منتجات تجميل لازم تكون على تسريحتك وفي شنطتك

أكتر حاجة بتهتم بيها أي عروسة أنها تجيب منتجات تجميل أو كوزمتكس مناسبة لبشرتها، بالإضافة أنها لازم تحافظ على روتين يومها، وعشان كدة بنلاقي أسئلة كتيرة على الجروبات بخصوص الموضوع دة. النهاردة حقولك تستخدمي إيه، وازاى تختاري المنتج المناسب لبشرتك. 

الغسول هو أهم منتج تجميل لازم يكون عندك

من أساسيات منتجات التجميل، واللي ممكن تكتفي بيه مع المرطب في روتين يومك. يعمل على تنضيف البشرة بشكل عميق، والأفضل تستخدميه مرتين صباحا ومساءا قبل النوم. 

المرطب

المرطب هو أهم منتجات التجميل، لأنه يحافظ على ترطيب البشرة علشان ميحصلش جفاف بسرعة، واللي بينتج عنه بهتان في البشرة. يفضل استخدامه مرتين في اليوم. 

المرطب ونوع البشرة

• في حالة البشرة الدهنية أو المختلطة: حاولي تختاري مرطب على شكل چيل، لأنه خفيف جدا على البشرة ونتايجه حتكون كويسة جدا، بالإضافة أن فيه كمان مرطبات بيكون مكتوب عليها كلمة hydra هي عبارة عن كريم بس بيكون خفيف ولطيف على البشرة. 

• في حالة البشرة الجافة: استخدمي مرطب على شكل كريم، لأن قوامه تقيل شوية، وبيساعد البشرة الجافة على استعادة ترطيبها ومرونتها بسهولة. 
• في حالة البشرة العادية: الكريم أو اللوشن أو الجيل الاختيار الأمثل لبشرتك، بس شوفي الأنسب منهم ليكي واستمري عليه. 

واقي الشمس.. منتج تجميل مهم خصوصا في فصل الصيف

واقي الشمس أو الصن سكرين أهم حاجة في شنطتك طول الصيف. بتحطيه قبل الخروج بربع ساعة وتجدديه كل ساعتين. 

ازاي أعرف واقي الشمس المناسب ليا؟

• استخدمي واقي شمس جيل أو اللي مكتوب عليه كلمة fluid أو dry touch لو بشرتك دهنية أو مختلطة، واللي بيكون ملمسهم خفيف جدا على البشرة. 
• استعملي واقي شمس كريم أو لوشن لو بشرتك عادية أو جافة.

مرطب الشفاه lip balm

وجوده مهم أوي في شنطتك، وبالأخص في فصل الشتاء أو لو عندك جفاف شديد. وحتلاحظي الفرق في نضارة شفايفك. 

لوشن الجسم

البادي لوشن عبارة عن كنز عند أي عروسة، والأفضل هو الاستخدام على بشرة رطبة عشان تلاحظي النتيجة في نفس اللحظة. حاولي تستخدمي أنواع فيها مكونات بترطب ترطيب عالي زي الألوفيرا أو الجليسرين أو زبدة الشيا. 

مزيل العرق

مزيل العرق لاغنى عنه صيف أو شتا. استخدمي نوع مناسب لبشرتك عشان ميحصلش حساسية أو اسمرار في منطقة الإبطين، وحاولي تشتري الأنواع الطبية مش العادية وحتلاحظي فرق رهيب في ريحة جسمك، ورطوبة الإبطين.

ولأنك دايما عايزة تكوني في أحسن شكل، استخدمي كريم التفتيح عند الضرورة لمدة 3 شهور على الأقل في الأماكن الغامقة في جسمك أو لعلاج آثار الحبوب. ونصيحتي استعملي المنتجات اللي فيها مستخلص العرقسوس أو ألفا أربيوتين أو حمض الكوجيك. 

سكراب الجسم

عشان تحافظي على بشرتك نضرة ومنورة طول الوقت، حاولي تستعملي اسكراب مرة أسبوعيا، لإزالة الجلد الميت، ومع الوقت حتلاحظي أن جسمك بقى لونه أفتح. 

السيروم serum

حديثا بقى فيه سيروم للبشرة والشعر، واللي أثبتوا فعالية كبيرة للي استعملهم، والمهم أنك تختاري اللي بشرتك محتاجاه، يعني مش شرط تجيبي كل الأنواع اللي في الصيدلية لأنك ممكن تضري بشرتك. 

أنواع السيروم

هيالورونيك أسيد

• ترطيب البشرة. 
• تقليل التجاعيد والخطوط. 
• شد البشرة. 

فيتامين سي

• تفتيح البشرة وتقليل التصبغات. 
• زيادة لمعانها ونضارتها. 

النياسيناميد

• غلق المسام الواسعة. 
• تقوية حاجز البشرة. 
• ترطيب قوي. 
• حماية البشرة الحساسة من الأتربة وأشعة الشمس الضارة. 

مزيل الميك أب

مزيل الميك أب أو الميسلار مش شرط استخدامه في تنضيف البشرة من الميك أب، لكن له دور فعال في تنضيف البشرة من الأتربة. استعملي الأنواع اللي فيها زيت شجرة الشاى لأنها مضادة للبكتريا.

نصيحة مهمة لاختيار مناسب لمنتجات التجميل

مش شرط أنك تشتري منتجات تجميل كتير عشان تملي تسريحتك، الأهم أنك تستخدمي المنتجات اللي بشرتك محتاجاها، لأنك لو استعملتي كل دة في نفس الوقت ممكن بشرتك تتأثر بشكل سلبي. 

اقرأ أيضا: ازاى تهتمي بنقاء ونضارة البشرة قبل الفرح؟

اقرأ أيضا: تكاليف الزواج في مصر 2024