3 هرمونات تؤثر على وزن العروسة قبل وبعد الفرح
العروسة قبل فرحها دايما بتكون متلخبطة، ووراها مليون حاجة، أو بمعنى أصح يومها بيتغير في فترة التجهيزات، ونومها بيكون قليل جدا، والنتيجة أن احتمال كبير شكل جسمها يتغير، ودة بيكون شيء ملحوظ من اللي حواليها، وبعد البحث ظهر أن فيه بعض الهرمونات لها دور رئيسي في التأثير على وزن العروسة قبل وبعد الفرح.
علاقة الهرمونات ووزن الجسم
ليه اهتم الباحثون بدراسة العلاقة بين الهرمونات ووزن العروسة؟
عرايس كتيرة بيتعرضوا لمشكلة فقدان الوزن وزيادته، لدرجة أنها بتظبط مقاس الفستان كل يوم تقريبا.
وكذلك بعد الفرح بتكون العروسة ارتاحت من كمية المشاوير اللي كانت وراها، و ممكن تزيد في الوزن.
النهاردة هنتكلم بشكل علمي شوية عن ازاى الضغط النفسي بيأثر على شكل الجسم وعلاقة الهرمونات ووزن العروسة.
اسباب نزول الوزن المفاجئ
- الضغط النفسي هو السبب الرئيسي لنزول الوزن، ودة لأنه بيأثر بشكل كبير على الشهية، وبالتالي تقل عدد الوجبات اللي بتاكلها العروسة يوميا.
- الهرمونات: واللي ليها أثر كبير جدا، ودة لأن وقت التوتر فيه غدد معينة بتفرز زي هرموني الأدرينالين والكورتيزول، واللي ليهم دور في سد الشهية، وبعمل أبحاث كتير على عرايس مقدمين على الجواز تم إثبات علاقة الهرمونات ووزن العروسة.
- قلة النوم : ممكن تلاقي العروسة نامت ساعتين بس، و تصحى ملهاش نفس تاكل إلا حاجة خفيفة، والموضوع دة طلع له سبب علمي بردو، أن مع الضغط وقلة النوم يتأثر إفراز هرمون الكورتيزول ،وبالتالي بيأثر على عملية الهضم، والنتيجة أن الوزن بيقل.
ايه العلامات الآخرى اللي ممكن تحصل مع نزول الوزن؟
- صداع مستمر.
- نسيان متكرر.
- وجع في معظم أجزاء الجسم.
- مشاكل في الهضم.
- إمساك ،وإسهال.
تأثير الضغط النفسي على الجسم
الضغط النفسي له الدور في التأثير على الجهاز العصبي، واللي مرتبطة بالتعامل مع الجوع أو الشبع، ومثال على كدة هو تأثر العصب الحائر (ودة عصب يمتد من الدماغ لآخر الجسم) من الحالة دي، وبالتالي يقلل من امتصاص الفيتامينات، والجسم مش هيستفيد.
أسباب زيادة الوزن بعد الفرح
عدى الفرح على خير، والعروسة بدأت ترتاح، ومفيش مشاوير ورا بعضها، وفيه أكل كتير بعد الفرح، وفي شهر العسل، والعروسة عاشت خلاص مع حب حياتها، ودة سبب كفيل يخلي شهيتها تتفتح أكتر من الأول، وممكن وزنها يزيد.
وفيه أسباب علمية العلماء قالوها بتفسر العلاقة بين الارتياح النفسي والسعادة وزيادة الوزن زي:
- قلة الحركة، ودة بيخلي فيه كسل وأكل كتير وزيادة في الوزن.
- تشجيع الطرف التاني لشريكته، فبياكلوا سوا.
- تغير روتين اليوم من حيث عدد الوجبات: العروسة بتكون قبل الفرح بتاكل وجبة واحدة عشان تعرف تخلص اللي وراها، ولكن بعد الفرح الأمور بتختلف، وبتشجيع زوجها ممكن ترجع زي الأول، يعني من الآخر ممكن تأكل أكتر من تلات وجبات كمان.
ايه علاقة الهرمونات ووزن العروسة في حالة زيادة الوزن؟
هرمونات السعادة لها دور أساسي في زيادة الوزن زي هرمون السيرتونين، واللي بيشتغل بشكل فعال وقوي على الخلايا الدهنية المنتشرة في جسمنا وينشطها، وبالتالي النتيجة هي زيادة الوزن في وقت قصير.
لغبطة الهرمونات
عبارة “لغبطة الهرمونات” مطلعتش جملة بتتقال كدة وخلاص، طلع وراها تفاصيل كتيرة، ونقدر نستنتج دلوقتي أن الهرمونات داخلة في كل حياتنا، وضروري نكون قادرين نتعامل مع تغير الأحوال، والأهم نكون فاهمين طبيعة جسمنا في كل مرحلة في حياتنا.
اقرأ أيضا: أفضل أماكن شهر العسل
اقرأ أيضا: تجهيزات العروسة يوم الفرح 2024
هل محتوى المقال دة كان مفيد بالنسبة لك؟
نعم، مفيد!لا!
د. أمنية حسن
المقالات: 30
شغالين على حاجة جديدة
وهننطلق قريب اوي … استنونا