مناديل الجيب لبدلة العريس خمس أفكار لتحديد ايه المناسب ليك منها

يمكن إكسسوارات العريس والتفاصيل اللي تخص مظهره مش كتيرة زي العروسة، لكن برضه يفضل هو عريسنا المميز اللي لازم نكون حريصين على تميز مظهره في يوم زي ده، من أكبر التفاصيل لأصغرها، ومن التفاصيل الصغيرة اللي ممكن تضيف كتير لمظهره هي مناديل الجيب لبدلة العريس.

على الرغم من كون إن كتير ممكن يبصولها على إنها حاجة بسيطة ومش مهمة.

إلا إنها في الحقيقة قادرة على تغيير المظهر الخارجي للبدلة ككل.

عشان كدة أهم حاجة إنك تعرف تختار المناسب منها واللي يلائم مظهر بدلتك وطبيعة شخصيتك.

وكمان يتماشى مع جو الحفلة اللي اختارتوه.

لإن كل ده هيكون له تأثير في النهاية على المظهر العام لليوم كله مش بس مظهرك وحده.

وده سواء كان حفل جوازكم بسيط عبارة عن كتب كتاب أو إكليل في قاعة مناسبات في المسجد أو الكنيسة.

أو حفلة في قاعة أفراح كبيرة، وسواء كان في قاعة أفراح مغلقة أو في مكان مفتوح أو في باخرة في البحر أو النيل.

في جميع الأحوال هتحتاج تكون مطمن على مظهرك، وتكون متأكد إنه مناسب لجو الحفلة.

وإنك أكيد أكتر شخص أنيق في الحفلة.

أكيد مش هنحب يكون فيه واحد من الضيوف أكتر شياكة منك ويلفت الأنظار عنك.

وعشان كدة في المقال ده احنا جيبنا لك أفكار مختلفة تساعدك في اختيار مناديل الجيب لبدلة العريس اللي اختارتها لفرحك.

فتابع معانا المقال.

منديل جيب من الحرير المنقوش:

لو انت من محبي المظهر التقليدي فالمنديل ده هيكون مناسب ليك.

هيدي بدلتك الشياكة المطلوبة، وفي نفس الوقت هيحافظ على مظهرها التقليدي.

وكمان ميزة النوع ده من المناديل إنه هيخليك في الأمان لو انت بتتوتر من التغييرات والأفكار المطرقعة.

كدة انت ضامن إن مفيش أي حاجة في مظهرك ممكن حد يعلق عليها بالسلب.

وده غير إن الألوان والنقوش اللي على المنديل بتديله مظهر غني يخلي تأثيره أنيق جداً مع البدلة.

وبكدة انت مستعد لخطف الأنظار في يومك المميز.

منديل جيب أسود مع حافة بيضاء:

لو كنت اخترت لبدلتك لون تاني غير الأسود هيكون مناسب ليك إنك تختار مناديل الجيب لبدلة العريس لونها أسود.

والحواف البيضا فيه لما هتظهر منه هتكون عاملة توافق حلو مع لون فستان عروستك، وهتخلي شكله مميز مش مجرد منديل أسود سادة عادي.

مناديل الجيب لبدلة العريس من الحرير الملون:

أما في حالة إنك بتحب الألوان السادة؛ فتقدر تختار منديل بدلتك من الحرير بأي لون سادة تفضله.

سواء كان بنفسجي أو نبيتي أو أخضر نعناعي أو عسلي؛ فكل دي ألوان تليق مع أجواء الأفراح ومظهر بدل العرسان.

اختار اللون اللي يناسبك ويتوافق مع شخصيتك، وممكن كمان تختار لون يكون هو لون الزهرة الأساسية في بوكيه الورد اللي عروستك هتشيله في الفرح.

وبالطريقة دي تكونوا عاملين توافق في الألوان ما بينكم.

منديل جيب مزين بالزهور:

وكمان تقدر توفق بين منديل جيبك وجرافتتك بإنك تختار منديل جيب منقوش بالزهور اللي ألوانه من نفس ألوان الجرافتة.

وتقدر تختار في الحالة دي إن المنديل يكون من الكتان الخفيف، وده هيساعدك أكتر لو كنت حد بيتوتر في الضغوط وبتعرق طول الوقت من التوتر؛ فهتقدر تستخدمه فعلاً ومش هيبقى مجرد منديل لشياكة المظهر وبس.

مناديل الجيب لبدلة العريس بتصميمات عصرية:

أما لو كنت من أصحاب الأفكار المطرقعة وبتحب المظهر الغير تقليدي ومبتحبش تلتزم بالرسميات؛ فتقدر تعبر عن ده حتى في منديل جيبك اللي هتحطه في بدلتك يوم فرحك.

تقدر تختار منديل يكون بتصميمات مستوحاه من أفلامك المفضلة زي مثلاً خريطة المارودرز من أفلام هاري بوتر.

أو يكون عليه تصميمات مرحة زي أشكال لطيور وبط مع أرضية بألوان مبهجة زي البرتقاني والأحمر، وده هيكون مناسب أكتر لو الفرح في حديقة ومكان مفتوح.

وفي نهاية المقال نتمنى إننا نكون فدناك في اختيار مناديل الجيب لبدلة العريس المناسبة ليك، وتكون قدرت تحدد ايه اللي هتشتريه منها ليوم فرحك.

وألف مبروك مقدماً ونتمنى لك حياة زوجية سعيدة هنية مع اللي قلبك اختارها وتعيشوا العمر كله في حب وهنا وفرح.