11 فكرة لتقليل الارهاق هتفرق في صحتكم!

الارهاق من الأمور اللي ممكن تسبب لكم ضغط نفسي، وتؤثر على علاقتكم بشكل قوي خصوصا وقت التجهيزات، وقبل الفرح أيضا. هنقولكم على 11 فكرة لو نفذتوها هتجدد طاقتكم.

1- لتجنب الارهاق.. اعملوا خطة مدروسة!

عمل خطة في جدول زمني مهم للتخطيط للفرح، لأنه هيقلل التوتر والتعب.

لازم تخططوا كويس للخطوات اللي جاية، وتكتبوا كل الخطوات دي وتتفقوا مع بعض عليها، ووضع جدول زمني أيضا دة هيشجعكم تنجزوا، ومش هتحسوا أنكم متوترين، وبالتالي هتحسوا بحالة من الهدوء النفسي والاسترخاء طول فترة تجهيزات الفرح.

2- شرب المشروبات المهدئة للأعصاب

مشروب الكاموميل مهم لتهدئة أعصابك لأنه يعتبر من المهدئات الطبيعية.

على سبيل المثال: مشروب البابونج، والنعناع، والينسون، ويعتبروا من المهدئات الطبيعية المشهورة. ولهم دور في تهدئة الأعصاب بشكل كبير بسبب مكوناتهم الكيميائية، وبالتالي حتحسوا أن الارهاق قل.

3- استخدام الزيوت العطرية

استخدام الزيوت العطرية للجسم هيديكوا إحساس بالانتعاش والاسترخاء، وفيه علاج اسمه العلاج بالزيوت العطرية يؤثر بشكل إيجابي، وهذه الزيوت على سبيل المثال: زيت اللافندر، وزيت الورد، وزيت الروزماري، وزيت الياسمين.

4- ممارسة الرياضة بانتظام.. يقلل الارهاق على المدى!

الجري من الرياضات اللي بتحافظ على صحتك وتقلل التفكير الزائد وتقلل الارهاق أيضا.

لعب الرياضة مهم، وخصوصا في هذه المرحلة لأنها زي ما هتفرق في قوتكم البدنية هتفرق معاكم في صحتكم النفسية لأنكم هتحسوا أنكم فصلتوا جزء من الوقت من الضغوطات والتجهيزات، والرياضة ممكن تكون رياضة بسيطة غير مكلفة على سبيل المثال: المشي والجري وعمل تمارين في البيت.

5- خدوا اجازة من التجهيزات وافصلوا!

لازم تاخدي اجازة تفصلي بيها عن أي توتر اتعرضتي له الفترة اللي فاتت وده هيخليكي تكملي بكل قوة.

ممكن تخرجوا تقابلوا أصحابكم أو تروحوا مكان بتحبوه تعدوا فيه وتنسوا الضغوطات اللي أنتم فيها حتى لو بشكل مؤقت، وممكن تعملوا أي هواية بتحبوها، أو ممكن ترتاحوا في البيت شوية وده هيفرق معاكم بشكل كبير.

6- لا تنسوا حياتكم الاجتماعية!

في فترة التجهيز للفرح ممكن تحس أنك عايز تتكلم مع حد من صحابك أو تفضفض معاه لو حصل موقف ضايقك أو محتار في موضوع معين، وفي الحالة دي بيظهر دور الصحاب لازم تتواصلوا معاهم وتتقابلوا وتعدوا تتكلموا وحتلاحظ الفرق بعد المقابلة دي، وممكن يجيلكم أفكار جديدة لما تتكلموا معاهم.

7- اعملي ماسكات لبشرة نضرة ومنورة!

الفترة دي بتكوني مش نايمة كويس، ومش منتظمة على روتين بشرتك. والحل حاولي تعملي ماسكات طبيعية علشان ترجعي النضارة لبشرتك على سبيل المثال: ماسك الخيار أو الزبادي لتقليل الانتفاخات تحت العين وأثر قلة النوم والأرق والإرهاق، والنتيجة أنك حتحسي بفرق كبير بعدها، وبالتالي هيقل ظهور الارهاق على بشرتك.

8- النوم الكافي

النوم 8 ساعات هيحسن من حالة جسمك ونفسيتك بشكل كبير وملحوظ وهو من الطرق الأساسية لتقليل الارهاق.

النوم لمدة ٧-٨ ساعات مهم جدا لضمان وصولكم لقمة النشاط، ويكون عندكم طاقة للمشاوير وتكملة الحاجات اللي ناقصة في الجهاز، وحتلاحظوا دة في سهولة الحركة وعلى بشرتكم وعلى جسمكم أيضا.

9- طلب المساعدة فورا!

كلمي صديقتك أو قريبتك علشان تساعدك أو تاخدي رأيها، ولا تترددي أبدا في الخطوة دي.

متتحرجوش أنكم تطلبوا مساعدة من أهلكم وأقرب الناس ليكم سواء نصيحة أو مشوار مستعجل مش هتقدروا تعملوه، والخطوة دي هتديكم دعم قوي جدا من اللي حواليكم، وهتحسوا أد ايه أنكم انجزتوا حاجات كتيرة.

10- عمل روتين تجميلي لنفسكم.. هيقلل الارهاق بشكل ملحوظ

الالتزام بروتين يومي مهم جدا ليكم خصوصا لو عندكم مشكلة في البشرة أو في شعركم، والتزموا بالروتين دة قبل الفرح على الأقل ٣ شهور علشان تحسوا بالفرق قرب ميعاد فرحكم.

مثال على روتين للبشرة لتقليل الارهاق

روتين البشرة مهم جدا لتقليل علامات التعب والارهاق على وجهك وهيديكي نشاط وحيوية تكملي.

غسول مناسب لنوع البشرة.
مرطب يومي.
تقشير الجسم.
تفتيح الجسم وإزالة التصبغات من البشرة.

روتين العناية بالشعر

الاهتمام بشعرك ضرورة في تجهيزات الفرح لأنه هيديك ثقة عالية في نفسك.

شامبو مناسب لنوع الشعر.
حمام كريم يغذي ويرطب الشعر بعمق.
علاج مشكلات الشعر على سبيل المثال: القشرة وتساقط الشعر والجفاف.

11- التغذية الجيدة وشرب الماء

شرب 8 أكواب ماء على الأقل هيساعد جسمك في استعادة نشاطه وتقليل الارهاق أيضا.

الأكل الصحي المتوازن هو مفتاح كل الخطوات اللي فاتت اللي اتكلمنا عنها، واهتموا بتناول الخضراوات والفواكه والبروتينات والأكلات اللي بتحتوي على الفيتامينات والمعادن اللي الجسم بيحتاجها بشكل يومي.

واشربوا الماء حوالي ٨ أكواب يوميا لنضارة وطاقة ملحوظة في أنشطتكم اليومية.

هل محتوى المقال دة كان مفيد بالنسبة لك؟

نعم، مفيد!لا!