7 مكملات غذائية مهمة لصحة جسمك

المصاريف وترتيبات الجواز.. الشقة لسة فاضل لها حاجات كتير.. لازم أشتغل أكتر من 10 ساعات عشان باقي الديون إللي عليا…. كل دي أفكار بتفضل معاك حتى بعد الفرح لأن المسؤوليات بتزيد، طب حسألك سؤال.. فكرت صحتك عاملة ايه؟ طب فكرت الإجهاد المستمر والتعب سببه وعلاجه ايه؟ النهاردة حتلاقوا إجابات على كل أسئلتكم بخصوص الموضوع ده لأنه بيشغل بال ناس كتير، ومعظم الناس بتكسل تروح للدكتور تكشف أو مفيش وقت عندهم بسبب الشغل أو الضغوطات الكتيرة إللي هما فيها. عشان كدة حقولكم على 7 مكملات غذائية لازم تهتم بيهم في حالة أن جسمك محتاجهم، وعملت تحاليل أو ظهر عليك أعراض نقص الفيتامينات دي. 

مكملات غذائية لزيادة هرمون التستوستيرون

فيتامين د.. مكمل غذائي يدعم صحة الرجل

معظم الشعب المصري عنده نقص في فيتامين د ،ودة بيبان في التحاليل، وبيكون له أعراض مميزة على سبيل المثال: الإجهاد المستمر، والدوخة. 

فيتامين د مهم لصحة العظام، ويزيد من مستويات هرمون التستوستيرون (هرمون الذكورة)، ويقلل من الاكتئاب. 

الزنك

الزنك يساعد على زيادة هرمون الذكورة، ويحافظ على صحة البروستاتا، ويقوي المناعة، بالإضافة إلى ذلك أن نقصه المستمر في الجسم بسبب عدم الاهتمام بالأكل اللي يحتوي على الزنك. 

والأكلات اللي تحتوي على الزنك على سبيل المثال:

•  المأكولات البحرية مثل: المحار (زي بلح البحر) لأنه يحتوي على نسبة عالية من الزنك.
• اللحوم الحمراء.
•  الدواجن. 

فيتامين C وخصوبة الرجل

من أشهر الفيتامينات المقوية للمناعة لأنه مضاد للأكسدة ويحمي من أمراض كتيرة على سبيل المثال: أمراض القلب والسكر وأنواع مختلفة من السرطان. وفي أبحاث قالت حديثا أنه يساعد على زيادة الخصوبة للرجل لأنه يحسن من وظيفة وحركة الحيوانات المنوية.

أوميجا 3.. مكمل غذائي لتقوية صحة القلب

أوميجا 3 من أشهر المكملات الغذائية اللي الناس بتاخدها في مصر، ودوره مهم جدا في الحفاظ على صحة القلب، وتقليل نسبة الكوليسترول في الدم، والمحافظة على صحة الدماغ، والحفاظ على صحة المفاصل، بالإضافة إلى تقليل التهابات الجسم إللي تساعد على حدوث أمراض كتيرة. 

ويمكن الحصول عليه من الأسماك على سبيل المثال:

•  سمك السالمون.
• سمك الماكريل.
•  زيت كبد الحوت، وإللي غالبا بيكون على هيئة كبسولات موجودة في الصيدلية. 

البكتيريا النافعة  Probiotics

هي نوع من البكتيريا المفيدة للجسم، وتعيش في الجهاز الهضمي خصوصا الأمعاء، ودورها هو تحسين امتصاص المغذيات علشان يستفيد منها الجسم استفادة كاملة، وفي بعض الأوقات تقل من الأمعاء بسبب أدوية معينة أو سوء التغذية، وبالتالي بتحصل مشاكل في القولون زي الانتفاخات. 

في الحالة دي ممكن تتناول مأكولات تحتوي على البكتيريا النافعة زي منتجات الألبان، أو تتناول مكمل غذائي عبارة عن البكتريا النافعة، علشان توصل لمستواها الطبيعي مرة تانية، وحتحس بالفرق في صحة القولون بعدها.

الماغنسيوم.. مكمل غذائي لتقوية العضلات

الماغنسيوم مهم جدا لصحة الرجل، لأنه يدعم العضلات ويقلل من الشد العضلي، ويقوي الأعصاب، وحتحس بعد تناوله بطاقة عالية حتخليك في حالة أفضل. 

والماغنسيوم موجود في نباتات كتيرة زي:

•  الخس.
•  الخيار.
•  الفول الأخضر.
• بذور الكتان. 

فيتامين B6 من المكملات الغذائية المهمة للأعصاب

 من الفيتامينات المهمة لأنه مصدر للطاقة، بس للأسف الجسم مش بيصنعه، فالحل هو تناول طعام فيه فيتامين B6 أو تناول مكملات غذائية. 

يعتبر مضاد للالتهابات ويقلل حالات الاكتئاب و تغير المزاج، وتقوية الجهاز العصبي، وموجود في أطعمة كتيرة مثل:

•  البيض 
• اللبن
•  الأفوكادو. 

نصائح قبل تناول المكملات الغذائية

• لازم تتأكد في الأول أن عندك نقص في فيتامين معين، أو عندك أعراض نقص، ودة لأن الزيادة في تناولها يسبب مشكلات صحية كبيرة.
• اسأل الطبيب أو الصيدلي لأن دة أفضل حل، واعمل التحاليل اللازمة علشان ميحصلش أي مشكلة. 
• متنساش أن كمان فيه تحاليل قبل الزواج تقدر تعرف منها لو عندك أي نقص في الفيتامينات إللي اتكلمنا عنها.

اقرأ أيضا: لو عايز تبدأ حياتك صح.. ابعد عن التدخين