اليوم دا ذكرى جميلة تفضل معاكِ طول حياتك. استمتعي باليوم بكل لحظاته، وخلي دايمًا الحب والتفاهم هما أساس علاقتك بجوزك.

إقرأ أيضًا: تجهيزات العروسة يوم الفرح 2024