طرق لبس طرحة العروسة مع تسريحات شعرك المختلفة

طرق لبس طرحة العروسة من أكتر الحاجات اللي ممكن تحيرك في اليوم ده، وبعد ما بتوصلي لقرار في تسريحة شعرك.

بيكون السؤال التاني: إزاي هتلبسي الطرحة؟ وممكن تبقي مترددة إذا كنت تلبسي الطرحة في يوم فرحك ولا لا.

بس خلينا نقولك إن تسريحات الشعر الجميلة هتحلو أكتر مع الطرحة، وكمان متنسيش إن دي فرصتك الوحيدة عشان تجربيها.

فمش هيبقى قدامك فرصة تانية تلبسيها في أي مناسبة بعد كدة.

وعلى الرغم من كون الطرحة دي قطعة إكسسوار كلاسيكية مع فستان الفرح وموجودة من زمان أوي.

إلا إن لبسها مش بالسهولة في معناه انك تحطي حتة قماش تول على راسك والموضوع انتهى على كدة.

لازم تتعرفي على أنماط وستايلات طرح الزفاف عشان تقدري تقرري ايه هو المناسب ليكي.

وإزاي تنسقيها مع تسريحة الشعر اللي اختارتيها؟ والكوافيرة اللي هتعملك شعرك تقدر تساعدك في ده.

فلو اختارتي نوع معين أو طريقة معينة هتلبسي بيها الطرحة تقدري توريها لكوافيرتك.

وده عشان تختاروا أكتر تسريحة شعر مناسبة ليها أو تقرروا هتقدروا إزاي تدمجوهم مع بعض.

وممكن هي تقترح عليكي تفاصيل مفكرتيش فيها قبل كدة، وفي المقال ده إحنا حاولنا نجمع لك أكتر الطرق اللي ممكن تلبسي بيها طرحتك، وتخليكي تظهري بأشيك مظهر عشان تقدري تختاري منها اللي يناسبك.

وكمان هنحاول نساعدك أكتر ونعرفك كل طريقة فيهم بتمشي أكتر مع أنهي تسريحة؛ فتابعي معانا المقال للنهاية.

الكحكات وتسريحات الشعر المنخفضة مع الطرحة:

عادة التسريحات دي بتكون أكتر التسريحات المنتشرة في الأفراح، وخصوصاً لإن تسريحات كحكة الشعر بتكون متعددة الاستخدامات.

فبتقدري تخلي مظهرها رسمي أو كاجوال على حسب رغبتك وطبيعة الفرح، وكمان بتناسب أي نوع من أنواع فساتين الأفراح وأشكالها المختلفة.

وده برضه بيخليها مناسبة في طرق لبس طرحة العروسة المختلفة، بل هي أصلاً أكتر تسريحة بتنفع معاها؛ لإنك بتقدري بسهولة تشبكي فيها الطرحة.

وفيه خيارين متاحين ليكي وانت بتثبتي الطرحة في تسريحة الكحكة، وهي إنك تثبتيها في الجزء العلوي من فوق، وده هيخليها تبان مرفوعة شوية لفوق وتخرج لبرة.

الخيار التاني هو إنك تثبتيها في الجزء السفلي من الكحكة، وده هيخلي الطرحة أقرب لرقبتك وكتفك، وهيخليها تبان أطول.

طرق لبس طرحة العروسة مع إكسسوارات الشعر:

تقدري كمان تستخدمي اكسسوارات مختلفة في شعرك مع الطرحة تديها مظهر أكتر شياكة وأناقة بالاستايل اللي تحبيه.

وده زي إنك مثلاً ممكن تضيفي طوق من اللؤلؤ أو الخرز تلبسيه في مقدمة راسك مع كحكة الشعر المهوية اللي هتثبتي فيها الطرحة، وده هيديكي مظهر رومانسي كلاسيكي.

وتقدري كمان تثبتي الطرحة في التاج لو هتلبسي واحد في فرحك، لو هتثبتي الطرحة في الجزء السفلي من الكحكة؛ فتقدري تحطي فوقها دبابيس شعر فضية أو دهبية.

أو ممكن تثبتي في الكحكة من فوق مشط شعر بيلمع أو مترصع بالخرز، أو حتى تقدري تضيفي ورود طبيعية تنسقيها مع بوكيه الورد اللي هتمسكيه.

تسريحات شعر مختلفة مع الطرحة:

صحيح إنك محتاجة كحكة الشعر عشان تثبتي فيها الطرحة، لكن ده مش معناه إنك متقدريش تعملي تسريحات تانية معاها.

وانت بتحددي طرق لبس طرحة العروسة تقدري تختاري تعملي تسريحات ضفاير جانبية تربطيها في النهاية مع الكحكة وتثبتي عليهم الطرحة.

طرق لبس طرحة العروسة للمحجبات:

لو انت محجبة ممكن تفكري إنك كدة مش محتاجة الطرحة خلاص وكفاية الحجاب، طبعاً ده خيارك لو انت حابة ده.

لكن مظهر الطرحة على راسك مع الفستان هيديكي شكل مختلف ومميز غير شكل الحجاب اللي متعودة عليه طول عمرك.

والمميز في الموضوع إنك تقدري تثبتي الطرحة فوق الحجاب عادي بدل تسريحات الشعر، وفي طرح بتكون مصممة مخصوص لكدة.

وده بحيث تكون حجاب وطرحة في نفس الوقت، وتقدري تسألي كوافيرتك أو الخياطة بتاعتك عن الخيارات المتاحة ليكم في النقطة دي.

الطرحة قفص الطيور:

ودي مش طرحة أوي، وإنما هي عبارة عن شبكة خفيفة مخرمة بتتحط على جزء من الشعر والوش، وسموها كدة عشان بتكون شبه قفص الطيور.

والمميز في طرق لبس طرحة العروسة من النوع ده إنها بتكون بسيطة وجميلة، وموضتها مبتقدمش أبداً.

ده غير إنها بتريحك من قلق ومتاعب الطرح الطويلة، وكمان موجودة بأشكال وأنواع مختلفة تقدري تختاري منها اللي يناسب ذوقك براحتك.

وفي نهاية المقال نتمنى إننا نكون فدناكي وقدرنا نقدم لك أفكار مختلفة في طرق لبس طرحة العروسة تختاري منها اللي يناسبك في يومك المميز.

ونتمنى لك فرح سعيد يكون ذكرى جميلة ليكي متتنسيش للأبد، وبداية حياة زوجية سعيدة مليانة حب وفرح وهنا.