كلمات تسحر الرجل… اتعرفي عليها واملكي قلب عريسك

يمكن الرجال عادة بيظهروا انهم مش بيهتموا بالأمور العاطفية، لكن في الحقيقة هم برضه عاطفيين زي الستات وأحياناً أكتر كمان، وعشان كدة لو كنتي عايزة تسمعي كلام حلو من شريك حياتك؛ ففكري إن هو كمان هيحس بالسعادة والفخر لو سمع منك كلام مشابه؛ عشان كدة في المقال ده جبنا لك شوية كلمات تسحر الرجل وتحسسه بحبك وإعجابك بيه فعلاً.

ولازم تاخدي بالك ان مش معنى إنه يحب يسمع منك كلام حلو، إنك لازم تقولي نفس الكلام اللي انت تحبي تسمعيه.

راعي إنكم ممكن تبقوا مختلفين في الحاجات اللي بتحبوها والمجاملات اللي تحبوا تسمعوها.

قوليله على الصفات الحلوة اللي انت شيفاها فيه، واللي يحب يعرف إنك بتحبيها فيه، مش اللي عايزاه يشوفها فيكي.

ومش لازم تلتزمي بنفس الجمل اللي هنشاركها معاكي في المقال، دي جمل عامة أي رجل يحب يسمعها.

لكن لو فيه صفة أو ميزة مميزة في عريسك بتعجبك بشكل خاص، استغليها وعبري عنها واظهري له إعجابك بيها.

أنا محظوظة جداً بيك:

أول كلمات تسحر الرجل هي إنك تعبري له عن مدى إحساسك بأهمية وجوده في حياتك، وإنه ده ليه معنى كبير بالنسبة لك، من المهم إنك تعترفي له بقيمته عندك بالكلام مش بس بإنك تعتمدي على إنه هيحس بده لوحده لمجرد استمرار وجودك معاه واستمرار علاقتكم.

الكلام ده هيحسسه إن وجوده في حياتك ليه دور فعلاً في سعادتك، وإنك بتقدري ده، وده هيخليه يحس بالفخر والثقة.

انت قوي جداً، كلمات تسحر الرجل:

الإحساس بالقوة هدف لأي رجل، فكرة إنه يكون قوي معناها إنه قادر على حماية أي حد يخصه، وانه مصدر أمان ودفاع ليكي.

فسواء كان بيروح الجيم وبيرفع أثقال وبيوصل لأوزان محصلتش، أو مبيلعبش رياضة أصلاً ومبيروحش الجيم إلا نادراً.

في جميع الأحوال عبري له عن احساسك بالأمان في وجودك، وإنك شيفاه قادر على حمايتك والدفاع عنك.

شجعي أي مجهود يبذله عشانك، وأي تغيير إيجابي يظهر عليه حتى لو بسيط.

وإن مظهره كل يوم بيكون أحلى من الأول وبيحلو في عينك أكتر.

شكراً ليك على كل حاجة بتعملها عشاني:

التقدير مهم في أي علاقة، وكلام الشكر البسيط هي كلمات تسحر الرجل، وانت أكيد بتاخدي بالك من أي حاجة إيجابية بيعملها عشان علاقتكم، وده سواء كانت حاجة بسيطة أو كبيرة، سواء كان اهتمامه بتفاصيل صغيرة تخصك، أو هدية جبهالك، أو حتى إنه يساعدك في البيت أو في حاجة تخص شغلك.

مهما كانت الحاجات دي صغيرة وبسيطة أكيد بتعمل فرق في علاقتكم، وأكيد بتاخدي بالك منها ومن تصرفاته معاكي.

فإذا كنت ملاحظة مجهوده ليه متقوليش حاجة؟ أي شخص هيفرح جداً لو حس إن مجهوداته متقدرة ومتشافة وليها تأثير عند الطرف التاني.

فزي ما انت تحبي تسمعي منه كلام شكر ومدح على طبيخك مثلاً اللي حضرتيه على الغدا، على الرغم من إنها حاجة عادية وطبيعية؛ فهو كمان هيحب يسمع شكرك ليه على طلبات البيت اللي افتكر يجيبها معاه وهو راجع من الشغل مثلاً، وإنك حاسة قد ايه هو مهتم باللي بتطلبيه مهما كان بسيط.

الاعتذار كلمات تسحر الرجل:

ده مش معناه أكيد إنك تمشي تقولي أنا آسفة على مال على بطال.

لكن في إشاعة منتشرة بين الرجال إن الستات دايماً مبيعترفوش بغلطهم، وحتى لو هم الغلطانين بيبقوا عايزين الرجالة هم اللي يعتذروا لهم.

وطبعاً ده شيء مستفز في المطلق إن حد يبقى هو اللي غلط معايا وأنا اللي أروح أعتذر له، محدش هيبقى مبسوط بوضع زي ده أكيد حتى لو اضطر يعمله عشان الدنيا تعدي.

فحاولي تنفي صحة الإشاعة دي، ولما تكوني انت الغلطانة فعلاً متكابريش واعتذري، كلمة أنا آسفة مش هتقلل منك أبداً لو انت فعلاً غلطتي.

بالعكس دي هتخليه يحترمك ويقدرك ويثق في رأيك، ويعرف إنك سهل تتراجعي عن حاجة بان لك انها غلط.

وإنك مش هتكابري وتلبسي في حيط بس عشان تثبتي إنك صح بالعافية، وعلى كل حال لازم تعرفي إن الاعتذار مكون أساسي لأي علاقة صحية؛ لإن مفيش حد صح طول الوقت، ولا حد غلط طول الوقت.

ومش هتقدروا تتخطوا أي خلاف إلا لو الغلطان منكم اعتذر.

وإلا هيفضل فيه رواسب جواكم من الخلاف ده بتتراكم في كل خلاف.

لحد ما العلاقة كلها تنهار وتبوظ في النهاية بسبب التراكمات دي، فلو كنت غلطانة قولي آسفة بكل بساطة في كلمات تسحر الرجل.

لكن اتأكدي انك تكوني صادقة في ده، ومقتنعة بيه مش بتقوليها عشان الخلاف ينتهي وخلاص.

لإنك في الحالة دي يا هتبقي بتقوليها بتكبر وده هيبان.

فهو مش هيحسها، وهيبقى عارف إنها تكبير دماغ وبس وفي الآخر هتعملي اللي انت عايزاه.

يا إما هتقوليها بخنوع إنك خايفة من زعله ومش انت الغلطانة أصلاً هو الغلطان.

ومرة في مرة هيتعود إن يكون هو الغلطان وانت اللي بتعتذري عشان متقدريش تعيشي من غيره.

وده عكس العلاقة الصحية اللي اتكلمنا عنها، في العلاقة الصحية الغلطان بيعتذر ومبيكابرش.

لكن مبيشيلش غلطات غيره إلا إذا قرر يتجاوزها من منطلق قوة مش ضعف.

أنا واثقة فيك:

الثقة مهمة لأي علاقة، ومن المهم إنك تعبري عن مدى ثقتك فيه، سواء في إخلاصه ليكي.

أو إنك واثقة في قراراته واختيارته وإمكانياته كزوج ورجل يقدر يقود مركب علاقتكم لبر الأمان.

وتعبيرك عن ثقتك فيه هتخليه هو كمان يكون واثق فيكي بنفس الدرجة ويعبر لك عن ده.

وده هياخد علاقتكم لمستوى أعلى من الأمان والوئام.

وفي نهاية المقال نتمنى إننا نكون قدرنا نعرفك أهم كلمات تسحر الرجل تقدري تستخدميها في كلامك مع عريسك وجوزك المستقبلي.

وافتكري دايماً إنك تكوني صادقة في كلامك ده وحساه فعلاً، مش بتقوليه تأدية واجب عشان الحياة تمشي وخلاص.

لإن في النهاية المشاعر الصادقة بس هي اللي بتوصل للقلب فعلاَ وبتدخله وتملكه.