مقاومة الأنسولين.. أسبابها و طرق علاجية مختلفة!

من الخطوات اللي لازم تعمليها قبل الزواج هو أنك تطمني على صحتك، وخصوصا لو عندك حب الشباب بكثرة وملحوظة، والدورة الشهرية غير منتظمة، ولو بتعاني من السمنة. واللي ممكن يكونوا عندك بسبب مقاومة الأنسولين. في المقال ده هنتكلم أنه ازاي بيحصل وازاي تتجنبي تكراره مرة تانية.

مقاومة الأنسولين

معناها أن جسمك مش بيعرف يتعامل مع هرمون الأنسولين واللي يتم إفرازه من البنكرياس، واللي بيخرج بمجرد ما بتاكلي وبيزيد لو أكلتي نشويات أو سكريات.

والنتيجة هي زيادة سكر الدم، والجسم مش بيعرف يستخدم السكر ده في إنتاج الطاقة ودخوله للخلايا المختلفة في الجسم، وبالتالي يتراكم في مناطق معينة في الجسم ويسبب مشاكل ومضاعفات.

اسباب مقاومة الأنسولين

1. عوامل وراثية: وهي عبارة عن جينات بتتنقل من جيل لجيل.
2. تناول طعام غير صحي على سبيل المثال يحتوي على دهون غير صحية، ونشويات بسيطة، وسكريات أيضا.
3. زيادة الوزن، وتراكم الدهون في منطقة البطن.
4. عدم ممارسة أي أنشطة بدنية.
5. بعض الأدوية.
6. مشاكل هرمونية على سبيل المثال: متلازمة تكيسات المبايض PCOS.

ممارسة الرياضة.. مش رفاهية!

الرياضة لها دور في بناء العضلات، والعضلات لها دور رئيسي في تخزين سكر الدم الناتج عن الأكل.

ما هي علاقة الهرمونات ومقاومة الأنسولين

لها دور سلبي في عدم توازن الهرمونات في الجسم، ويؤثر على:

• هرمونات الغدة الدرقية.
• الهرمونات الأنثوية المسؤولة عن انتظام التبويض والدورة الشهرية، وعمل المبيضين بشكل طبيعي.
• الهرمونات الخاصة بالنمو.

هل تؤثر على الخصوبة والإنجاب؟

سؤال بنات كتير بتسأله، وممكن تشوفي ده على مواقع التواصل الاجتماعي كتير، والإجابة أنه معظم الوقت بيأثر سلبا على الخصوبة، لأن زي ما قولنا بيكون فيه عدم توازن في الهرمونات الأنثوية، واللي ممكن تسبب تأخر في التبويض أو حدوث الدورة الشهرية.

حب الشباب ومقاومة الأنسولين

من العلامات اللي بتأكد للأطباء بشكل كبير احتمالية الإصابة بمقاومة الأنسولين هي ظهور حب الشباب بشكل غير طبيعي، ودة من توابع التأثير على هرمونات الذكورة (الأندروجينات)، وعدم توازنها في الجسم.

ازاي يتم التشخيص؟

الأطباء حتى الآن لم يجدوا طريقة تشخيص مباشر لمقاومة الأنسولين، لأن في جميع الأحوال بيكون إفراز الأنسولين طبيعي، ومش بيكون فيه أي تغيير غير طبيعي بالجسم.

وفي الحالة دي يلجأ الطبيب للتشخيص عن طريق عوامل مساعدة على سبيل المثال:

• التاريخ المرضي والعائلي.
• هل تمارسي الرياضة أو بتتحركي بانتظام ولا لأ؟
• هل عندك حب شباب كتير وخصوصا في منطقة الذقن ولا لأ؟

تحاليل تكشف عن مقاومة الأنسولين

1. تحليل سكر الدم العشوائي.
2. تحليل السكر التراكمي HBA1C لمعرفة مستوى السكر في الدم الثلاث شهور السابقة.
3. تحليل مخصص لمقاومة الأنسولين اسمه HOMA IR، ولكن الأطباء لا يكتفون به فقط.
4. تحليل الدهون الثلاثية والكوليسترول.

علاج مقاومة الأنسولين

• نظام غذائي صحي يحتوي على الألياف والنشويات المعقدة على سبيل المثال: الحبوب الكاملة، والشوفان، والخضراوات والفواكه.
• تناول بروتينات مثل الأسماك، والدواجن.
• التخسيس وخسارة الوزن.
• ممارسة الرياضة بانتظام على سبيل المثال: المشى والجرى.

تناول الأدوية

1. بعض أدوية السكر بيوصفها الأطباء للمريضة لفترة معينة.
2. علاج لتقليل الكوليسترول في الدم، وضغط الدم أيضا.
3. بعض المكملات الغذائية مثل: الكروميوم chromium، واللي له دور في التحكم في سكر الدم، وزيادة فعالية الأنسولين، وتقليل الوزن عن طريق تقليل دهون الجسم زي دواء كروميترونChromitron .
4. كريمات لعلاج حب الشباب، واستخدمي روتين قوي خاص بنوع بشرتك، وبنوع الحبوب الموجود على بشرتك بعد استشارة طبيب الجلدية.

لازم تعرفي أن مقاومة الأنسولين مش مرض إنما هو عرض بيظهر ويختفي حسب العادات اليومية اللي بتعمليها سواء الأكل أو ممارسة الرياضة، فحاولي تعيشي حياتك بطريقة صحيحة وصحية.

اقرأ أيضا: الرياضة وصحتك.. 10ألعاب لصحة بدنية ونفسية أفضل!