فساتين صحاب العروسة الحوامل أفكار تساعدكم في اختياراتكم

فساتين صحاب العروسة الحوامل ممكن تبقى من أكتر الحاجات المحيرة خلال اختيارات الفرح، خصوصاً لو عاوزين كلكم تلبسوا زي بعض.

ومن المعروف طبعاً إن صحبات عروستنا الحلوة بيكونوا أكتر ناس مهتمين بمظهرهم في الفرح.

وده لانهم مهتمين ان الفرح كله يكون بأحلى صورة.

فلو فيه واحدة منكم أو أكتر حامل؛ فلازم تحطوا ده في اعتباركم وانتم بتختاروا ستايل الفساتين اللي هتلبسوها.

من الحاجات اللي لازم تاخدوا بالكم منها إن الحامل فيكم دي في الشهر الكام، وعلى ميعاد الفرح هتكون وصلت للشهر الكام.

وكمان حجم بطنها تقريباً هتبقى قد ايه؟

وده مش معناه إنكم هتضطروا تلبسوا فستان ميكونش مناسب ليكم عشان يناسب صاحبتكم الحامل.

لكن فيه اختيارات كتير ممكن تبقى مناسبة ليكم كلكم، الاختيارات دي هتساعدكم تظهروا بمظهر شيك وأنيق.

وفي نفس الوقت هتكون مريحة للحامل فيكم ومش ضاغطة عليها بشكل يأذيها أو يأذي البيبي.

وفي المقال ده احنا جمعنا لكم أكتر الاختيارات الشيك الأنيقة اللي هتناسب صاحبتكم الحامل وتكون شيك عليكم برضه.

والفساتين دي كمان مناسبة لأي ضيفة في الفرح ممكن تحضر وهي حامل؛ فلو بتقري المقال ده؛ لإنك معزومة على فرح وانت حامل.

ومش عارفة ممكن تلبسي ايه؛ فهتلاقي اللي انت عايزاه معانا؛ فتابعوا معانا المقال.

الفساتين الملفوفة:

الفساتين الملفوفة هتكون مناسبة أوي لاختياراتكم في فساتين صحاب العروسة الحوامل، وده لانها بتتميز ان وسطها بيكون مطاط ومريح.

وبكدة هتكون مرنة مع بطن أي حامل فيكم ومش هتضغط عليها، وفي نفس الوقت هتكون سيمبل وسمباتيك مع بقيتكم.

والجميل فيها إن فيه منها بألوان كتير تقدروا تختاروا منها اللي يناسبكم ويناسب ذوق وفكرة الفرح.

وكمان فيه منها أشكال مختلفة زي إن يكون فيها كشكشة من عند الرقبة أو فتحة على شكل حرف V.

وده عشان تظهر جمال الرقبة والاكسسوارات اللي ممكن تلبسوها فيها.

فساتين صحاب العروسة الحوامل من القفطان:

كمان تقدروا تختاروا الفساتين المناسبة ليكم من نوع الفساتين المستوحاة من موديل القفطان.

وده لإنها بتتميز بتصميمات واسعة ومريحة هتكون مناسبة لأي واحدة حامل، وكمان تقدروا تزينوها بحزام شيك في الوسط.

ده هيكون جميل على بقيتكم اللي مش حوامل؛ لإن بكدة هتقدروا تضيقوها براحتكم لو مش عاجبكم وسعها.

وفي نفس الوقت تدوها مظهر أشيك.

الفساتين بخصر إمبراطوري:

ستايل النوع ده من الفساتين بيتميز إنه مناسب جداً في فساتين صحاب العروسة الحوامل.

وده لإن الخصر الإمبراطوري ده بيدي براح عند البطن، والميزة فيه كمان إنه متوافر بموديلات وأشكال وألوان مختلفة تقدروا تختاروا منها براحتكم.

ده غير إنه حتى من غير حمل بيكون شيك جداً على أي واحدة بتلبسه، وبيديها مظهر إمبراطوري فعلاً.

تقدروا تختاروه منه الشيفون أو الدانتيل، وممكن يكون بأكمام مكشكشة تدي مظهر أنيق وأرستقراطي أكتر.

أو ممكن يكون من غير أكمام لو مش محجبات، وده هيكون مناسب جداً في أفراح الأوبن أير في موسم الصيف.

وممكن كمان يكون من الساتان أو القطن اللامع عشان يدي راحة أكتر للحامل.

وتقدروا تختاروه بفيونكة مثلاً عند الوسط كإنها حزام،وده هيديه مظهر كلاسيكي أكتر يتطابق مع موديله.

وفيه منها برضه موديلات للفساتين المستوحاة من الطراز اليوناني.

فساتين صحاب العروسة الحوامل بالترتر:

طبعاً الفساتين الترتر اختيار مميز في أي فرح.

ومش معنى إن واحدة فيكم أو أكتر حامل إنكم تكونوا مضطرين تتخلوا عن الاختيار ده لو عاوزينه.

تقدروا تختاروا أنواع من الفساتين الترتر تكون مناسبة ليكم كلكم، وده بإنكم تختاروا فستان ترتر يكون مدرج طبقات من عند الوسط.

بالتالي ده هيدي وسع عند البطن بشكل يريح الحامل فيكم، وكمان تقدر تداري بطنها فيه لو مش حابة بطنها تكون ظاهرة في الفستان.

والمميز في الفساتين دي إن بيكون فيها أطوال مختلفة؛ فلو مش محجبات تقدروا تختاروا منها فساتين قصيرة تنطلقوا فيها براحتكم.

الفساتين القماش الملونة:

لو الفرح في مواسم الصيف والربيع وهيبقى بالنهار وفي مكان أوبن أير؛ فغالباً ممكن تختاروا انكم تلبسوا فساتين قماش ملونة ومزركشة بطبعات الزهور بروح الربيع.

وفي الحالة دي تقدروا تختاروا أنواع كتير من الفساتين دي اللي بيكون فيه منها بأشكال وأحجام مختلفة، وبالتالي هتلاقوا فيها فساتين صحاب العروسة الحوامل اللي تناسبهم.

وبقيتكم اللي مش حوامل يقدروا يختاروا المقاسات الأضيق، وكمان الفساتين دي بيكون فيه منها أطوال وأشكال مختلفة تقدروا تختاروا منها اللي يعجبكم على ذوقكم.

سواء الفساتين الطويلة المكسي أو الفساتين القصيرة، وإنها تكون بأكمام كاملة أو منفوشة أو أكمام قصيرة أو من غير أكمام خالص.

كل خياراتكم المفضلة هتقدروا تلاقوها براحتكم في النوع ده من الفساتين.

وبكدة نكون وصلنا لنهاية مقالنا النهاردة، ونتمنى إننا نكون فدناكم وقدرنا نقدم لكم خيارات تساعدكم في اختيار فساتين صحاب العروسة الحوامل.

نتمنى لكم فرح سعيد تقضوا فيه أحلى الأوقات، وعقبال ولادكم.