شهر العسل في أوروبا نصايح تسهل عليكم التخطيط

شهر العسل في أوروبا حلم لعرسان كتير؛ فطبعاً أوروبا يعني الرومانسية والأجواء الحميمية الرايقة.

زي مزارع العنب المدرجة وأجوائها الريفية الراقية، والشواطئ الخلابة سواء في اليونان أو كرواتيا أو أسبانيا.

أو حتى الشوارع القديمة المرصوفة بالحصى في براغ أو فيينا.

مفيش حاجة ممكن تنقص في احتفالكم بشهر عسلكم في القارة الأوروبية، لكن كتير من التجارب الممتعة دي ممكن تكلفكم ثروة.

وده لو اتصرفتم بس بانكم تحجزوا أي حاجة ممتعة تيجي قدامكم من غير ما تحسبوها كويس.

وعشان كدة لازم تركزوا في التفاصيل والإعلانات الجديدة؛ لإن كتير من شركات الطيران وحجوزات الفنادق بتعمل تخفيضات موسمية.

والتخفيضات دي ممكن تكون مفيدة وموفرة جداً ليكم، وفي المقال ده احنا جمعنا لكم كل التفاصيل اللي ممكن تحتاجوها.

عشان تعرفوا تقرروا هتسافروا فين وايه الخطة اللي هتمشوا عليها في أجازة جوازكم الأولى، وده عشان تستمتعوا بأجازتكم بأفضل طريقة.

وفي نفس الوقت تصرفوا فيها أقل المصاريف الممكنة، وتستغلوا الفايض في متع تانية؛ فتابعوا معانا المقال.

دوروا كويس قبل ما تحجزوا رحلة شهر العسل في أوروبا:

على الرغم من إن الدول الأوروبية أغلبها ملتزمة بقوانين الاتحاد الأوروبي ككل، لكن تنفيذ القوانين دي بيفرق من دولة للتانية.

وده بينطبق من أول لحظة في استقبالهم للسياح وقوانين السياحة الخارجية عندهم ونوعية السياح اللي بيقبلوهم أو لا.

وكذلك نوعية الكشوفات الصحية اللي بيطلبوها، كل دي تفاصيل محتاجين تعرفوها من الأول.

عشان متتفاجئوش بحاجة بعد ما تسافروا وانتم عند الجوازات، وتلاقوهم بيرفضوا دخولكم للبلد.

فمفيش حاجة ممكن تكون محبطة أكتر من إنكم توصلوا لحد الدولة اللي قررتم تختاروها لشهر عسلكم، وتلاقوهم بيمنعوكم من الدخول.

فبدل ما تتعرضوا لموقف محبط ويضيع فلوسكم زي ده اتأكدوا كويس من كل التفاصيل قبل ما تحجزوا أي حاجة.

اتأكدوا مرتين وتلاتة، وخططوا بس في نطاق اللي انتم عارفينه ومتأكدين منه، واختاروا المكان المثالي لشهر عسلكم.

واستمتعوا بحياتكم الزوجية الجديدة.

استفيدوا من العروض على الرحلات الجوية والفنادق:

سواء كنتم هتتجوزوا السنة دي أو السنة الجاية، بس ما دام قررتم تتجوزوا خلاص.

يبقى من المفيد والأوفر ليكم إنكم تحجزوا رحلة شهر العسل في أوروبا من بدري، وده أياً كانت درجة الطيران أو حجز الفندق اللي هتحجزوه.

بس كمان لو هتحجزوا على درجات رجال الأعمال أو الدرجة الأولى؛ فكل ما حجزتم بدري كل ما كان ده أوفر ليكم.

وده لإنكم لما تحجزوا دلوقتي؛ فانتم هتحجزوا بالسعر الحالي، لكن لو استنتيتم لاخر لحظة هتكون الأسعار زادت وخصوصاً مع فرق العملة.

وكمان تقدروا تستفيدوا من فروق الأسعار في الرحلات المختلفة؛ فممكن تعملوا تنبيه على جوجل فلايت بقايمة الدول الأوروبية اللي حابين تزوروها.

وجوجل هيجمع لكم كل عروض تذاكر الطيران المتاحة للدول دي، وتقدروا تختاروا الأوفر منها، وتحددوا وجهتكم على هذا الأساس.

وكمان من الحاجات اللي تقدروا تحطوها في اعتباركم هي إنكم تختاروا وقت برة الموسم.

عادة فترة الصيف وموسم أعياد رأس السنة بتكون أكتر الأوقات زحمة في الدول الأوروبية، وطبعاً ده معناه إن الأسعار والحجوزات في الوقت ده بتكون غالية.

لكن لو قررتم تحجزوا رحلة شهر العسل في أوروبا في مواسم الربيع أو الخريف؛ فده هيكون أوفر ليكم مادياً.

وكمان ساعتها هتقدروا تستمتعوا بفسحكم براحتكم من غير زحمة السياح ما تضايقكم ويبقى الجو هادي ليكم، وكمان الطقس هيكون مناسب فلا هو صيف وحر ولا شتا تلج.

احجزوا رحلة شهر العسل في أوروبا في فندق بسبا:

لو كنتم زرتم الدول الأوروبية قبل كدة واتفرجتوا على المناطق السياحية اللي فيها؛ فأكيد مش هتكونوا مخططين إن أجازتكم دلوقتي تكون عبارة عن رحلة سياحية.

حتى لو فيه أماكن معينة حابين تروحوها تاني مع بعض، ولكن مش هيبقى الوقت كله فيها.

بالعكس هتبقوا محتاجين وقت أكتر تقضوه مع بعض وتستمتعوا فيه بتجربة خاصة بيكم مميزة تجمعكم مع بعض.

وفي الحالة دي هيكون من الأفضل ليكم إنكم تختاروا تحجزوا في فندق فيه سبا أو منتجع صحي، وتستمتعوا بتجربة كاملة من الاسترخاء والعناية الذاتية على الطريقة الأوروبية.

ونوعية الفنادق دي بتكون فيها خدمات متكاملة وميزانيتها أوفر مما لو حجزتوا فندق عادي وروحتوا منتجع صحي منفصل.

أو احجزوا بيت خاص بيكم:

مش كل الناس بتحب تقضي وقتها في خدمة خمس نجوم وتدليك ومساج، والرومانسية بالنسبة لهم مش إنهم يقعدوا طول الوقت في أرواب بيضا ناعمة وخدمة غرف.

فلو مش دي الطريقة اللي تقدروا تحسوا فيها بالرومانسية الحقيقية؛ فبدل ما تحجزوا أوضة في فندق خمس نجوم بألف دولار في الليلة أو أكتر.

تقدروا تغيروا الخطة وتحجزوا إيجار بيت أجازات تقضوا فيه رحلة شهر العسل في أوروبا مثيرة وبأسعار معقولة أقل من الفنادق بكتير.

وفي النهاية نتمنى إننا نكون قدمنا لكم نصايح مفيدة ليكم فعلاً تقدروا تستغلوها وانتم بتقرروا تفاصيل رحلة شهر العسل في أوروبا.

ونتمنى لكم رحلة سعيدة متنسوهاش أبداً، وبداية حياة زوجية مليانة حب وفرح وذكريات جميلة تدوم معاكم للأبد.