“هوليوود سمايل”… نصائح ليك للعناية بالأسنان قبل الفرح

زي ما العروسة بتهتم بكل التفاصيل في التجميل على أكمل وجه، لازم أنت كمان تعمل حاجة جديدة علشان تشعر بالتغيير وتطلع شوية من أجواء ضغوطات المصاريف، وعشان تكون في أحسن مظهر في عين عروستك، والأهم أنك تهتم بصحتك، فلازم تحط في أولوياتك العناية بالأسنان عشان تديك ثقة في نفسك أكتر.

النهاردة حنقولك شوية نصائح لعناية أسنانك، وسهلة جدا، وتقدر تعملها في أي وقت وتخليها روتين أساسي في حياتك لصحة أفضل.

غسل الأسنان 

اهتم بغسل أسنانك يوميا مرتين، والمرة التانية تكون قبل النوم بمدة صغيرة، وحاول تستخدم معجون أسنان يحتوي على مادة الفلورايد. لو استمريت على العادة دي مش حتحس برائحة فم كريهة. 

غيّر فرشاة أسنانك بشكل دوري

يفضل أطباء الأسنان تغيير الفرشاة كل 3 شهور، ودة عشان تتجنب حدوث عدوى بسبب البكتريا اللي ممكن تنمو على سطحها. 

خيط الأسنان 

لازم يكون معاك دايما خيط الأسنان، واللي حينضفها من بواقي الأكل اللي ممكن تسبب تسوس مع الوقت، وعدوى. 

التدخين والعناية بأسنانك

التدخين بيعمل مشاكل كبيرة في الأسنان زي:

• تغير لون الأسنان. 
• مشاكل في اللثة. 
• تلف في جذور الأسنان. 
• فقدان الأسنان بعد مدة. 
• سرطان الفم. 

الاهتمام بالأكل الصحي

الأكل الصحي من العوامل الرئيسية للعناية بالأسنان، لأنه بيحافظ على أسنانك وعلى جسمك من أمراض كتيرة تصيب الفم. 

ايه الأطعمة اللي ممكن تساعدك على العناية بأسنانك؟

• خضراوات وفواكه تحتوي على ألياف. 
• منتجات الألبان لأنها تحتوي على كالسيوم. 
• الشوكولاته الداكنة. 
• السالمون لاحتواءه على أوميجا 3، وفيتامين د، وكالسيوم. 
• الثوم، واللي يعتبر مضاد للبكتيريا لاحتواءه على مادة الأليسين أو Allicin. 
• اللوز لاحتواءه على البروتين والكالسيوم. 

الابتعاد عن المحليات الصناعية

اللبان، والبونبوني، والمياه الغازية من الحاجات اللي لازم تقللها خالص، والأفضل البعد عنها، ودة لأن السكر اللي فيها بيدمر الأسنان وبيضعفها على المدى البعيد، خصوصا لو أنت مش مهتم بأسنانك أوي. 

غسول الفم و العناية بالأسنان

غسول الفم من الأغراض اللي لازم تكون عندك، ودة لأنه بيحافظ على الأسنان من وجود أي عدوى بكتيرية، بس خللي بالك لازم تستخدمه تحت إشراف الطبيب في حالة وجود مشكلة في أسنانك زي: خراج أو التهابات ، ودة لأن زيادة فترة استخدامه ممكن يسبب قرح للفم لاحتواءه على الكحول والفلورايد. 

عيادة الأسنان 

حنقف هنا حبة لأن دة موضوعنا الأساسي، عيادة الأسنان من الأماكن اللي لازم تروحها بشكل دوري علشان تطمن على صحة أسنانك، وهنا حقولك كمان ليه تروح عيادة الأسنان قبل الفرح. 

تبييض الأسنان

سمعنا كتير عن “هوليوود سمايل” ، ومعناها أنك تروح للدكتور، ويعملك تبييض للأسنان، وتظبيط شكل الأسنان خصوصا لو فيها فراغات واضحة، والخطوة دي تبدأ بإزالة الجير، وخطوات تانية علشان تخلي أسنانك بيضاء وبتلمع. 

إزالة الجير من أهم طرق العناية بالأسنان

ممكن تروح لطبيب الأسنان لإزالة الجير بس، ومش شرط أنك تعمل تبييض، ودة لأن إزالة الجير من الحاجات اللي حتفرق جدا في شكل أسنانك، وينصح الأطباء بعمله كل 6 شهور لنتائج أفضل لأنه من العوامل الأساسية للعناية بالأسنان. 

تقويم الاسنان 

ودة من الخطوات الضرورية، خصوصا لو الأسنان فيها فراغات واضحة وملفتة، أو فيه أسنان مش في مكانها الطبيعي، فدور التقويم هو تعديل وضع الأسنان أو الضروس. 

ما هي عيوب تقويم الأسنان؟

من عيوبه أنه بياخد مدة طويلة ومحتاج صبر والتزام بتعليمات الدكتور، واللي لو متنفذتش ممكن تخليك تعيد كل الخطوات من أول وجديد، وكمان لازم تاكل أكلات معينة تكون خفيفة على الأسنان. 

العناية بأسنانك تبدأ بمكافحة التسوس

وهو من الأمور الضرورية جدا في الاهتمام بصحة أسنانك، لأن عدم الاهتمام بعلاج التسوس بيعمل مضاعفات خطيرة، وبتاخد وقت طويل في العلاج. 

اقرأ أيضا: خطوات التخطيط للفرح خطوة بخطوة 

اقرأ أيضا: ازاي تهتمي بنقاء ونضارة البشرة قبل الفرح؟