التعبير عن الحب بطرق مبتكرة في شهر العسل

التعبير عن الحب بطرق مبتكرة مختلفة يمكن يكون صعب شوية أو مفيش حاجة معينة ممكن تيجي على بالكم بسهولة.

وعادة بقينا متعودين ان كفاية نقول كلمة بحبك، لكن من كتر ما قلناها وسمعناها معدش ليها نفس الإحساس والفرحة القديمة بتاعة زمان، وبقينا بنتعامل مع كلام الحب زيه زي أي كلام عادي.

عشان كدة الطرف التاني بقى محتاج علامات أكتر توضح له الحب ده وإنه مش مجرد كلام وخلاص.

ومفيش أكتر من شهر عسلكم ممكن تظهروا فيه حبكم لبعض؛ لإن ده اللي هتتبني عليه حياتكم كلها بعد كدة.

وهيبقى ده مخزونكم من الحب والذكريات الجميلة لسنين قدام.

وسواء كنتم هتطلعوا رحلة شهر عسل أو ظروفكم مش هتسمح بدة وهتقضوه في بيتكم وحياتكم العادية، لكن الفترة دي لازم متمرش زي أي فترة عادية.

وعشان كدة جيبنا لكم الأفكار دي اللي تساعدكم على التعبير عن الحب لبعضكم وتبنوا ذكريات حلوة في حياتكم.

كمان الأفكار دي تقدروا تنفذوها خلال حياتكم بشكل عام في أي وقت تاني مش بس في فترة شهر العسل.

فتابعوها معانا.

عشاء على السطوح:

أكيد أي حد فينا يحب انه يخرج في عشا رومانسي مع حبيبه على أضواء الشموع وصوت الموسيقى.

لكن ايه رأيكم لو فكرنا في حاجة أكتر رومانسية وخصوصية؟

كل اللي ممكن تحتاجوه هو إنكم تطلعوا على سطوح بيتكم، حضروا بس قعدة شيك ورومانسية مع ديكورات حلوة.

واطلبوا أكل لذيذ تستمتعوا بيه مع قايمة الأغاني اللي بتحبوها وأضواء شموع بقى أو كهربا الشكل اللي تحبوه.

تخيلوا كدة إنكم قاعدين مع بعض لوحدكم براحتكم محدش ممكن يتطفل عليكم بنظراته؛ فبالتالي تقدروا تتغازلوا براحتكم، وتستمتعوا بمنظر العالم حواليكم من فوق ومحدش شايفكم.

التعبير عن الحب بالفوتوسيشن:

أكيد طبعاً عملتوا فوتوسيشن في الفرح، لكن مع ضغط الوقت والتزامكم بمواعيد الفرح ولبس الفستان والبدلة ممكن مكنتوش عارفين تنطلقوا براحتكم بالقدر الكافي.

لكن دلوقتي انتم بقيتوا في مرحلة استرخاء ومفيش حاجة ضاغطة عليكم، مش لازم تستخدموا مصور فوتوغرافي محترف.

ممكن تعملوا ده بالاستعانة بحد من صحابكم أو لوحدكم حتى، اختاروا مكان بتحبوا تروحوه مع بعض.

أو لو انتم في رحلة شهر العسل نفسها اختاروا مكان رومانسي تقدروا تاخدوا لقطات يظهر فيها مدى التعبير عن الحب بينكم.

وحتى لو في بيتكم تقدروا تاخدوا صور في كل ركن ليكم في البيت تخلدوا بيه لحظاتكم الأولى فيه.

الصور دي بعد كام سنة هتبقى مرجع ليكم إنكم تفتكروا لحظات الحب والسعادة في بداية علاقتكم، والذكريات اللي فيها هتساعدكم انكم تقدروا تتخطوا خلافاتكم ومشاكلكم اكراماً للحظات السعيدة اللي عشتوها مع بعض.

رسالة حب أو قصيدة شعر بدل كلمة بحبك:

زي ما قلنا كلمة بحبك من كتر ما بقت بتتقال فقدت رونقها وإحساسها، وبقت كلمة مبهمة مش مفهوم معناها ولا ايه القصد من وراها.

عشان كدة تقدروا تغيروا ده بإنكم تحاولوا التعبير عن الحب برسالة حب تعبروا فيها عن مشاعركم الحقيقية وايه هي الحاجات اللي بتحبوها فعلاً في الطرف التاني وإحساسكم ناحيته.

أو قصيدة شعر بسيطة، مش محتاجين تكونوا شعراء مفوهين يعني، اكتبوا اللي حاسين بيه وكإنكم بتغنوه مش أكتر، الكلام اللي بيطلع من القلب فعلاً بيدخل القلب على طول.

التعبير عن الحب بالملاحظات العاطفية:

ولو ممكنتوش بتعرفوا تكتبوا رسايل أو قصايد وتسترسلوا فيها، ممكن تعوضوا ده بملاحظات عاطفية بسيطة.

تقدروا تعملوا ده بانكم تكتبوا جمل قصيرة تعبر عن مشاعركم أو الطريقة اللي بتشوفوا بيها الطرف التاني وإيجابياته من وجهة نظركم.

وزوعوا الملاحظات دي على ورق صغير، ووزعوا الورق ده بين حاجته اللي بيستخدمها بشكل دائم.

سواء الهدوم أو أدوات التجميل بالنسبة للزوجة أو الأدوات المكتبية اللي بيستخدموها في شغلهم.

وده بحيث إنهم يلاقوا الملاحظات دي فجأة وهم مش متوقعينها وسط اليوم.

رحلة خلوية:

لو ظروفكم مش هتسمح بإنكم تطلعوا رحلة في شهر العسل؛ فممكن تعوضوا الموضوع بإنكم تطلعوا رحلة خلوية بسيطة مع بعض.

روحوا حديقة أو شاطئ لو عايشين في منطقة ساحلية سواء على البحر او النيل، ومعاكم ساندوتشات وفاكهة ومشاريبكم.

واستمتعوا بوقتكم مع بعض وانتم بتتكلموا وممددين على النجيلة.

وفي نهاية المقال نتمنى إننا نكون فدناكم وقدمنا ليكم طرق تساعدكم على التعبير عن الحب لبعضكم خلال شهر العسل، وتكون ذكريات حلوة ليكم قدام.