روتين العناية بالشعر قبل الفرح

من أهم الحاجات اللي بتهتم بيها العروسة العناية بالشعر. وضروري أنها تبدأ تهتم بشعرها قبل الفرح بمدة طويلة (3 شهور على الأقل). علشان كدة في المقال دة حنقولك ازاي تهتمي بشعرك في خطوات بسيطة بس الأهم هو الالتزام بيها ، وحتحسي بفرق واضح. 

معرفة نوع شعرك أولى خطوات العناية بالشعر

لازم تعرفي نوع شعرك، ونوع فروة الرأس، لأن بناءا على كدة حتعرفي تعملي الروتين اليومي بشكل صحيح. وأنواع الشعر كتير على سبيل المثال: مفرود أو كيرلى أو خشن أو ناعم، وفروة الرأس دهنية أو جافة. 

كم مرة تقدري تغسلي شعرك في الأسبوع؟

غسيل الشعر مهم جدا، ولكن له شروط حسب نوع فروة الرأس، على سبيل المثال: لو فروة رأسك دهنية وشعرك مفرود لازم تغسليه يوميا بالشامبو، ولو الفروة جافة وشعرك كيرلي أو خشن ممكن تغسليه من مرتين ل 3 مرات في الأسبوع حسب احتياجه. 

ازاي تستخدمي الشامبو والبلسم بالطريقة الصحيحة؟

الشامبو: لازم تحطيه بشكل مباشر على فروة الرأس، ودة لأن مهمته الرئيسية أنه ينضف الفروة بشكل جيد، ومش شرط تحطيه على الشعر كله.

البلسم: يعمل على ترطيب الشعر، ولو شعرك ناعم ومفرود الأفضل تحطيه على الأطراف، ولو خشن وكيرلي حطيه على الشعر كله.

العناية بالشعر تبدأ بالتغذية السليمة

الأكل الصحي مهم جدا للعناية بالشعر، وخصوصا الأكل اللي يحتوي على الزنك والحديد وفيتامين B5 وأوميجا 3 زي الأسماك، وحتلاحظي الفرق. 

شرب الماء من أهم خطوات العناية بالشعر

اشربي من 2-3 لتر يوميا، حتلاحظي زيادة جمال شعرك، وحتلاقي التساقط قل بشكل كبير. 

احمي شعرك من الحرارة

السشوار والبيبي ليس من الحاجات اللي ممكن تدمر شعرك مع الوقت، وخصوصا لو استخدمتيها بشكل متكرر، ومن غير حماية، والحل أنك تقللي استخدامهم قدر الإمكان، وتظبطي الحرارة على المتوسطة أو المنخفضة واستخدمي سيروم مخصص لحماية الشعر من الحرارة. 

ازاي تسرحي شعرك صح بعد الاستحمام

لو شعرك ناعم وخفيف استني شعرك ينشف وبعدين سرحيه، لكن لو شعرك كيرلي حاولي تسرحيه وهو رطب وعليه ماية. وفي الحالتين لازم تستخدمي فرشاة أسنانها واسعة، ومتسرحيش شعرك كتير مرة أو مرتين بحد أقصى كافيين لتسريح الشعر. 

استخدام الصبغة والفرد والبروتين

حاولي تستخدمي منتجات طبيعية، وخالية من الأمونيا لأنها بتأثر على الشعر بشكل قوي، ولو استخدمتي المنتجات دي استخدميها على فترات طويلة لأنها حتى لو غالية بتدمر الشعر مع تكرار استعمالها على فترات قريبة. 

تساقط الشعر

تساقط الشعر من المشكلات اللي بنات كتير بتعاني منها بسبب عوامل الجو وقلة التغذية والضغط النفسي، والحل أنك تحاولي تستخدمي شامبو أو زيوت تقلل من تساقط الشعر على سبيل المثال: مادة الكافيين، وزيت الروزماري وزيت بذور العنب، وحاول تستخدميهم 3 شهور على الأقل لنتيجة أفضل. 

هيشان الشعر

استخدمي زيوت او منتجات تزود من ترطيب شعرك زي زيت الأرجان وزيت الجوجوبا وزيت جوز الهند أو مادة البانثينول، وخللي بالك لأن كل شعر بيناسبه زيوت معينة، فمش شرط يناسبك كل الزيوت الطبيعية. 

قشرة الشعر 

من أكتر المشاكل اللي بتواجه بنات كتير، وممكن تخليها تتحرج قصاد الناس، حاولي تستخدمي منتجات طبية بتقلل القشرة زي شامبو نيزابكس وشامبو نيزورال وهي شامبوهات مضاد للفطريات اللي بتسبب معظم الوقت قشرة الشعر. 

نصائح أخرى للعناية بالشعر

• ابتعدي قدر الإمكان عن أشعة الشمس، لأنها تضر الشعر بشكل كبير وعلاجه بيكون صعب وبياخد وقت. 
• متجربيش 10 منتجات للشعر في وقت واحد. دة أكبر سبب يخلي شعرك يتدمر بالتدريج. خلي شعرك يتعود على المنتج عشان تلاقي النتيجة اللي ترضيكي. 
•  استخدمي فوطة مايكروفايبر لتنشيف شعرك بعد الاستحمام لأنها مش بتضر شعرك، ومش بتعمل على هيشان الشعر. 

اقرأ أيضا: منتجات تجميل لازم تكون على تسريحتك وفي شنطتك

اقرأ أيضا: دور العريس في التخطيط للفرح