موضة مكياج العرايس اتعرفي على أجدد الاتجاهات فيها معانا

زي كل حاجة في التخطيط للفرح لازم تكوني عارفة نوعية المكياج اللي عايزاه لليوم ده، وعشان كدة لازم تعرفي أجدد الاتجاهات في موضة مكياج العرايس عشان تقدري تختاري منها المناسب ليكي.

واختيار المكياج المناسب ليكي هيكون فرصة ممتعة تقدري تحققي من خلالها الدمج بين الموضة السارية دلوقتي مع لمسة من أسلوبك الشخصي اللي تحبي تظهري بيه، وسواء كنت بتحبي المكياج العصري أو الكلاسيكي؛ فإنك تعرفي ايه هي أجدد الموضات في الوقت الحالي دي حاجة هتساعدك جداً في إنك تحددي الاستايل المناسب ليكي.

فبعد كدة لما تختاري الميك أب أرتيست اللي هتنفذ لك المكياج هتكوني عارفة إنت عايزة ايه بالظبط.

ومش هتضيعوا لسة وقت في إنكم تختاروا المظهر المناسب وتجربوا حاجات انت مش محتاجاها.

وعشان كدة احنا هنا في المقال ده جمعنا لك كل الأساليب والاتجاهات الموجودة حالياً عشان تقدري تختاري منها.

وسواء كان ستايلك بيعتمد على الشفايف الجريئة أو الألوان المعدنية المودرن أو الحواجب المحددة.

ففي طرق كتير تقدر تاخد مظهرك لمستوى أعلى من الجمال والأناقة في يوم فرحك، وكمان يسمح لجمالك الطبيعي انه يكون هو البطل الظاهر أكتر من أي حاجة تانية.

فتابعي معانا المقال عشان تعرفي كل التفاصيل اللي هتقدر تساعدك في اليوم ده.

توهج المظهر الطبيعي:

في الفترة الأخيرة بقى فيه تقدير أكبر للجمال الطبيعي في العالم.

وفي وسط عالم مليان بالفلاتر والتزييف على السوشيال ميديا زادت الناس اللي بتدور على مظهر طبيعي مش مغشوش.

وده خلى موضة مكياج العرايس في الفترات الأخيرة تعتمد على المظهر الطبيعي.

فبقت بتحاول تبروز جمال العروسة الطبيعي أكتر من كونها تغير مظهرها بالمكياج.

وده بيتم عن طريق استخدام ألوان محايدة مبتلمعش على العيون، وإبراز عضمة الخد، وتظبيط الحواجب.

مع كونتور ناعم جداً ولمسة ناعمة من أحمر الخدود، وروج بلون محايد برضه أقرب للطبيعي.

ولو رموشك قصيرة فممكن تركبي رموش تديها طول شوية، أما لو طولها مناسب؛ فممكن تكتفي بإنك تفرديها بالماسكرا.

موضة مكياج العرايس بتعتمد على ستايل عيون الثعلب:

والموضة دي من المكياج انطلقت أصلاً من التيك توك.

وبقى بيتم اعتمادها دلوقتي بشكل واسع في فنون الميك أب وخصوصاً في الأفراح.

وهي أصلاً بتعتمد على المكياج الناعم في الوش والتركيز بصورة أكبر على العينين، واللي بيترسم عليها خط علوي بالآيلانير.

وبعد كدة بيتم استخدام الآيشادو على شكل شريط خارج لبرة بزاوية بفرشاة صغيرة.

وكمان بنستخدم رموش صناعية يكون أطول جزء فيها عند الحافة الخارجية من العين.

مظهر البشرة النضرة المنتعشة:

في اتجاه حالياً في موضة مكياج العرايس ان المكياج يظهر نضارة البشرة وشبابها، وده معناه استخدام المكياج الطبيعي اللي مبيلمعش.

ولكن ده بيبقى تحدي في انك تختاري ميك آب أرتيست محترفة عشان تقدر تحدد نوع بشرتك.

وكمان تقدر تعرف ايه المستحضرات اللي تستخدمها معاها عشان المظهر ميبوظش في الآخر.

ومش بس نوع البشرة هو الفيصل في الاختيار، كمان طبيعة الجو بشكل عام، والجو في مكان الفرح بشكل خاص.

هل هيكون في مكان تهويته جيدة ولا لا؟ مكان مقفول ولا مفتوح؟ هيبقى فيه رطوبة وحر ولا لا؟

لإن في النهاية لو فيه أي غلطة بسيطة ممكن المظهر ميبقاش مظهر بشرة نضرة ومنتعشة.

وإنما مظهر بشرة دهنية بتنشع زيت.

استخدام الهايلايت في موضة مكياج العرايس:

الهايلايت عامة بيساعد على إبراز توهج البشرة وبيدي لمحة من الجمال والنضارة على المظهر الخارجي للمكياج.

لكن برضه مشكلته في قدرتك على تحديد المنتج المناسب لبشرتك.

لإن لو البودرة المستخدمة فيه مكنتش مناسبة لبشرتك أو زادت شوية؛ فممكن تعمل ارتداد للضوء في الكاميرا خلال التصوير.

وساعتها وشك هيظهر منور زيادة عن اللزوم بس شبه الأشباح كدة.

وكمان ممكن زيادة الهايلايت على بشرتك تديكي مظهر دهني بيلمع ويظهر في الصور.

فلازم تكوني حريصة في النوع والكمية اللي بتستخدميهم.

وفي نهاية المقال نتمنى إننا نكون فدناكي وقدرنا نعرفك موضة مكياج العرايس اللي تقدري تختاري منها اللي يناسب مظهرك وشخصيتك.

ونتمنى لك فرح سعيد وبداية حياة جديدة سعيدة مليانة حب وفرح وهنا.