موضة ألوان المطابخ اتعرفوا عليها قبل ما تدهنوا شقة الزوجية

موضة ألوان المطابخ اتغيرت في الفترة الأخيرة عن السنين اللي فاتت، ده سواء كان لون الحيطان أو ألوان عفش المطبخ وأجهزته.

طبعاً بيبقى من الصعب إننا نغير دهانات وألوان العفش كل فترة عشان نمشي على الموضة.

لكن ما دمنا لسة بنظبط بيتنا الجديد لأول مرة فدي فرصة كويسة إننا نمشي على الألوان الموضة الموجودة دلوقتي.

وبكدة نكسب وقت إن على ما تتغير الموضة نكون احنا عاصرناها فترة طويلة، وعشان كدة احنا جمعنا لكم في المقال ده كل حاجة متعلقة بألوان المطابخ؛ فتابعوا معانا.

موضة ألوان المطابخ في الدهانات:

اللون الخشبي الطبيعي هو اللون المنتشر حالياً بشكل كبير في تصميمات المطابخ، وممكن نستخدم معاه صبغة خفيفة بس من غير ما تغمق لونه بشكل واضح.

كمان من الألوان المنتشرة في الفترة الحالية سواء في المطبخ أو في مكونات عفش البيت التانية هو اللون الخشبي الميال للرمادي.

واللون ده بيجمع بين البني الفاتح أو البيج مع اللون الرمادي، وميزته انه بيليق على الاستايلات المتنوعة للعفش سواء كان مودرن أو معاصر أو ستيل حديدي يعني.

ومن الألوان الموضة جداً الفترة دي هي الألوان اللي بيتقال عليها ألوان متربة وهي ألوان الأخضر والأزرق في درجاتها الغامقة اللي بيتضاف ليها لون رمادي.

وبيتقال عليها متربة لإن إضافة اللون الرمادي ليها بيخليها تبان بشكل مش زاهي وكإنها مخلوطة بتراب.

الألوان دي بيبقى اسمها ميوتيد واسمها بالانجليزي muted colors.

أما الألوان المحايدة زي الأبيض والبيج والرمادي؛ فدي ألوان مستمرة موضتها مبتموتش أبداً، وبتليق دايماً على أي نوع من ستايلات المطابخ.

فلو عاوزين لون يليق على كل موضة، وعلى أي نوع عفش وتصميم تختاروه، ومتحسوش انكم عايزين تغيروه كل فترة فممكن تختاروا لون منهم.

الألوان في وحدات المطبخ:

وحدات المطبخ دي اللي هي مكونات المطبخ ودواليبه، وفي الفترة الحالية الموضة فيها هي انها بقت ستايل صناعي بشكل أساسي مع شوية ستايلات مودرن أو معاصر.

وشكل درف المطبخ في الوقت الحالي بتتميز إنها سادة فلات من غير أي تفاصيل إضافية.

وكمان في الدرف الشيكر اللي هي نوع من الدرف فيها إطار خشبي حواليها من غير تفاصيل تانية في تكوينها.

أما قرصة المطبخ اللي هي قطع الرخام اللي بتكون عند الأحواض والترابيزات، موضة ألوان المطابخ فيها بتعتمد على مواد تكوينها.

فالموضة في قرصة المطبخ الفترة دي إنها تكون من الخشب المعالج أو الكوارتز أو البورسلين.

موضة ألوان المطابخ في أجهزته:

طبعاً من أهم أجهزة المطبخ وأدواته هي الحوض أكيد، والموضة الفترة دي هو تغيير موضة الأحواض الستانلس ستيل بالأحواض النحاس.

كمان من موضة الأحواض في الفترة دي هي الأحواض الجرانيت، وتكون ألوانها سودا أو رمادي.

أما خلاطات الأحواض وحنفياتها فالموضة فيها الفترة دي هي إنها تكون باللون الأسود المطفي أو الألوان النحاسية.

وبعد كدة بالنسبة لأجهزة المطبخ الكهربائية؛ فدلوقتي بقت الموضة الأجهزة اللي على شكل أدراج واللي بيتم دمجها وسط قطع المطبخ ورفوفه.

فدلوقتي بقى في أجهزة مايكروويف وتلاجات على شكل أدراج لما بتتحط وسط المطبخ بتبان وكإنها جزء من الديكور الأساسي للمطبخ.

وفي نهاية المقال نتمنى نكون قدرنا نجمع لكم كل الجديد في موضة ألوان المطابخ اللي ممكن تفيدكم في اختيار الألوان المناسبة لمطبخكم الجديد في شقة الزوجية.

ونتمنى انكم تتابعونا في مقالاتنا الجاية وتشوفوا مقالاتنا السابقة اللي ممكن برضه تفيدكم في اختيار تصميمات وألوان بقية أوض بيتكم الجديد، وألف مبروك مقدماً.