مواضيع يجب مناقشتها قبل الزواج لحياة مستقرة

الزواج هو بناء حياة طويلة الأمد مع شخص غريب عنك، علشان كده اتعملت فترة الخطوبة. وال لازم تستغلها علشان تقدر تقرر إن كان الشريك ده مناسب ليك وقريب من توقعاتك أو لأ. علشان كده جمعنالك أهم مواضيع يجب مناقشتها قبل الزواج لحياة مستقرة.

اهم أسئلة قبل الخطوبة

في فترة التعارف وقبل الخطوبة لازم تكون وتكوني عارفين اهم أسئلة قبل الخطوبة، وإيه هي اهم مواضيع يجب مناقشتها قبل الزواج. ومن هنا تقدروا تقرروا إن كان الشخص ده مناسب للزواج أو لأ.

القيم والمبادئ مواضيع يجب مناقشتها قبل الزواج

القيم والمبادئ ال بيعتمد عليها الشخص في تصرفاته عمومًا، والقيم الأخلاقية ونظرته للمجتمع والتصرفات ال بتحصل من الغير زي مثلًا:

• رأيه في شغل المرأة وإنفاقها على البيت معاه، وبرضه الرد بيعتمد على ظروفه هو المادية إن كانت ظروفه كويسة ومقتنع إن لازم تشتغلي وتدفعي زيك زيه في البيت. هنا طبعًا لازم تهربي.
• أفكاره ومعتقداته عن العيلة والخصوصية، وطبعًا مش محتاجة شرح! العيلة واجب عليكي احترامها وكذلك واجب عليهم احترامك، وليكي خصوصيتك في بيتك.
• معتقداته وتفكيره تجاه المشاكل العامة زي التحرش والسرقة والانتحار والبلطجة…. الخ.
• معتقداته الدينية ودي أهم نقطة، ومدى قربه من ربنا وفهمه لكلام الله تعالى ورسوله صلى الله عليه وسلم.

مناقشة الشؤون المالية قبل الزواج

طبيعي العلاقة الزوجية بيكون الراجل فيها قوام على الست، وحسب الدين الإسلامي والقرآن الكريم ان القوامة بتكون بالإنفاق عليها وبالقوة الجسدية ليه لتحمل العمل وكده.

علشان كده معرفة الشؤون المالية من أهم مواضيع يجب مناقشتها قبل الزواج. معرفة شغل العريس، وراتبه وقدرته على إدارة أموره المالية، والإنفاق على بيت وأسرة.

مسكن الزوجية

من الحاجات المهمة طبعًا تعرفي تفكير الشخص ال متقدملك عن مسكن الزوجية هل موجود مسكن خاص، أو هيكون فيه إيجار. هل الجواز في بيت عيلة، أو شقة منفصلة؟

اتكلموا عن مراحل تشطيب الشقة، وعدد الغرف والتصميمات ال هتختاروها مع بعض. واعرفوا أفكار بعض حوالين التجهيزات والأجهزة والعفش وكل ما يخص عش الزوجية.

معرفة التجارب السابقة

لأن الحياة مشاركة، ولأن الوضوح والأمانة لازم تكون البداية الصح لأي علاقة. ضروري يكون السؤال عن التجارب السابقة من مواضيع قعدة التعارف.

طبعًا علشان يكون في مصداقية، وتجنبًا لأي مشاكل أو سوء فهم في أي مرحلة جاية. خصوصًا من أشخاص ممكن يكونوا عاوزين يبوظوا الجوازة.

الطموح

كويس ان الشخص ال هنرتبط بيه يكون عنده طموح ويسعى لتحقيق ذاته، لأن ده هيساعد في تنمية العلاقة بينكم. زائد انه هيقدر يوفر مناخ صحي للعيلة، ويقدر يربي اطفال طموحي ويكون مثل أعلى ليهم.

مواضيع أساسية يجب مناقشتها قبل الزواج

الزواج والحياة بين شخصين بتستمر من خلال التفاهم، والاتفاق وكمان تبادل الأفكار والمشاعر. علشان كده لازم تعرفوا ايه اهم مواضيع يجب مناقشتها قبل الزواج زي:

• المسؤوليات وإدارة البيت والحياة الزوجية هتتم ازاي، وإيه فكرة كل شريك عن مسؤوليات الزواج.
• طرق التفكير وحل المشكلات، علشان تكونوا فاهمين شخصيات بعض، وتقدروا ترسموا خطة تقريبية للحياة بينكم.
• حدود الخصوصية الزوجية والمعيشة، ومدى تدخل الأهل في قرارات كل شريك منكم.
• التعليم والوظيفة.
• التفكير في الأطفال وطرق تربيتهم.
• المشاكل النفسية أو المرضية عند كل شريك منكم لو وجدت، علشان يكون فيه مصداقية.
• الاتفاق على الاحترام المتبادل والصدق في التعاملات، والحفاظ على الخصوصية بين الطرفين في المشكلات أو سوء الفهم.

في النهاية احب أوضح أن مراحل الزواج متعددة، ومخالفة عن بعضها، وطبعًا كل مرحلة لها مشاعرها وتفكيرها وأولويتها. لكن دائمًا خلي النظرة الأبعد هي المحكمة في القرارات ال هتاخدها اوهتاخديها.

وكونوا على مستوى من الفهم أن الجواز شيء فترة الخطوبة شيء. الجواز مسؤولية لازم تكون قدها قبل ما تخطي خطوة فيها.