وضعيات صور للعريس وأصحابه أفكار مطرقعة وسهلة

معروف إن أكتر حد بيتظلم في صور السيشن هو العريس وأصحابه، عشان كدا هنقولكم وضعيات صور للعريس وأصحابه ينفع تتصورها مع أصحابك في لوكيشن التصوير أو في قاعة الفرح، تقدر من خلالها تعمل صور حلوة زي العروسة وأصحابها.

أفكار وضعيات صور للعريس وأصحابه في الفندق

وقت استعدادك للفرح دا أكتر وقت تقدر تاخد فيه صور حلوة مع أصحابك، بتكون الصور وقت استعدادك ولبسك، وكمان بعد ما تقابل العروسة.

تحضيرات العريس بداية اليوم

هنا بيكون الأصحاب متواجدين غالبًا بيستعدوا معاك للفرح، ولو في حلاقة جماعية ممكن صوره ليها هتكون مميزة جدًا. أو حد من أصحابك يتصور كأنه هو اللي بيحلق لك، أو تسريح الشعر. اللقطات دي كل ما كانت عفوية هتكون لطيفة جدًا ومثالية جدًا للاحتفاظ بيها للذكرى.

تصوير التفاصيل البسيطة

هنا بقى إنت مركز الصورة مش أصحابك، يعني هما هيظهروا في الصور بشكل جزئي، على سبيل المثال وإنت بتلبس القميص وحد يزرر. أو حد من الأصحاب يربط الببيون وباقي الأصحاب في الخلفية ظاهرين بشكل ضبابي. أو تلبيس جاكيت البدلة وحد معاك بيلبسك، كل الوضعيات بيظهر فيها الصاحب بضهره لكنها بتكون ذكرى لطيفة.

تصوير جماعي مع الأصحاب

لو متاح في الفندق بلكونة أو حتى شباك، هتقدر تتصور معاهم صور حلوة خاصة لو في ضوء شمس في المكان. في البلكونة هتقفوا جنب بعض كلكم من الجنب وإنت في وسطهم أو في بدايتهم. تقدر تتصور تاني إنك تقف بشكل مستقيم وأصحابك على الجانبين بشكل مستقيم وكأنهم خلفية وراك.

من ناحية تانية ممكن الصور تبقى عفوية وفيها ضحك وبدون وضعيات محددة. ضروري يكون الفوتوجرافر مركز مع انفعالاتك وضحكك مع أصحابك ويتلقط صور عشوائية.

وضعيات صور للعريس وأصحابه في لوكيشن التصوير

طبعًا بأي شكل مهما كانت أفكار الوضعيات حلوة مش هتغطي على وضعيات صور العروسة مع أصحابها، خاصة لو في لون فساتين موحد. لكن هنحاول تاخد مع أصحابك صور مميزة، ممكن تطبق الأفكار دي على سبيل المثال:

• صور فيها حركة

هتظهر في الصورة وإنت بتتحرك كإنك ماشي ووراك أصحابك واخدين نفس وضعيتك. وبنفس الطريقة صورة فيها حركة عشوائية وضحك وبيحاولوا ياخدوا منك جاكيت البدلة أو الببيون. التركيز على اللقطات العفوية مهم جدًا لإن الشباب بطبعهم مش بيحبوا يقفوا واقفة ثابتة أو وضعية محددة للتصوير.

• صور على الدرج

لو في درج في لوكيشن التصوير هيكون مناسب جدًا إنك تتصور عليه مع أصحابك. بإنك توقف على أول درجة وأصحابك وراك واقفين نفس الواقفة أو كلكم موجيهن نظركم لناحية واحدة. أو إنك تقف على آخر درجة، وأصحابك واقفين تحت كأنهم منتظرين نزولك.

• صور جيمس بوند

ودي بقى من تريندات وضعيات صور للعريس وأصحابه، الاعتماد فيها على النظارات الشمسية. والوقفات الثابتة الواثقة وكأنهم عملاء سريين، وطبعًا دي فيها وقفات كتير جدًا. لكن كلها واخدة طابع الجدية والثبات وطاقم البِدل الغامق.

وضعيات صور للعريس وأصحابه في الفرح

طبعًا أحداث الفرح كلها قابلة للتصوير، لكن أكيد بتحتاج صور مظبوطة تميز فرحك وتقدر تشاركها مع أصحابك. ودي تقدر تنفذها بشكل بسيط ومميز جدًا، ممكن تطبق على سبيل المثال:

• صور قدام الكوشة، هتكون واقف وسط الأصحاب وهما حولك بشكل نصف دائرة منحنية. يعني إنت في المقدمة وهما واقفين بشكل دائري للخلف.
• صورة وسط الفرح على الاستديج وهما رافعين إيديهم في الهواء بصقفوا حواليك.
• صورة أساسية طبعًا وهما بيرفعوك لفوق وتتلقط الصورة وإنت طاير في الهوا.
• هتتصور قدام العروسة وهي واقفة وإنت أصحابك بيشدوك بعيد عنها.

أفكار وضعيات صور للعريس وأصحابه مطرقعة

كل ما يخطر على بالك أو بال أصحابك من وضعيات تصوير مطرقعة حاول تنفذها. لإن فعلًا صور اليوم دا مش هتكرر تاني، وهنا نقترح عليك مثلًا:

• لو إنت شخص رياضي وأصحابك رياضيين ممكن تتصور صورة ليها علاقة بالرياضة اللي بتلعبوها أو صورة بتيشرت النادي اللي بتشجعوه.
• لو في عدد عربيات في الفرح مع أصحابك هتترص العربيات بشكل نصف دائري للخلف وإنت وأصحابك قدام العربيات.
• تتصوروا مع الشماريخ والدخان الملون بشكل عشوائي وعفوي.
• صور باستخدام اكسسوارات كوميدية زي النظارات العملاقة، أو قبعات ملونة.

المهم بأي شكل لازم تتصور كتير مع أصحابك لإنك مش هتبقى عريس كل يوم. وتقدر تنفذ كل اللي قولناه من وضعيات صور للعريس مع أصحابه بدون أي جهد، اتفق مع حد من أصحابك وهو يساعدك في تنفيذها.

اقرأ أيضًا: أفكار هدايا رومانسية للعروسة بسيطة لكن مميزة.

اقرأ أيضًا: أماكن بيع بدلة الفرح في القاهرة والجيزة.