شهر عسل تطوعي تجربة مختلفة لمحبي الأنشطة التطوعية

الكثير من العرسان بيفكر في رحلة شهر العسل على إنها رحلة ترفيهية من بدايتها لنهايتها. لكن لو إنتم من محبي الأفكار غير التقليدية إيه رأيكم تجربوا تجربة مختلفة تمامًا، وشهر العسل بدل ما يكون صور وترفيه شوية وملل شوية يبقى شهر عسل مختلف تمامًا مفيش فيه وقت للملل.

شهر عسل تطوعي في متعة وانبساط وأعمال ليها معنى أعمق مما تتخيلوا. يعني رحلة واحدة هتستمتعوا فيها وتسيبوا أثر طيب وبداية مختلفة لحياتكم الجديدة.

شهر عسل تطوعي يا ترى يكون فين؟

اختياركم المكان اللي هتقضوا فيه شهر العسل مرتبط باهتماماتكم بالدرجة الأولى. يعني إنتم اللي هتختاروا المكان، ونوع النشاط التطوعي اللي حابين تشاركوا فيه. واحنا هنحاول نساعدكم في الاختيارات دي بأمثلة على أماكن موجودة في مصر بالفعل.

مقترحات شهر عسل تطوعي لمحبي الطبيعة

لو انتم بتحبوا الأجواء الطبيعية، وعندكم اهتمام خاص بمشاريع المحافظة على البيئة مثلًا أو حماية الحياة البرية. فهتلاقوا أماكن كثيرة جدًا في مصر تقدروا تقوموا فيها بنشاط تطوعي، على سبيل المثال محمية رأس محمد، ومحمية وادي الجمال، ومحمية وادي الحيتان، ومحمية وادي الريان. أما عن الأنشطة أو المساعدات اللي ممكن تقدموها في الأماكن دي:

• تقدروا تعملوا برنامج ترفيهي في المكان اللي اختارتوه ومعاه برنامج مساعدة سواء بشكل منفرد أو مع مجموعة.
• ابدأوا بأنشطة خفيفة زي المساهمة في توثيق الحياة البرية من خلال صور وفيديوهات.
• المساهمة في تنشيط السياحة فيديوهات قصيرة عن تلك الأماكن.
• تنظيف الشواطئ وتفعيل حملات توعية بأهمية نظافة الشواطئ.

مقترحات شهر عسل تطوعي لمحبي الحيوانات

لو متعرفوش فمصر فيها أماكن كثيرة جدًا بتستقبل متطوعين يشاركوا في الاعتناء بالكلاب والقطط. أو المشاركة في حملات توعية لحماية الكائنات الأليفة من التشرد والتعرض للحوادث.

هتلاقوا كمان حملات توعية خاصة بالحيونات البحرية والحيوانات البرية ومتواجدة بشكلٍ خاص في الغردقة وشرم الشيخ. يعني أماكن تقدروا تستمتعوا فيها بأنشطة متنوعة لـ شهر عسل تطوعي بإمتياز.

مقترحات شهر عسل تطوعي لمحبي الأطفال

هنا بقى تقدروا تستمتعوا بحوارات شيقة مع أطفال من أعمار مختلفة. خاصة أطفال ذوي احتياجات خاصة من خلال مشاركتهم في أنشطة تفاعلية أو تعليمية. أو المساهمة في تعليم أطفال القرى النائية في تعلم لغات أو فنون. الفكرة هي تبرعكم بوقت صغير من وقتكم أو جهد بسيط في مقابل سعادة أو إفادة بتقدموها لأطفال. دا مش بس هيسيب أثر طيب في نفوس الأطفال، لكن هيشعركم بسعادة غامرة لا يمكن الشعور بها في أي نشاط أخر.

تجربة لا تُنسى بأقل تكلفة

تخيلوا بقى إن بعض الأماكن ممكن تقدملكم إقامة مجانية مقابل المساعدة. دا حقيقي، ممكن تلاقوا كامبيز في الغردقة وشرم الشيخ ودهب تقدم إقامة مجانية في مقابل مساعدتهم في تنظيف شواطئ. أو في استقبال متطوعين، أو في ترتيب فعاليات تطوعية. تقدروا تعملوا بحث على جوجل هتوصلوا لأماكن كثيرة جدًا بتقدم فرص للمتطوعين يستمتعوا فيها بأجواء حماسية وتطوعية في نفس الوقت.

لو جربتم رحلة شهر عسل تطوعي داخل مصر وعجبتكم الفكرة حاولوا تنقلوها بتفاصيلها لأصدقائكم. وتخيلوا إن كل شخص هيعرف من خلالكم هيساهم في نشر فكرة مميزة ومفيدة بالشكل دا.

اقرأ أيضًا:

حفل زفاف بتجربة حسِّية متكاملة لمحبي الأفكار المختلفة.

تنظيم فرح صديق للبيئة في مصر فكرة مميزة وبرة الصندوق.