11 خطوة لكِ من أجل أعصاب هادئة يوم الفرح
من الأمور اللي لازم تهتمي بيها هي أنك تكوني رايقة و صاحبة أعصاب هادئة في يوم فرحك، لأنه يوم مميز مينفعش يعدي ومزاجك مش رايق، وعلشان يسيب معاكي ذكريات للعمر كله.
وعلشان كدة حنقولك على كذا نصيحة ليوم مميز مش حتنسيه طول حياتك.
لازم تكوني منظمة أغراضك!
مهم جدا أنك تنظمي الشنطة اللي حتروحي بيها قاعة الفرح علشان تجهزي (دة في حالة لو جهزتي في القاعة)، وجهزيها قبل الفرح بيوم علشان متكونيش متوترة ومتنسيش حاجة مهمة، وبالتالي حتحسي أن أعصابك هادئة.
حاولي تكتبي كل حاجة عايزة تعمليها علشان متنسيش
مع توتر الأيام اللي قبل الفرح ويوم الفرح نفسه خللي معاكي نووت صغيرة أو على الموبايل اكتبي فيها كل اللي عايزة تعمليه علشان مفيش حاجة تنسيها ومتتزنقيش في الوقت.
تناولي الثلاث وجبات وكلي أكل صحي ومشبع
اهتمي بأكلك جدا خصوصا يوم الفرح علشان متحسيش بصداع أو إرهاق مع تفاصيل اليوم الكتيرة، وحتى لو أكلتي أكل بسيط في كل وجبة اهتمي بالأكل الصحي والمشبع.
أفكار لأكل صحي يساعد على تهدئة أعصابك!
- زبادي وشوفان.
- خضراوات وفواكه على سبيل المثال فرووت سلاط وسلطة خضراء لوجود الألياف فيهم.
- بروتين.
- عصائر فريش.
- مخبوزات صحية من الشوفان والحبوب الكاملة.
اطلبي المساعدة من الناس القريبة منك
فيه مثل بيقول “إيد لوحدها متسقفش” يعني صعب أن حد لوحده يعمل كل المهام اللي عليه، والمهم أن يكون جنبك حد بيحبك وينزل معاكي مشاويرك، ويكون معاكي يوم الفرح لحظة بلحظة كل دة حيفرق جدا لأن أعصابك حتبقى هادية جدا بوجود الشخص دة.
تجنبي الكلام في أى مواضيع ممكن تضايقك أو تعكر مزاجك
لأن مع فترة التجهيزات بتكون أعصابك مشدودة، ويوم الفرح كمان بيكون فيه توتر، فحاولي متتكلميش أو تفتكري الحاجات اللي بتضايقك، وحتلاحظي أن أعصابك بقت هادية تماما.
نامي كويس من أجل أعصاب هادئة!
النوم بيأثر على الصحة النفسية والجسدية كمان، وحاولي ليلة الفرح تنامي ٨ ساعات علشان تصحي مرتاحة ووشك منور ومش باين عليه أي تعب أو إجهاد.
اشربي مشروبات مهدئة للجسم والأعصاب!
على سبيل المثال الجنزبيل، والنعناع، والينسون، والبابونج، وتجنبي شرب المنبهات اللي بتحتوي على كافيين مثل: النسكافيه، والشاي، والقهوة.
حافظي على الصلوات والشعائر الدينية
مع التوتر والتفكير الزيادة الرجوع لربنا هو أحسن حل، وحاولي تحافظي على الصلوات والأذكار علشان اليوم يعدي بسلام.
خللي الحنة قبل الفرح بكام يوم
مترهقيش نفسك وتعملي الحنة قبل الفرح بيوم لأنك حتكوني مرهقة جدا من المجهود والاحتفالات اللي حتعمليها أنتي وصحابك.
جهزي الشقة قبل الفرح بيومين على الأقل لأعصاب هادئة تماما!
متحاوليش تأجلي أي فرش في الشقة لحد قبل الفرح بكام ساعة لأن ناس كتير عملت كدة وندمت لأن وقتهم بقى ضيق جدا، فالأفضل هو أنك تنظمي شقتك قبل الفرح بوقت كافي علشان ترتاحي ومتكونيش تعبانة ومرهقة يوم الفرح، وبالتالي حتكون أعصابك هادئة ومرتاحة!
خللي معاكي أدوية طوارئ يوم الفرح
خللي معاكي بنادول أو أي دواء فيه باراسيتامول علشان لو حسيتي بأي ألم على سبيل المثال صداع أو ألم مفاجئ في أسنانك تكوني عاملة حسابك.
وخللي معاكي مساچ كريم علشان لو جالك أي شد عضلي من الوقوف الكتير أو عملتي أي حركة غلط تعرفي تتصرفي.
نصيحتنا الأخيرة ليكي حاولي تبحثي عن أي فرصة تخليكي في حالة هدوء وسكون وتخللي أعصابك هادية وفي حالة استرخاء.
اقرأ أيضا: أفخم فنادق شهر العسل في العالم.
اقرأ أيضا: فساتين جدة العريس لظهور مميز في فرح حفيدها.
هل محتوى المقال دة كان مفيد بالنسبة لك؟
نعم، مفيد!لا!
د. أمنية حسن
المقالات: 30
شغالين على حاجة جديدة
وهننطلق قريب اوي … استنونا