رحلة شهر العسل إزاي تختاروها؟

وانتم بتجهزوا لفرحكم أكيد طبعاً من الحاجات اللي بتشغلكم هو هتروحوا فين في رحلة شهر العسل؟

سواء كنتم ناويين تقضوا شهر العسل جوة مصر أو برة مصر؛ فأكيد ده سؤال بيحيركم؛ لإن الأماكن كتيرة والخيارات كتيرة.

وممكن تبقوا مش عارفين تختاروا بناء على أيه؟

وسواء كنتم هتسافروا برة أو جوة مصر؛ فمش لازم تركزوا على الأماكن المشهورة اللي عادة ما بتكون تكاليفها غالية وترهقوا ميزانيتكم.

العالم مليان بالأماكن والمدن الرائعة اللي على الرغم من روعتها ملهاش نفس شهرة أماكن تانية.

ودي حاجة كويسة لإن الإقبال عليها مبيكونش كبير وبالتالي الأسعار فيها بتكون أقل.

وفي نفس الوقت هتبقى مغامرة بالنسبة لكم في اكتشاف مكان جديد مسمعتوش عنه كتير.

وفي المقال ده احنا هنحاول نقدم لكم أفكار مختلفة تساعدكم في تحديد المكان اللي تحبوا تروحوه وتقضوا أول أيام حياتكم الزوجية فيه مع بعض؛ فتابعوا معانا.

رحلة شهر العسل الصيفية:

لو هتجوزوا في الصيف يبقى من الطبيعي إنكم تختاروا أماكن فيها شط وبحر، وطبعاً أشهر الأماكن في مصر اللي الناس كلها قضوا فيها شهر عسلهم قبل كدة كانت إسكندرية والغردقة.

لكن الحقيقة إن مصر فيها أماكن تانية كتير بتطل على البحر، وقليل اللي بيستغلها ويقضي فيها رحلة شهر العسل.

وده يخليها مميزة بكونها تبقى أهدى وأقل في الزحمة، خصوصاً إن الوجهات المعتادة دي الناس بتروحها تصيف طول الوقت.

وده بيخليها زحمة جداً ومش ممتعة في الرحلة اللي كل عروسين بيكونوا مستنينها بفارغ الصبر وعايزين يقضوا فيها وقت رومانسي هادي من غير زحمة.

والأماكن دي في مصر هي: السويس مثلاً ومرسى علم ومطروح والعين السخنة وجمصة وسفاجا ودمياط ورشيد.

أما لو هتسافروا برة مصر؛ فعادة الأماكن المشهورة في الرحلات دي بتكون فرنسا وتركيا وانجلترا وجزر المالديف.

فلو حابين تغيروا القاعدة وتروحوا أماكن جديدة تكون بره فيها شط وبحر، وكمان تكون تكلفتها أقل سواء في السفر أو تكاليف الإقامة.

فممكن تجربوا أماكن زي الهند وماليزيا وسريلانكا وتايلاند واليونان ومورشيوس واليابان وغانا.

أما لو حابين تروحوا بلاد عربية فممكن تبقى لبنان أو المغرب هي وجهتكم في رحلة شهر العسل في الصيف.

رحلات شتوية:

أما لو هتجوزوا في الشتا؛ فده غالباً هيكون معناه إنكم مش هتنزلوا البحر، وفي الحالة دي ممكن تروحوا بلاد مفيهاش بحر زي الأقصر وأسوان جوة مصر مثلاً.

أما لو هتسافروا برة مصر؛ فتقدروا تستمتعوا بالدول الأوروبية الشتوية وبدل ما تنزلوا المية تقدروا تتزلجوا على الجليد، وده في دول زي النمسا وإيطاليا ورومانيا.

أو لو حابين تنزلوا المية رغم الشتا؛ فممكن تختاروا مناطق ساحلية شتوية بيكون بحرها دافي في الشتا.

وده زي دهب وبورسعيد في مصر مثلاً، وجمهورية الدومينكان وكوبا والبرتغال برة مصر.

وبرضه لو حابين تروحوا دولة عربية في رحلة شهر العسل في الشتا وتنزلوا فيها البحر فهتبقى الإمارات هي وجهتكم الأنسب في الحالة دي.

رحلات بحرية:

وده يمكن نوع من الرحلات ثقافته مش منتشرة أوي في مصر، لكنه موجود، وهو إنكم تحجزوا على سفينة تلف بيكم كذة دولة.

الميزة في الرحلات دي إنكم بتقدروا تزوروا وتتفسحوا في كذة مكان حوالين العالم، وفي نفس الوقت مش محتاجين تشيلوا هم حجز وتكاليف الإقامة فيه.

وده لإنكم بتكونوا مقيمين بشكل أساسي في الباخرة اللي بتلف بيكم في البحر وهي بتروح الدول دي.

وبتنزلوا منها تتفسحوا وتروحوا الجولات السياحية اللي انتم عايزينها وترجعوا لها تاني.

وبتستمتعوا خلال الرحلة بمنظر البحر والسفر فيه، وبالبرامج الترفيهية والعروض اللي بتكون موجودة على الباخرة.

وبتقابلوا ناس من مختلف الجنسيات وتعيشوا تجربة ثرية وممتعة، وتعملوا ذكريات جميلة متتنسيش.

مغامرات في رحلة شهر العسل:

أما لو انتم بتحبوا حياة المغامرات وخوض تجارب جديدة؛ فممكن تفكروا في حاجة مختلفة في رحلتكم.

ممكن رحلتكم تبقى عبارة عن رحلة تخييم أو سفاري في الهواء الطلق بعيد عن زحمة الناس ودوشتهم.

وطبعاً رحلة زي دي مش هتكون مدتها طويلة هي يومين تلاتة بس، تطلعوا فيهم في أماكن التخييم ومعاكم كل اللي هتحتاجوه وتنصبوا خيمتكم، وتعيشوا يومينكم لوحدكم.

وفي رحلة زي دي مش محتاجين تطلعوا برة مصر لإننا عندنا أماكن تخييم كتير جداً متاحة.

في القاهرة نفسها تقدروا تخيموا في محمية وادي دجلة، وكمان برة القاهرة في أماكن متاحة للتخييم فيها.

ودي زي مرسى علم ودهب وواحة سيوة ومنطقة الصحاري البيضاء والسوداء في الصحراء الغربية.

وفي نهاية مقالنا نتمنى إننا نكون قدرنا نقدم لكم أفكار تستغلوها في تحديد وجهتكم في رحلة شهر العسل.

ونتمنى لكم وقت ممتع وجميل مليان حب وسعادة تبدأوا بيه حياتكم الزوجية الجديدة بأمل وفرح.