مراحل تشطيب الشقة للعريس بالترتيب

مراحل تشطيب الشقة للعريس بالترتيب

لو عريس جديد وشقتك موجودة لكن مش متشطبة، ومش عارف تبدأ منين؟ يبقى الكلام الجاي ده ليك! علشان هنتكلم عن مراحل تشطيب الشقة للعريس بالترتيب من الألف للياء.

ماحل تشطيب الشقة
مراحل تشطيب الشقة للعريس بالترتيب

التخطيط والتصميم أول مراحل تشطيب الشقة

علشان تبدأ صح وملاحظات أي مشاكل بعدين، لازم تبدأ التخطيط لتشطيب الشقة من تجهيز قايمة بالحاجات ال هتحتاجها حسب مساحة الشقة. وتقسيم المساحة حسب الأجهزة والعفش ال هيتحط.

هتحتاج تقسم الشقة على حسب عدد الغرف ال عندك، وتعرف أماكن العفش علشان تتجنب وضع مفاتيح الكهرباء في أماكن مش مهمة.

وكمان الأجهزة الكهربائية زي الغسالة ال هتحتاج تصريف معين في السباكة، وشكل الحمام والتويلت ال هتشتريه واستغلال المساحات الضيقة بأفكار مبتكرة.

التخطيط للمواد ال هتحتاجها من رمل واسمنت وبلاط ومفاتيح كهربا، وخرابيط واسلاك للتوصيلات الكهربائية. وطبعًا مع الاستعانة بالدنيا ال هيشتغل في الشقة ويكون حد موثوق منه تجنبًا لإهدار الفلوس.

تأسيس السباكة والكهرباء

تأسيس السباكة والكهرباء

من أول مراحل تشطيب الشقة بعد التخطيط وتحضير طلبات الشغل هو السباكة والكهرباء. ممكن تبدأ بالكهربا وبعدين السباكة، أو العكس، وممكن تبدأ بيهم مع بعض.

في السباكة هيتم الحفر ووضع أساسيات الأدوات الصحية زي الحوض والتويلت (قاعدة الحمام) والبانيو، وأماكن البلاعات.

تأسيس السباكة والكهربا

وفي الكهرباء بيتم حفر الجدران والسقف لوضع الخياطين ال بيدخل فيها أسلاك الكهرباء والكابلات. واختيار أماكن مفاتيح الكهرباء ووضع البرايز وحفر مكان لوحة الكهربا.

وهنا يفضل تكون عارف ومخطط لمكان الأجهزة زي التليفزيون والتكييف لو فيه، والمراوح وهكذا.

تأسيس وتشطيب النجارة

تأسيس وتشطيب النجارة
تأسيس وتشطيب النجارة،مراحل تشطيب الشقة

أعمال النجارة الخاصة بحلوق الشبابيك والأبواب من مراحل تشطيب الشقة المهمة في تفاصيلها. بعد اخد مقاساتها وعمل حساب تمدد الخشب في الصيف وانكماشه في الشتا. لازم تختار صنايعي فاهم وكويس في مهنته علشان ياخد المقاسات مظبوطة.

وفي المرحلة دي بيتم تركيب الحلوق والأبواب والشبابيك، وطبعًا بعد ما ياخدوا وش دهان يحمي الخشب من التشقق من أشعة الشمس والمطر وغيرها من عوامل الجو.

المحارة وتشطيب الشقة

المحارة وتشطيب الشقة

محارة الشقة أو التلييس بعد الانتهاء من اعمال الكهربا والسباكة خطوة مهمة في تشطيب الشقة، خصوصًا ان بيعتمد عليها أعمال الدهان فيما بعد.

يعني لو الصنايعي الشغال مش احسن حاجة الدهان مش هيكون مظبوط بعدين. وهنا لازم تختار شخص موثوق وتعمل ميزانية بقايمة طلبات المحارة واختار خامات كويسة وهات ازيد من الطلب حاجة بسيطة.

تشطيب الارضيات والسقف

تشطيب الارضيات والسقف

وهنا قدامك اختيارات كتيرة من أنك تختار بين البلاط السيراميك أو البورسلين للارضيات وطبعًا بيكون حسب ميزانيتك وال تقدر عليه. وطلبات البلاط من رمل واسمنت وغيره.

وتقدر تختار الوان مناسبة لبلاط الحمام والمطبخ، وتقرر أن كنت هتعمل الحيطان بلاط ولا هتكتفي بالأرض فقط. ويفضل اختيار ألوان بلاط فاتح في الحمام والبعد عن اللون الأسود لأنه بيجير.

كمان الأسقف بتخطط وتختار ان كنت هتعمل فيها جبس أو تسيبها زي ما هي، والجبس ان بورد علشان الشاشة والليدات في الشقه والإضاءة.

مراحل تشطيب الشقة النهائية

مراجل التشطيبات النهائية،خطوات تشطيب الشقة بالترتيب

في التشطيبات النهائية للشقة واختيار ألوان الدهانات للغرف والشقة والأبوب، وبيتم تركيب مقابض الأبواب ومفاتيح الكهربا. وكمان بتنتهي إضافة الأدوات الصحية زي الحوض والبانيو والحنفيات.

وهنا بيتم تركيب الإضاءة المتفق عليها، والنجف والأجهزة الكهربائية لو كانت موجودة، وبتخلص مراحل تشطيب الشقة عندالنقطة دي.

وفي النهاية لازم تختار أشخاص وصنايعية موثوق منهم ومن شغلهم منعًا لتضييق الوقت والفلوس، وإهدار الخامات. وافتكر دايمًا ان التخطيط هو سر نجاح أي شيء. واختار المتطلبات الخاصة بالتشكيل في حدود امكانياتك وفي المتوسط لأن دي حاجة هتعيش العمر كله.

هل محتوى المقال دة كان مفيد بالنسبة لك؟
نعم، مفيد!لا!
عجبك المقال؟ شارك مع اللي يهمك!
Avatar photo
ضحى حمادة

أنا ضحى، كاتبة محتوى ومصممة ومترجمة، مهتمة بجميع الجوانب الثقافية والعلمية، وأسعى دائمًا للتطور من ذاتي من خلال البحث والتعلم المستمر، وتجربة كل ما هو جديد.
بكتب في كافة المجالات بعد بحث طويل عن كل مصادر الموضوع المتاحة واختيار أدقها، بحب البحث في التفاصيل لوضوح الصورة.

المقالات: 26

أكتب رأيك في المقال!

لن يتم نشر عنوان بريدك الإلكتروني. بيانات ضرورية عليها علامة *