فستان أخت العريس لفرح صيفي… أفكار تخليكي تنوري جنب أخوكي

فستان أخت العريس لازم يكون مميز عن أي واحدة تانية من ضيوف الفرح أكيد.

ده غير إن أخوات وصحبات العروسة هم كمان هيحاولوا يتألقوا بأحلى صورة في اليوم ده.

فلازم تكوني قد المنافسة وتتميزي بجمالك وأناقتك عنهم، ويبقى مظهرك على نفس مستوى مظهر أخوكي العريس وعروسته.

وانت واقفة جنبهم سواء في التصوير أو في فقرات اليوم بشكل عام.

وعشان كدة احنا في المقال ده جبنا لك تشكيلة أفكار مختلفة لأحدث الفساتين اللي ممكن تتلبس في حضور الأفراح.

وبكدة تقدري تختاري منها اللي يناسب شخصيتك وطبيعة الفرح اللي اختاره أخوكي وعروسته الصيف ده.

سواء كان فرح في قاعة أو اوبن اير، فرح نهاري أو بالليل؛ فتابعي معانا المقال.

فستان أخت العريس باللون الأصفر المشمشي:

لو الفرح هيكون في الصيف وبالنهار في مكان مفتوح؛ فالفستان ده هيكون مناسب جداً ليكي.

اللون الأصفر المشمشي يعتبر من الألوان المبهجة المشرقة المناسبة جداً للنهارات الصيفية.

وتقدري تلبسيه مع صندل مسطح فلات أو بكعب إسفيني لو الفرح في الهواء الطلق.

أما لو هيكون في قاعة؛ فتقدري برضه تلبسي الفستان ده لكن مع جزمة شيك بكعب عالي عشان يبقى مظهرك أكتر أناقة.

فستان صيفي مكشكش:

وانت بتختاري فستان أخت العريس عشان تلبسيه في فرح أخوكي اللي هيتعمل في الصيف، متتردديش لحظة في انك تختاري التفاصيل الجريئة.

الصيف هو موسم الألوان والطبعات الجريئة.

ومش صح إن فساتين حضور الأفراح لازم دايماً تبقى من قماشات ستان وشيفون وبألوان سادة.

خليكي مميزة ومختلفة في اختياراتك واختاري فساتين من قماشات وألوان مختلفة ومتنوعة.

فممكن تختاري فستان قماش طويل مزين بالزهور مكشكش عند الأكتاف وفي الديل.

وتقدري تلبسيه مع إكسسوارات بسيطة لكن شيك زي حلقان كلاسيكية أو عقد بسيط شيك يكمل مظهرك الرسمي.

فستان أخت العريس من الدانتيل:

ولو بتحبي تحافظي على المظهر الكلاسيكي التقليدي؛ فممكن تختاري فستانك اللي هتحضري بيه فرح أخوكي يكون من الدانتيل.

الفستان اللي من قماش الدانتيل بيدي المظهر الكلاسيكي اللي متعودين عليه وفي نفس الوقت قصاته الحديثة بتدي مظهر جرئ ومختلف.

وتقدري تختاري اللون اللي يناسبك، وسواء كنت محجبة أولا؛ فهتلاقي تصميمات كتير تتناسب معاكي سواء بكم أو من غير.

وسواء طويل ومكسي أو ميني دريس أو بحواف مش متماثلة عشان تدي شكل مختلف في نهاية الفستان.

بدلة من الساتان:

مين قال إنك لازم تحضري الفرح بفستان لو انت طبيعتك وستايلك مبتحبيش الفساتين وبتحسي انها مش بتليق عليكي؟

فمش لازم تكتفي نفسك بحاجة مش متعودة عليها في اليوم ده، عشان تباني في أحسن حالاتك لازم تكوني مرتاحة في اللي هتلبسيه.

فلو متعودة وبتاخدي راحتك أكتر في البدل والبناطيل تقدري تلبسي ده برضه في الفرح، تقدري تلبسي بدلة ساتان في فرح أخوكي.

وممكن تختاريها بلون وردي عشان تضيف لمسة من الأنوثة على مظهرك وتناسب أجواء الفرح.

وتقدري تلبسي معاها إكسسوارات دهبية أو فضية هتليق عليها وتديكي المظهر الرسمي الكلاسيكي اللي محتاجاه للفرح.

فساتين الساتان:

أما لو مصممة انك تحتفظي بالمظهر التقليدي المظبوط لأخت العريس زي ما الكتاب بيقول؛ فهتبقى الفساتين الساتان هي أكتر الفساتين المناسبة ليكي.

تقدري تختاري فستان أخت العريس في أفراح الصيف يكون من الساتان البارد ومنقوش بتصميمات بسيطة جميلة تبان وكإنها جزء من لون الفستان.

ده غير التصميمات المختلفة اللي ممكن تلاقيها في الفساتين من النوع ده زي إنها تكون بأكمام منفوخة أو مزينة بأزرار في الجزء السفلي الأمامي.

كل دي أفكار ممكن تبصي لها وانت بتختاري فستانك، وطبعاً في الحالة دي تقدري تحطي في اعتبارك دايماً إنك ممكن تختاري الفستان الأسود من النوع ده اللي هيفضل في دولابك دايماً، وتقدري تلبسيه في أي مناسبة بعد كدة مش بس فرح أخوكي.

أما أكتر الألوان اللي هتكون مناسبة لفرح صيفي أو خريفي والجو لسة فيه شمس حلوة ومبردش؛ فهو اللون البرتقاني القريب من لون الشمس وبيدي نفس الأجواء.

فستان أخت العريس من الترتر:

طبعاً من أكتر مظاهر فساتين حضور الأفراح هي إن يكون فيها ترتر، وتقريباً ده الوقت الوحيد المتاح اننا نعرف نلبس فيه فساتين متزينة بالترتر.

فلو حابة ان يكون فستانك من النوع ده؛ فتقدري تختاري فستان شيك مطرز بالترتر، ولو مش محجبة ممكن يكون فستان قصير فوق الركبة.

ومن أشيك الفساتين في النوع ده اللي بيكون فيها شال متركب على الضهر بيدي لمحة أنوثة ورقي في تصميمه.

وفي نهاية المقال نتمنى اننا نكون ساعدناكي في اختيار فستان أخت العريس وتكوني انت العروسة الجاية إن شاء الله.

وألف مبروك ليكي ولأخوكي ونتمنى لكم كلكم حياة سعيدة وعيلة بتكبر كل يوم عن يوم بحب وسعادة.