زيارات الأهل والصحاب للعروسين في عش الزوجية أفكار عشان تقضوا وقت ظريف فيها
زيارات الأهل والصحاب للعروسين أول حاجة بتشيلوا همها بعد الفرح، يمكن لو طلعتوا في رحلة شهر العسل بعد الفرح على طول تأجلوا الموضوع شوية.
بس برضه أول ما هترجعوا بيتكم هيبقى كل قرايبكم وصحابكم مستنينكم على أحر من الجمر عشان يجوا زيوروكم ويباركوا لكم.
ودلوقتي مش هتبقى مجرد زيارة للمباركة وبس.
إنما كمان هيبقوا مستنيين تحكوا لهم عن مغامراتكم في شهر العسل ويشوفوا صور رحلتكم.
ورغم إن دي لفتة جميلة من حبايبكم واهتمام منهم بيكم.
إلا إن الزيارات دي غالباً بتكون مليانة بعادات وتقاليد قديمة واختلاطات مش مريحة ممكن متبقوش حابينها.
ومع إننا مننصحكوش بإنكم تلغوا الزيارات دي خالص وتتهربوا منها؛ لإن أهلكم وصحابكم وقرايبكم عايزين فعلاً يحتفلوا بيكم.
إلا إن فيه طرق تخليكم تتفادوا المواقف اللي ممكن متعجبكوش وتخلي الزيارة ممتعة للجميع سواء كانوا الضيوف أو العرسان.
وفي المقال ده احنا حاولنا نجمع لكم بعض الأفكار اللي تقدر تساعدكم في تخطي الفترة دي بأقل جهد من الضغوطات.
فتابعوا معانا المقال.
استضافة زيارات الأهل والصحاب للعروسين برة عش الزوجية:
أكتر حاجة مرهقة عموماً في الزيارات دي فكرة إن كل حد بيجي بيبقى عايز يتفرج على الشقة الجديدة وفرشها وعفشها ولا كإنه داخل متحف!
ده غير الكركبة اللي بتحصل في البيت خصوصاً لو الضيوف دول جايبين معاهم عيالهم.
وانت لسة عروسة جديدة وأكيد مش عايزة تبهدلي عفشك الجديد في بهدلة العيال.
ولا عايزة تضيعي وقتك كله في بداية جوازك إنك تفضلي ترتبي وتنضفي ورا الضيوف لما يمشوا!
وعشان كدة لو مكنتيش من محبي التباهي بشقتك الجديدة قدام الضيوف.
وإن أنت اللي عايزة تفرجيهم بنفسك على كل أوضة جبتيها وجهاز فرشتيه، يبقى أنسب حل عشان تهربي من الضغط ده كله هو:
إنك تعلني إنك هتستقبلي الضيوف اللي عايزين يجوا يباركوا لك في مكان تاني غير بيتك.
المكان ده ممكن يكون بيت أهلك عند مامتك أو بيت حماتك لو ساكنة معاكي في نفس العمارة أو الشارع.
حفلة شاي أو غدا متأخر:
ولو فيه إمكانية فتقدروا تعلنوا عن تنظيم حفل استقبال بدل زيارات الأهل والصحاب للعروسين في عش الزوجية.
بحيث إن كل اللي عايز يبارك لكم بدل ما يجي البيت تقدروا تستضيفوهم في مكان برة البيت.
وده زي نادي أو حديقة أو مطعم أو كافيه مفتوح.
وتقدروا تضيفوا لمسة من المرح والإبداع على الحفلة البسيطة دي بإنكم تختاروا لها موضوع معين بوجبات معينة مناسبة ليه في وقت محدد من اليوم.
وبكدة كل الناس تبقى فاهمة إن ده الوقت والمكان اللي انتم حددتوه عشان تستقبلوهم فيه.
وبعد كدة مش هيبقى متاح ليهم إنهم يجوا يباركوا لكم في أي وقت تاني.
ألعاب وأنشطة في زيارات الأهل والصحاب للعروسين:
ولإن الزيارات دي عادة بتضم قرايبكم انتم الاتنين وصحابكم اللي ممكن ميكونوش عارفين بعض قبل كدة.
أو الظروف مسمحتش انهم يتعرفوا ببعض كويس، وممكن كمان انتم نفسكم متبقوش عارفين قرايب وصحاب الطرف التاني كويس.
بالتالي هتبقوا محتاجين تكسروا حاجز عدم التعارف بينكم وبين كل الأطراف.
وأسهل طريقة تحققوا بيها ده إنكم تضيفوا على الوقت اللي هتقضوه لعبة ممتعة أو لعبتين.
وتخلوا الكل يشاركوا فيها ويستمتعوا بيها.
الألعاب دي ممكن تبقى لعبة معاكم كعروسين جداد إن الضيوف يسألوكم أسئلة تخمنوها عن بعض وتبين مدى معرفتكم ببعض.
أو ممكن تشتركوا كلكم في إنكم تعملوا أنشطة جماعية زي إنكم ترسموا لوحات أو تصمموا أعمال فنية مع بعض.
وبكدة تبقى ذكرى لكل واحد من الضيوف عن اليوم ده ياخدها معاه وهو مروح.
أو تطبخوا وجبة خفيفة تاكلوها خلال اليوم، أما لو هتقضوا اليوم برة البيت أصلاً؛ فممكن تختاروا تمارسوا نشاط ترفيهي متاح في المكان اللي هتكونوا فيه.
زي إنكم لو في نادي مثلاً؛ فممكن تلعبوا رياضة جماعية بتحبوها زي الكورة مثلاً، وتتقسموا لفرقتين فرقة العريس وفرقة العروسة مثلاً.
وفي النهاية نتمنى إننا نكون قدمنا لكم أفكار ممتعة تقدروا تخلوا بيها زيارات الأهل والصحاب للعروسين وقت ظريف يكون ذكرى حلوة ليكم وليهم بدل خنقة الرسميات.
ونتمنى لكم بداية حياة زوجية سعيدة تدوم للأبد وكلها فرح وهنا ولعب وأوقات ظريفة وممتعة.
هل محتوى المقال دة كان مفيد بالنسبة لك؟
نعم، مفيد!لا!
