تجهيزات شهر العسل للعريس

تجهيزات شهر العسل للعريس غالبًا بيصحبها توتر ولخبطة، مش عارف يروح فين ويرتب أموره إزاي. ولأن ضغوط العريس كتيرة قبل الفرح هنوضح كل تجهيزات شهر العسل للعريس واللي يقدر يجهزها قبل الفرح بشهر كامل. وبكدا يدخل على أيام الفرح بدون توتر أو تفكير في شهر العسل.

اختيار مكان شهر العسل

أول حاجة المفروض تاخد فيها قرار هي مكان شهر العسل، سواء هيكون داخل مصر أو خارجها. وطبعا في أمور هتركز فيها وانت بتختار المكان عشان تقدر تقضي وقت مميز مع زوجتك.

1. يكون مناسب للفصل اللي هتسافر فيه، يعني لو في الصيف هتحتاج مكان فيه بحر ودرجة الحرارة فيه مناسبة. ولو شتاء هتحتاج يكون فيه أنشطة مناسبة يعني فيها تزلج لو بتحب النوع دا من الأنشطة. أو درجة الحرارة معتدلة فتقدر تتفسح براحتك.
2. مناسب للميزانية، باعتبار إن في تكاليف كثيرة اتصرفت في الفرح والشقة فقد تكون ميزانية شهر العسل مش كبيرة، عشان كدا ضروري تحدد ميزانية مناسبة.
3. اختار مكان يكون فيه أماكن مناسبة لخروجات العرسان، يعني فيه مولات وأماكن سياحية وحدائق وأماكن للسهر، بحيث تقضو وقتكم بشكل متنوع.

أساسيات تجهيزات شهر العسل للعريس

بينما العروسة مركزة في تفاصيل الفرح هتبقى إنت مركز في تفاصيل تانية للسفر:

1.  اختيار الفندق بالتشاور مع العروسة، هتختار الفندق ولكن بما يتناسب مع ميزانيتك.
2. تتأكد إن الفندق بيقدم خدمات خاصة للعرسان من تزيين للغرف وفطار في الغرف.
3. تتأكد إن أوراق السفر تكون جاهزة من جواز سفر وقسيمة الزواج. ضروري تتوفر معاك لأن كثير من للفنادق هتطلبها وقت الحجز.
4. احجز الفندق قبل الفرح بوقت كافي عشان متبقاش الخيارات محدودة وقت الفرح.

تحضير شنطة شهر العسل

الاهتمام بإنهاء تجهيزات شهر العسل للعريس قبل الفرح بوقت كبير هيوفر وقتك قبل الفرح. ويبقى معاك وقت ومساحة إنك تركز في تفاصيل الفرح والبدلة والسيشن. عشان كدا الأفضل تخلص كل تجهيزات شنطة شهر العسل وترتاح من التفكير فيها.

ودلوقتي هنوضحلك الأساسيات اللي هتحتاجها سواء شهر العسل في مصر أو خارجها.

أولًا: الملابس

هتحتاج بشكل أساسي طاقم أبيض من قميص وبنطلون عشان صور شهر العسل باللون الأبيض رائعة. وأكيد طقم أسود عشان السهرات، وطبعًا أكثر من شورت وتيشيرت قطن للخروجات النهارية.

ثانيًا: الملابس اليومية

جهز مجموعة بيجامات قطنية خفيفة أو ثقيلة حسب الفصل اللي هتسافر فيه. هتحتاج بيجامة تقريبًا لكل يوم إقامة لو هتسافر أسبوع مثلًا. ولو أكثر من أسبوع ممكن تزود العدد أو تكتفي بيه وتطلب خدمة الغسيل في الفندق.

ثالثًا: الأحذية

الأساسي في الاحذية كوتشي ابيض وجزمة سوداء، بعدهم تقدر تضيف أي ألوان تانية تتناسب مع الملابس اللي هتاخدها معاك.

رابعًا: الملابس الداخلية

هتحتاج طاقمين لكل يوم إقامة وتكون خامات قطنية مريحة، نفس العدد للشرابات الطويلة والقصيرة وأكيد تكون قطنية عشان متسببش ريحة للقدم.

تجهيزات شهر العسل بسيطة وضرورية

عارفين إن دايما التفاصيل الصغيرة في تجهيزات شهر العسل للعريس هي أكتر تجهيزات بتكون ناقصة. عشان كدا هنوضحها بالتفصيل وتقدر تكتبها في نوت على الموبايل هتسهل عليك تجهزها ومتنساش حاجة.

1. مستحضرات الاستحمام من شامبو وشاور جيل ولوفة، طبيعي تتوفر الأمور دي في الفندق لكن أكيد هتحتاج اللوازم الشخصية بتاعتك.
2. ماكينة الحلاقة ولوزام الحلاقة، وفرشاة الأسنان والمعجون.
3. أكثر من نوع برفيوم بحيث تبقى رائحتك مُتجددة ومُتغيرة.
4. كريم ترطيب وصن بلوك عشان نزول البحر ميأثرش عليك ويغير كتير في بشرتك.

تجهيزات شهر العسل للعريس خارج الفندق

لإن فترة شهر العسل مش بتتكرر بنفس الحماس والإحساس لازم تكون محضر أفكار كتير ينفع تنفذها خارج الفندق، وإلا هتلاقي نفسك مش حابب تخرج ولا تتحرك من مكانك ويحل الملل مكان الحماس.

عشان كدا هنقولك شوية أفكار من أهم تجهيزات شهر العسل للعريس وبيها تتحول الأيام لذكريات لا تُنسى.

1. احجز في مكان على البحر يكون بيهتم بالسهرات الليلية الرومانسية. هتبقى ذكرى مميزة وتقدرو تتصور أحلى صور تفضل ذكرى طول العمر.
2. اتفق مع مطعم الفندق أو أي مطعم تروحه إنه يقدملها ورد مفاجأة على طبق الأكل بتاعها.
3. اهتم بالمفاجأت طول فترة شهر العسل، ممكن تقدملها وردة هدية بدون سبب، تفاجئها بشوكولاتة، أو خاتم جديد أو أي حاجة ترسم ضحكة على وشها.

المهم وانت مندمج في تجهيزات شهر العسل متنساش إنك محتاج تركز في كل تجهيزات العريس قبل الفرح. وبكدا تقدر تستقبل الفرح بكل راحة وبدون أي توتر.

اقرأ أيضًا: تجهيزات شهر العسل للعروسة.

اقرأ أيضًا: تحضير شنطة يوم الفرح للعروسة بالتفصيل.