كيفية تشطيب شقة بأقل التكاليف في 5 خطوات

عريس جديد وبتدور على مواد التشطيبات؟ الميزانية محدودة، أو عاوز حاجة تعيش العمر كله ومتتبهدلش بعدين في الصيانة؟ عاوز تعرف كيفية تشطيب شقة بأقل التكاليف؟ تعالى وانا اقولك على 10 خطوات من خلالها هتشطب شقتك بأقل تكلفة.

خطوات تشطيب شقة بأقل التكاليف

علشان تشطب شقتك بتكلفة قليلة ومتهدرش مواد، أو تصرف فلوس كتير في الفاضي! لازم تحدد خطواتك وترتبها، وتبعد عن الأخطاء الشائعة في اختيار شقة الجواز:

التخطيط ووضع الميزانية

بعد اختيار كل صنايعي موثوق منه، أو شخص شغله كويس ومعروف عنه الأمانة. بتعمل قايمة بمتطلبات تشطيب شقتك. وتقارن الأسعار الموجودة وأنواع المواد بالميزانية الخاصة بيك علشان تكون عامل حساب كل شيء.

علشان تقلل من التوتر والتصرفات المتنوعة وقت تشطيب الشقة، لازم تكتب تفاصيل كل مرحلة من مراحل التشطيب بمتطلباتها، واحتياج العمال والصنايعية من المواد.

مثلآ مرحلة السباكة والكهرباء تكتب احتياجك من الأسلاك والخراطيم وهكذا. وده بعطيك مساحة انك تفكر صح وتستغل الفرص المعروضة قدامك، وكمان تتفاوض مع العمال ال هيشتغلوا بحيث يكون معام وقت كافي قبل الفرح.

استغلال العروض والخصومات

انك تشطب شقتك بأقل التكاليف هيحتاج منك صبر وتخطيط من وقت بدري شوية، علشان تركز على استغلال العروض والخصومات للمواد ال هتحتاجها في مراحل تشطيب الشقة كلها.

تقدر تستغل هبوط سعر الإسمنت والعروض على البلاط والبورسلين، وكمان تشتري المواد ال محتاجة من محلات جملة زي الأسلاك الكهربائية والخراطيم، ومفاتيح الكهرباء. وده هيوفر فلوس كويسة تساعد في حاجة تانية.

اختار الأدوات والكماليات المحلية ال جودتها كويسة وفي نفس الوقت سعرها مناسب، وابعد عن المستورد والحاجات ال أسعارها خرافية لأن في الاخر استخدامها واحد.

العمالة الماهرة

من اهم الخطوات ال هتساعدك في معرفة كيفية تشطيب شقة بأقل التكاليف هي اختيار العمالة الماهرة. لأنها هتوفر عليك في خطوات تانية.

زي خطوة التخطيط لأن العمالة الماهرة هتكون عارفة المتطلبات ال هتحتاجها في تشطيب الشقة بالكميات المناسبة، وبالتالي هتوفر في الوقت والفلوس والمجهود.

وكمان نسبة الإهدار هتكون أقل بعكس العمالة الغير ماهرة، أو الهواة. زائد إن العامل الشاطر أو الصنايعي الفاهم في مهنته هينجز الشغل في وقت كويس وبتقفيل ممتاز. بدل الإهدار والتلييس على الشغل بعدين، أو ظهور مشاكل في التشطيبات التالية.

تصميمات الشقة

علشان نحافظ على الميزانية خصوصًا لو كانت ميزانية محدودة أو متوسطة في حالة العجز الاقتصادي ال العالم بيمر فيه. لازم تدور على اكتر الأساليب الموفرة، زي انك تختار تصميمات الشقة بسيطة مش معقدة توفيرًا للمواد والعمالة.

دايمًا البساطة هي الفائزة في كل حاجة، زي تصميم أعمال الكهربا، مش ضرورية استخدام إضاءة كتير وملونة لأنك مش هتحتاجها. ممكن تستبدلها بلدات تعطي إضاءة في السقف.

وأعمال السقف والتشطيب النهائية كمان، ممكن تستغني عن الجبس ان بورد، والتعديلات في السقف والجدران لأنها بتستهبل مواد كتيرة، وبالتالي عمالة اكتر وميزانية أكبر.

ازاي تشطب شقتك بأقل تكلفة

لو بتفكر تتجوز وعندك الشقة لكن الظروف صعبة ومش عارف كيفية تشطيب شقة بأقل التكاليف، أو ازاي تجمع الفلوس ال محتاجها لتشطيب الشقة؟ تعالى اقترح عليك بعض الاقتراحات:

• اشتري الأجهزة المهمة فقط، واتفق على انك هتجيب ال تقدر عليه. يعني مش لازم نيش وغرفة الأطفال ينفع تتأجل لما ربنا يرزق بيهم، مفيش حد هيجيلكم زيارة وانتوا عرسان.
• مبدأيًا حاول تبعد عن القروض البنكية وغيرها لأن فيها ربا وده حرام شرعًا. إلا لو كانت قروض حسنة وده هيكون صعب طبعًا واحنا عاوزين نبدأ بسم الله وربنا يبارك.
• الجمعيات من اكتر الطرق المضمونة ال هتساعدك في تجهيز الشقة، لو في الإمكانية انك تدخل جمعية كبيرة تخلص بيها التشطيبات. أو جمعيات صغيرة من خلال تقدر تشتري المواد ال هتحتاجها في التشطيبات واحدة واحدة.
• لو الراتب الخاص بيك كويس وتقدر توفر منه كل شهر أكتر من ألفين جنيه، تقدر تشتري كل شهر حاجة من المواد المستخدمة في التشطيبات. وده هيسهل عليك الموضوع إلى حد ما. على الأقل مش هتكون مضغوط والحاجة بتيجي وتتنسي.
• تقدر تتفق مع الأشخاص المعروفين انهم بيجهزوا تشطيبات الشقق وياخدوا فلوسهم على مراحل، ويستحسن تحاول في الطرق الأولى الأول علشان الفوائد.