سبع حاجات ابعدوا عنها وقت تجهيز الشقة
في وقت تجهيز الشقة كلنا بنبقى متحمسين وعندنا طاقة كبيرة علشان ننجز كل حاجة بسرعة. ونجمل بيتنا على أفضل شكل بس في وسط الزحمة واللف والدوران على المحلات والعروض بنقع في أخطاء كتير ممكن تبوظ علينا الشكل النهائي. أو تكلفنا فلوس زيادة ملهاش لازمة. أو حتى تخلينا نندم بعدين. علشان كده مهم ناخد بالنا من كل تفصيلة ونخطط كويس. قبل ما نشتري أي حاجة أو ناخد أي قرار. لأن الموضوع مش بس ديكورات أو ألوان. الموضوع أعمق من كده بكتير. لأن كل حاجة بتختارها في شقتك هتعيش معاها سنين طويلة. والاختيار الغلط بيكلف كتير سواء مادياً أو نفسياً. ومع الأسف في حاجات ناس كتير بتقع فيها من غير ما تاخد بالها. وبتفكر إنها حاجات بسيطة. بس الحقيقة إنها ممكن تعمل فرق كبير جداً في راحتك. وشكل بيتك بعد كده.
سبع حاجات ابعدوا عنها وقت تجهيز الشقة
الموضوع محتاج تركيز وتخطيط دلوقتي هنتكلم عن سبع حاجات مهم جداً تبعد عنها وقت ما تيجي تجهز شقتك. علشان توفر على نفسك وقت ومجهود وفلوس. وتضمن إن بيتك يطلع بشكل عملي ومريح. وفي نفس الوقت شيك ومناسب لأسلوب حياتك، عشان كدا ركزوا في كل معلومة في الفقرات الجاية.عشان تتجنبوا أخطاء كتير. وكمان توفروا وقت وفلوس وراحة اكتر.
١-ما تشتريش كل حاجة مرة واحدة
كتير من الناس بيقعوا في الفخ ده. إنهم يروحوا يشتروا كل حاجة مرة واحدة في أول مشوار تحضيرات وده بيخليهم يجيبوا حاجات كتير مش محتاجينها. أو حاجات يندموا إنهم اشتروها. لما يلاقوا حاجة أحسن بعدين. عشان كدا بنقول التجهيز محتاج صبر ولفة كويسة. وشوية مقارنات وممكن الأسعار تختلف من مكان للتاني. أو تلاقي عروض فجأة. وكمان أوقات بتحصل تغيرات في الديكور أو تخطيط الشقة. فالأفضل تمشي خطوة بخطوة. وتشتري بالراحة على حسب الحاجة الحقيقية مش الحماس اللحظي.
٢-بلاش تبالغ في الديكورات
الناس بتحب تخلي البيت شكله حلو وأنيق وده طبيعي. بس ساعات الحماس بيخلي بعض الناس يزودوا في الديكورات بشكل مبالغ فيه. ويحطوا حاجات كتير مالهاش لزمة غير إنها تزنق المكان. أو تخلي الشقة شكلها كركبة شيك. عشان كدا حاول تخلي ديكور بيتك بسيط ومريح للعين. ومناسب للمساحة؛ لأنك لما تعيش في البيت هتحتاج الحركة. والراحة مش بس الشكل وخصوصاً في الشقق الصغيرة. لأن البساطة بتخلي المكان يبان أوسع ومترتب أكتر.
٣-إياك تختار الألوان من غير رؤية طبيعية
كتير بيشوفوا صور على الإنترنت لألوان دهانات أو مفروشات. ويقرروا يختاروا نفس اللون. ويفاجئوا لما يطبقوه في الشقة إنه طلع مختلف تماماً عن اللي شافوه. السبب إن الإضاءة بتفرق جداً. والألوان بتتغير حسب الضوء الطبيعي والإضاءة الصناعية كمان. فدايماً لازم تشوف عينة حقيقية في المكان قبل ما تقرر. ولو قدرت تشوف اللون في شقة على الطبيعة يبقى أحسن كمان. علشان تتأكد إن اللون عاجبك فعلاً في كل ظروفه.
تجهيزات العروسة، تجهيزات الشقة، تجهيزات العروسة 2025
٤-بلاش تشتري أجهزة كهربائية أكبر من احتياجك
ناس كتير بيقعوا في غلطة إنهم يجيبوا أجهزة كتير قوي. على أمل إنهم “يحوشوا للمستقبل”. زي غسالة ١٤ كيلو أو تلاجة ضخمة. وهما أصلاً اتنين بس. أو لسه في بداية حياتهم. الغلط هنا إنك بتدفع فلوس زيادة. في حاجة مش هتستعملها. وفي نفس الوقت بتاخد مساحة كبيرة من الشقة بدون داعي. فالأفضل تشتري الأجهزة اللي تناسب عدد الأفراد الحالي والمساحة المتاحة. وكل ما الأسرة تكبر أو الظروف تتغير ساعتها ممكن تطور.
٥-متشتريش حاجات بس علشان موضة
التريندات بتتغير بسرعة جداً. وكل شوية تطلع موضة جديدة في الدهانات أو الأرضيات أو حتى الأثاث. بس ده مش معناه إنك لازم تمشي ورا كل تريند. لأن في النهاية الشقة بتتعمل علشانك إنت تعيش فيها. مش علشان تبهر الناس يوم الفرح أو التصوير. عشان كدا اختار اللي يناسب ذوقك انت وشخصيتك واللي تحس إنك مش هتزهق منه بعد شوية. لأن الموضة بتروح بس راحتك وذوقك هما اللي بيكملوا معاك.
٦-بلاش تفرش الشقة كلها قبل ما تعيش فيها
فيه فرق كبير بين التخطيط النظري والواقع. ساعات بنفرش الشقة على الورق أو في دماغنا. بس لما نعيش فيها نكتشف إن في حاجات محتاجة تتغير. علشان كده بلاش تفرش كل حاجة من أول يوم. سيب مساحة للتجربة والمرونة. ولما تبدأ تعيش في المكان هتعرف إيه اللي محتاج تعديل أو إضافة أو حتى إلغاء. وبكده هتضمن إن كل تفصيلة فعلاً بتخدم راحتك. مش بس شكلها حلو.
٧-ابعد عن الاستسهال في التشطيبات
ناس كتير بتفتكر إن التشطيب السريع أو استخدام خامات رخيصة هو توفير. لكن الحقيقة إنه استنزاف مستقبلي؛ لأن أي حاجة هتبوظ بسرعة هتضطر تصلحها أو تغيرها. وده هيكلفك أكتر من إنك كنت عاملها صح من الأول. سواء سباكة أو كهرباء أو دهانات أو سيراميك. اهتم بالجودة وخلي الأولوية للحاجات الأساسية قبل الشكل. علشان ما تضطرش تعيد من الأول بعد سنة ولا اتنين.
هل محتوى المقال دة كان مفيد بالنسبة لك؟
نعم، مفيد!لا!
