أفضل أماكن شهر العسل في الشتاء داخل مصر

شهر العسل في الشتاء داخل مصر يعني دفء وأمطار وأجواء رومانسية، وطبعًا أول ما هنفكر يبقى أكيد إسكندرية، ولكنها رغم جمالها في الشتاء إلا إنها مش المكان الوحيد المميز والمناسب لشهر عسل في الشتاء داخل مصر.

في أماكن كثيرة في كل اتجاه داخل مصر ينفع تقضوا فيها شهر عسل مميز جدًا ورومانسي. نقولكم على أماكن مناسبة ومميزاتها وإزاي تقدروا تقضوا فيها وقت لا يُنسى.

أماكن شهر العسل في الشتاء جنوب مصر

لو حابين الأجواء التاريخية والأثرية هيكون مناسب جدًا زيارة جنوب مصر، لإن طبعًا صعب زيارتهم لوقت طويل في الصيف.

الأقصر وأسوان أجوائهم سياحية بإمتياز، هتستمتعوا فيهم برحلات برية ونيلية مميزة، من الأنشطة الأساسية عند زيارتها:

• رحلة نيلية بين الأقصر وأسوان، أو تقدروا تزوروا مدينة واحدة فقط لو الوقت محدود معاكم.
• زيارة المعابد المتاحة في المكان زي الكرنك والدير البحري وأبو سمبل.
• الاستمتاع بأجواء الغروب في جنوب أسوان، أي مكان هناك سواء فندق أو حتى مركب هتقدروا تشاهدوا فيه غروب رائع.

أماكن شهر العسل في الشتاء على البحر الأحمر

طبعًا الأماكن كلها هناك دافئة طوال النهار وبالليل بس الجو بيبقى بارد وممكن نتغلب عليه بلبس ثقيل ومشروبات دافئة. لكن هناك متعة مش هتلاقوها في مكان تاني، لإن الأجواء في الشتاء بتكون هادية جدًا والسياح عددهم قليل.

الإقامة في دهب

ممكن تختاروا دهب من كل المدن المُطلة على البحر الأحمر، وهي الأكثر هدوءًا بين المدن الساحلية في المنطقة، وفيها مميزات كثيرة منها على سبيل المثال:

• شواطئها مناسبة للاسترخاء خاصة في أوقات الصباح وحتى الظهر.
• بتتوفر فيها أنشطة كثيرة زي الغطس والسنوركلينج.
• معظم المطاعم والمقاهي لها طابع رومانسي وبسيط لمحبي الأجواء الهادئة أو البسيطة.
• يمكن قضاء شهر عسل فيها بأي ميزانية سواء منخفضة أو متوسطة أو عالية.

الإقامة في الجونة

في الجونة هتستمتعوا بتجربة مختلفة شوية عن دهب، لإنها حتى في الشتاء مش هادية أوي. لكن هتكون مثالية ليكم لو من محبي الخروج ليلًا وتجربة مطاعم ومقاهي مختلفة.

لإن أكثر حاجة بتميز الجونة إنها بتوفر تجربة متكاملة من الأنشطة الترفيهية والمطاعم المحلية والعالمية، وطبعًا معظم أماكن الإقامة فيها فخمة وراقية، لذلك هي مناسبة أكثر للميزانيات المتوسطة أو المرتفعة إلى حدٍ ما.

شهر العسل في الشتاء في قلب الصحراء

هنبعد عن الأجواء الساحلية والأنشطة المائية، هنختار مكان مختلف تمامًا وتجربة مثالية للراحة والهدوء. ممكن تقضوا شهر العسل في واحة سيوة في قلب الصحراء، الأجواء فيها شتوية دافئة ولكن السَّمة الأهم الهدوء والطبيعة المحيطة من كل جانب.

وطبعًا في أنشطة كثيرة تقدروا تستمتعوا بيها، منها على سبيل المثال:

• زيارة عالم من الهدوء والاسترخاء “بحيرات الملح” تقدروا تستمتعوا بتجربة استرخاء مثالية، أو تجربوا الدفن تحت الملح.
• التخييم ليلًا في الصحراء والاستمتاع بالنجوم والسماء الصافية للغاية.
• تجربة الاستحمام في العيون الساخنة، وهي عيون دافئة وفي نفس الوقت علاجية.
• مجرد المشي في واحة سيوة وأسواقها وشوارعها متعة لا توجد في مكان آخر.

نصائح لاختيار أفضل أماكن شهر العسل في الشتاء

عشان تبقى تجربتكم مميزة ومناسبة ليكم هتحتاجوا تحددوا شوية تفاصيل:

• اختاروا المكان حسب اهتماماتكم، يعني لو بتحبوا الأماكن التاريخية روحوا الأقصر.
• ولو بتحبوا الأجواء الساحلية حتى لو في الشتاء هتبقى مدن البحر الأحمر مميزة جدًا.
• أما لو بتحبوا أجواء المشي وزيارة الأسواق والتجول في أماكن مش موجودة في مكان تاني فأكيد اختاروا سيوة.

المهم أيًا كان اختياركم من بين أماكن شهر العسل في الشتاء داخل مصر ركزوا إنكم تستمتعوا بكل لحظة، عشان تبدأوا حياتكم بأيام وذكريات لا تُنسى.