كيف تقضي عشاء رومانسي مع زوجتك؟

لو عايز تعمل مفاجأة حلوة لزوجتك وتحضر عشاء رومانسي يخليها تقع في حبك من جديد، هقولك على شوية أفكار بسيطة ومجربة عشان الليلة تكون مميزة ومليانة رومانسية:

1. اختار وقت مناسب

أول حاجة لازم تفكر فيها هي التوقيت. اختار وقت تكون فيه هي مرتاحة ومش مجهدة، زي نهاية الأسبوع مثلاً أو بعد يوم مريح. وخطط بهدوء عشان تكون الليلة كلها هدوء وراحة.

2. حضر المكان

المكان عامل مهم جدًا. لو ناوي تعمل العشاء في البيت، فخليه يكون مترتب وجاهز لاستقبال جو رومانسي. استخدم إضاءة خافتة زي الشموع، وزيّن ترابيزة الأكل بورود بسيطة. كمان ما تنساش الشموع العطرية لأنها هتضيف لمسة رومانسية للجو.

3. اختار الأكل المناسب

الأكل حاجة لازم تختارها بحرص. فكر في الأكلات اللي هي بتحبها وبتستمتع بيها. لو مش متأكد إيه الأنسب، ممكن تروح للمأكولات الإيطالية أو أي أطباق خفيفة زي السلطات، المأكولات البحرية، وشرائح اللحم. ويا سلام بقى لو تجهز حاجة حلوة من صناعة ايدك ولو صعبة عليك اشتري أكتر حلو هي بتحبه من أفضل مكان بيعمله.

4. اعمل أجواء رومانسية

اهتم بالتفاصيل اللي بتعمل فرق لأن الستات بتهتم بها جدًا. مثلًا حط موسيقى هادية في الخلفية، أو أغاني رومانسية ليها ذكريات حلوة عندكم، أو أغنيتكم المشتركة. المهم اختار موسيقى تكون مناسبة علشان تفتح النفس على الأكل وتخلّي الجو كله مريح. وممكن تحضر ملاحظة رومانسية صغيرة على المناديل أو تقدم العشاء بطريقة غير متوقعة.

5. حضر الأكل بنفسك

لو بتعرف تطبخ حتى لو حاجات بسيطة، هتبقى لفتة جميلة جدًا لو حضرت العشاء بنفسك. وخليني أقولك الموضوع هيعود عليك بمكاسب لفترة طويلة، يعني لو حضرتلها الأكل يوم في الشهر، هتحضرلك هي باقي السنة بكل حب وطاقة. ومش مهم يكون الأكل جامد جدًا، المهم إنك تبين مجهودك وحبك لها في التحضير. وطبعًا لو مش شاطر في الطبخ، ممكن تطلب الأكل اللي بتحبه من مطعم كويس، بس اجتهد في طريقة تقديمه بشكل جميل وملفت.

6. اهتم بشكلك

مش بس العشاء اللي هيكون مفاجأة، كمان لازم تهتم بمظهرك الشخصي. البس حاجة شيك ومريحة في نفس الوقت. خليها تحس إنها في عشاء خاص واستثنائي، حتى لو في البيت. لأن زي ما بيفرق معاك اهتمامها بشكلها علشانك، هي كمان بيفرق معاها وأكيد تحب تشوف إنك بتهتم بشكلك علشانها زي أيام الخطوبة. لأن دا بيخليها تحس إنك بتهتم بها زي البدايات وإن حبك لسه زي ما هو رغم مرور الأيام والسنين. .

7. قول كلام حلو

العشاء الرومانسي مش بس عن الأكل والجو، لكن كمان عن الكلام اللي بينكم. حاول تبعد عن مواضيع الشغل أو المشاكل اليومية، وركز على الكلام الحلو اللي بيعزز العلاقة. افتكر ذكريات جميلة بينكم أو احكي عن خطط حلوة للمستقبل. أو جرب تقولها إنك لسه بتحبها زي أول يوم شفتها، وإن كل يوم ليك معاها هو نعمة كبيرة من ربنا بتدعي إنها تدوم عليك. ببساطة لو سقيتها بالحب هتزهر كل يوم علشانك، وأنت المستفيد في النهاية.

8. اشتري هدية

لو عاوز تضيف لمسة مميزة للعشاء الرومانسي، ممكن تفكر في تقديم هدية رمزية زي وردة أو قطعة إكسسوار بسيطة ليها. مش لازم تكون هدية غالية، الأهم إنها تكون معبرة وتبين حبك وتقديرك ليها. الست بتحب الهدايا خاصة من الشخص اللي بتحبه، وبترجمها على إنها اهتمام ومحبة.

9. اهتم بسهرة بعد العشاء

خطط لحاجات تعملوها علشان تقضوا سهرة رومانسية سوا. مثلًا ممكن تشغل فيلم بتحبوه أو تقعدوا في مكان هادي في البيت زي البلكونة وتشربوا شاي أو قهوة مع بعض.

وأهم حاجة في الليلة دي إنكم تستمتعوا بوقتكوا مع بعض. خليك هادي ومريح، وابتسم وحاول تخلق أجواء لطيفة. ركز في اللحظة واستمتع بكل لحظة مع زوجتك.

اقرأ أيضًا: طريقة عمل عشاء رومانسي لزوجي؟

اقرأ أيضًا: أفضل أماكن عشاء رومانسي في القاهرة