علاج الهالات السوداء بطرق طبيعية قبل الفرح

سواء كنت العريس أو العروسة فأكيد علاج الهالات السوداء عامل هاجس ليكم قبل الفرح.

محدش فيكم أكيد هيكون حابب إنه يظهر في الفرح وتحت عينه سواد.

صحيح إنكم ممكن تداروها بمكياج وكونسيلر، بس دي مش هتبقى حاجة مريحة، خصوصاً للعريس اللي مش متعود يحط مكياج أصلاً.

كمان ده معناه انها هتفضل معاكم بعد الفرح وبعد ما تشيلوا المكياج.

وأكيد مش هيكون منظر ظريف تقضوا بيه أول ليلة في جوازكم وشهر عسلكم وانتم بسواد تحت عينيكم.

وعلى الرغم إن شركات الأدوية ومستحضرات التجميل بتخرج علينا كل يوم بإعلان جديد عن علاج الهالات السوداء والانتفاخات تحت العين.

ويمكن العلاجات دي في الإعلانات تبان إنها روعة وسحرية إلا إنها في الحقيقة مش علاجات واقعية أبداً.

وعلى مر الزمن الناس صرفت ألوفات وملايين في الكريمات والمستحضرات اللي بيدعوا إنها بتعالج الانتفاخات وبتفتح السواد تحت العين.

لكن مكنش ليها أي تأثير في النهاية، وده لإن الموضوع مالوش سبب محدد عشان يبقى ليه حل كيميائي معين.

فالهالات دي ممكن يبقى سببها كتر السهر أو الحساسية أو التعرض للشمس فترات طويلة في أوقات مش صحية أو التعب المزمن أو عوامل تقدم السن أو حتى تبقى عوامل وراثية في عيلة الشخص المصاب.

وعشان كدة فالأنسب في علاج الهالات السوداء هو إننا نتبع نظام حياة صحي في المجمل يحافظ على جسمنا ونظارة بشرتنا.

وفي المقال ده حاولنا نجمع لكم علاجات طبيعية وأنظمة صحية تقدروا تواظبوا عليها في يومكم.

ويكون ليها تأثير سريع على نضارة بشرتكم وإزالة السواد تحت العين في أسرع وقت قبل الفرح؛ فتابعوا معانا.

أكياس الشاي علاج الهالات السوداء:

تقدروا تستخدموا أكياس الشاي اللي بتشربوه في علاج الهالات السوداء اللي مضيقاكم.

فبعد ما تشربوا شايكم، حطوا كيس الشاي على كل عين لمدة تلت ساعة.

وده لإن الشاي بيحتوي على الكافيين اللي يعتبر من مضادات الأكسدة، وده بيزود جريان الدم في المنطقة تحت العين.

وكمان مضادات الأكسدة اللي في الشاي بتحمي البشرة من أشعة الشمس وبتقلل أعراض الشيخوخة.

وخصوصاً الشاي الأخضر اللي ليه كمان فوايد مضادة للإلتهابات.

اللبن البارد:

ادهنوا تحت عنيكم لبن بارد وسيبوه لمدة عشر دقايق مرتين كل يوم، اللبن البارد ليه نفس فعالية كريمات العيون وأكتر كمان.

وده لإن اللبن بيكون فيه فيتامين أ اللي بيحافظ على البشرة مشرقة ومتألقة، وكمان برودة اللبن بتنشط الأوعية الدموية تحت العين.

علاج الهالات السوداء بشرب الماء:

يمكن كلنا زهقنا من النصايح المستمرة في أهمية شرب المية، بس الحقيقة إن المية فعلاً من أهم مكونات الطبيعة اللي بتمنح البشرة الترطيب اللي بتحتاجه عشان تمنع تكون علامات الإرهاق على الوش.

وعشان كدة لازم تركزوا طول اليوم في إنكم تشربوا كميات مناسبة من المية، والكمية المناسبة دي مبتقلش عن 2 لتر في اليوم.

إزالة المكياج قبل النوم:

وطبعاً النصيحة دي موجهة لعروستنا الحلوة، مهما تكوني مرهقة ونفسك تروحي تنامي حالاً، متنسيش تشيلي مكياجك قبل ما تنامي.

أكيد مش هتحبي إن بشرتك تشرب المكياج طول الليل وتصحي وشك عليه علامات إرهاق وتعب تحتاجي مكياج مضاعف عشان تخفيها.

وكل ده بيسبب في الآخر انتفاخ العين وصعوبة علاج الهالات السوداء اللي بتحيط بيها؛ فحاولي تتفادي الموضوع من بدايته.

ولكن متشيليش المكياج بس بالمية وإيدك أو منديل عادي، لا استخدمي مزيل مكياج متخصص يشيل كل نقطة منه فعلاً وميسيبش أي رواسب وكمان يغذي بشرتك قبل النوم.

ووانت بتشيلي المكياج متفركيش وشك بعنف يخلي بشرتك تقشر، ولكن دلكيها بلطف، ده هيغذيها أكتر ويمشي الدورة الدموية فيها.

تغيير عادات النوم السلبية:

وده زي النوم على البطن مثلاً اللي بيسمح بتجمع السوائل تحت العين، وبالتالي تبدأ تظهر الانتفاخات والسواد تحتها.

وكمان أوقات النوم مهمة جداً، لو بتعكسوا يومكم وتناموا بالنهار وتصحوا بالليل ده بيسبب برضه ظهور علامات الإرهاق على البشرة لإن خلايا البشرة والجسم كله بيتغذى أكتر وبينمو خلال أوقات النوم الليلي.

وبرضه ساعات أو مدة النوم نفسها مهمة أوي، لو مبتاخدوش قدر كافي من النوم والراحة ده هيكون سبب واضح لظهور علامات السواد تحت العين.

ناموا تمن ساعات في اليوم بالليل وشوفوا النتيجة المذهلة في اختفاء علامات السواد اللي مضايقاكم تحت عينيكم.

وفي نهاية المقال نحب نفكركم إن دي مش طرق سحرية في علاج الهالات السوداء، يعني ميكونش الفرح بكرة وتعملوها النهاردة وتتوقعوا إنكم هتشوفوا التأثير في لحظتها يعني!

لكن من المفيد إنكم تجهزوا نفسكم وتغيروا عاداتكم في مدة كافية قبل الفرح عشان يبان تأثيرها، على الأقل بشهر يعني.