هدية عيد الجواز الأول لعروستك… يا ترى هتجيب لها ايه؟

عدت سنة بكل ما فيها، وجاية سنين كتير أحلى من اللي قبليها، وفي الوقت ده أكيد بتفكر تجيب ايه هدية عيد الجواز الأول لعروستك؟

أكيد مريتوا بمواقف كتير مع بعض طول السنة دي كان فيها صعود وهبوط لعلاقتكم.

وزي ما قضيتم وقت حلو مليان حب ورومانسية أكيد برضه كان في أوقات كان فيها سوء فهم وخلافات.

لكن من الواضح انكم قدرتم تعدوها بصبركم وحبكم لبعض، والدليل إنكم خلاص أهو بتحتفلوا بعيد جوازكم.

وبتفكر تجيبلها ايه هدية عيد الجواز الأول.

وأكيد عايز تعبر لها في الهدية دي عن حبك ليها وتقديرك لمجهودها في محاولة فهمك وتقريب نقط التفاهم بينكم.

وعشان كدة إحنا هنا، عشان نساعدك ونفكر معاك في الهدية اللي تقدر توصلها كل مشاعرك الحلوة دي.

وفي المقال ده جبنا لك شوية أفكار ممكن تستعين بيهم وانت بتختار هديتك.

وبرضه تقدر تخرج عنهم وتشوف لو هي كان نفسها في حاجة معينة واتكلمت عنها قدامك وعبرت عن رغبتها فيها.

فساعتها دي هتكون هدية مثالية جداً تعبر لها عن مدى اهتمامك بيها.

وإنك بتفتكر كل حاجة هي بتقولها وبتهتم بكل رغباتها.

مجوهرات هدية عيد الجواز الأول لعروستك:

طبعاً مفيش حد ميعرفش قد ايه الستات بيحبوا المجوهرات والإكسسوارات.

فأكيد مش هيبقى في أحسن منها تختاره كهدية ليها في أول عيد جواز ليكم، لكن ده مش معناه إنك لازم تجيب طقم ألماظ مثلاً أو طقم دهب تقيل غالي زي الشبكة.

إلا لو كانت إمكانياتكم المادية عالية وتسمح بده، أما في الأحوال العادية وبالنسبة للطبقات المتوسطة عموماً هيبقى كفاية حاجة دهب بسيطة خفيفة زي حلق بسيط أو خاتم صغير أو أنسيال رقيق.

ولو إمكانياتك المادية متسمحش بالدهب ممكن تستبدله بالفضة أو ببدائل الدهب اللي بقت متاحة في محلات الإكسسوارات.

والبدائل دي عادة بتكون مصممة من خامات استانلس نضيفة مبتصديش، وشكلها وتصميمها بيكون مشابه جداً للدهب.

وممكن تضيف لمسة خصوصية على هدية عيد الجواز الأول من المجوهرات بإنك توصي على تصميمها مخصوص ليكم.

وده بإن يكون محفور عليها أساميكم أو تاريخ جوازكم أو الاتنين.

وكمان ممكن تطلب لها سلسلة أو عقد يكون عليه صورة صغيرة ليكم مع بعض.

أدوات تجميل:

أكيد خلال السنة اللي عدت دي كلها شفتها بتقضي وقت طويل قدام مرايتها وهي بتتزوق.

وده سواء وهي قاعدة في البيت بتحط كريماتها اللي بتحافظ بيها على بشرتها أو وهي خارجة بتحط مكياجها.

فأكيد مش هيبقى في هدايا ممكن تجيبها لها أسهل من هدايا أدوات التجميل اللي هي بتحبها وبتستخدمها طول الوقت.

وكل اللي عليك تعمله بس إنك تركز في الحاجات اللي هي بتستخدمها وتاخد أساميها وتشتري لها مجموعة جديدة منها.

وممكن برضه في النقطة دي لو هتوه في أدوات التجميل النسائية تكتفي بإنك تجيب إزازة برفان من ماركة كويسة هي بتحبها وبتفضل تستخدمها.

الزهور:

ومين قال إن هدية عيد الجواز الأول لعروستك لازم تكون غالية للدرجة اللي تفلسك فيها؟!

الستات كائنات أبسط من كدة بكتير، وعشان كدة تقدر تعبر عن حبك واهتمامك بشريكة حياتك ببوكيه ورد بسيط.

كل اللي عليك بس إنك تعرف نوع الورد المفضل اللي هي بتحبه، أو تحاول انت تفهم لغة الورود وتختار بوكيه كل وردة فيه بتعبر عن حاجة انت عايز تقولها وحاسسها.

ولو عروستك بتحب الورد فعلاً وزراعته والاهتمام بيه؛ فممكن بدل ما تجيب بوكيه ورد هيدبل بعد كام يوم ويموت.

لا انت ممكن تجيب لها إصيص ورد تهتموا بيه مع بعض وتسقوه كل يوم زي ما بتسقوا حبكم، ويكبر معاكم يوم بيوم.

وبكدة يبقى شاهد حي على حبكم طول الوقت قدام عينيكم، وده كمان هيخليكم كل ما يحصل خلاف بينكم وتشوفه قدامكم يفكركم بلحظات جميلة تنسوا بسببها الخلاف.

هدية عيد الجواز الأول لعروستك ممكن تبقى وقت حلو تقضوه مع بعض:

ومش لازم الهدية تكون هدية مادية تمسكها في ايدها، ممكن الهدية تبقى وقت حلو وذكريات جميلة تعيشوها وتقضوا فيها اليوم ده.

فممكن تعزمها على عشا رومانسي في مطعم شيك أو في مكان مفتوح وتقضوا الليل تتأملوا في السما والنجوم وتفتكروا لحظات حبكم وتعارفكم الأولى.

أو ممكن تاخدها في رحلة يومين تلاتة تغيروا جو سواء جوة مصر أو برة مصر على حسب إمكانياتك.

وممكن تبقى الرحلة في نفس المكان اللي قضيتوا فيه شهر العسل، وبكدة تعيدوا ذكريات شهر العسل من تاني.

أما لو إمكانياتك المادية مش هتسمح بده؛ فممكن حتى تعمل لها الجو ده في البيت.

استغل وقت متكونش هي فيه موجودة أو حاول تقنعها تخرج تزور أهلها أو اتفق مع واحدة صاحبتها مقربة ليكم انها تاخدها تخرجها.

وجهز البيت بديكورات احتفالية جميلة، وحضر لها عشا رومانسي، سواء عملته بايدك لو بتعرف تطبخ، أو تطلبه جاهز من برة.

وفاجئها بده أول ما ترجع من خروجتها، وهتقضوا يوم جميل عمرها ما هتنساه أبداً.

ولو عندك إمكانية إنك تعمل ده على سطح بيتكم؛ فده هيدي جو رومانسي وحميمي أكتر، وتسهروا طول الليل تتأملوا في النجوم وانتم بتتغزلوا في بعض.

وفي نهاية المقال نتمنى إننا نكون قدرنا نقدم لك أفكار مفيدة تقدر تستغلها وانت بتختار هدية عيد الجواز الأول لعروستك.

ونتمنى أن أول عيد جواز ليكم مع بعض يكون بحلاوة أول يوم قضيتوه مع بعض، ويكون بداية جديدة لحياة حلوة جاية قدام كلها حب وهنا وسعادة.