رجيم صحي لإنقاص الوزن قبل الزواج

لو فرحك قرب وشايفة أو شايف إن جسمك مليان شوية، ونفسك يكون مشدود ورشيق بطريقة صحية بدون لعب في الهرمونات. تعالى أقولك على رجيم صحي لإنقاص الوزن قبل الزواج مناسب للشباب والبنات وعن تجربة.

نظام غذائي للتخسيس بدون تكاليف

من اكتر الحاجات ال ممكن تهبطك ومتعملش رجيم صحي لإنقاص الوزن هو التكلفة العالية للطلبات ال بيكتبوا أخصائي التغذية. علشان كده تعالى نشوف نظام غذائي للتخسيس بدون تكاليف. مع مكملات غذائية مهمة لصحة جسمك بشكل طبيعي.

أولًا هنعتمد نظام غذائي ب1500 سعر حراري، ونعتمد على زيادة البروتين في الوجبات الغذائية بتاعتنا ال هيكونوا 3 وجبات أساسية ووجبة أو 2 سناكس. وفي آخر المقال هقولك على خطوات نجاح الرجيم الصحي لإنقاذ الوزن. تعالى ندخل على النظام الغذائي:

فطار رجيم صحي لإنقاص الوزن

3 معالق جبنة بدون ملح أو خفيفة ملح مع رغيف عيش وطبق سلطة خضرا + كوباية عصير برتقان فريش من غير سكر. ممكن من غير العصير مع كوباية الشاي بتاعتك أو القهوة بملعقة سكر أو من غير لو تقدر تستغني عن السكر.

بدائل الجبنة

2 بيضة مسلوقة، أو كوباية حليب خالي الدسم، أو 3 شرايح تركي مدخن لو هتعرف وتدلع نفسك يعني.

بدائل العيش

توست، أو معلقتين شوفان، أو معلقتين كورن فليكس.

وجبة الغداء لدايت صحي

200 جرام لحمة مشوية أو قطعة قد كف الايد لو مفيش عندك ميزان + طبق خضار مشوي أي نوع خضتر زي الكوسا والفلفل والبصل وهكذا أو طبق خضار أخضر بسلة أو لوبيا وغيره + طبق سلطة خضراء.

وطبعًا رز مش هقولك 4 معالق أو 6 معالق بس، بس هقولك كل لما تشبع بس خلي البروتين في الأول وبعدين كمل بسلطة ورز وطبق الخضار.

بدائل اللحمة

200 جرام سمك مشوي، أو 200 صدور فراخ، أو 150 جرام كفتة مشوية في البيت، أو برجر مصنوع في البيت برضه، 120 جرام كبدة قيمة 4 معالق مثلا.

بدائل الرز

نقدر نستبدل الرز بالمكرونة، أو الرز البسمتي هيكون أفضل هو والرز البني، أو كينوا، أو 2 توست وياريت أقل.

وجبة العشاء

3 معالق شوفان، وكوباية حليب خالي الدسم يعني مفيش عليها قشطة، وثمرة فاكهة زي التفاح مثلا مش بطيخة يعني وممكن ناخد كوباية قطع بطيخ عادي. + 10 حبايات مكسرات أي نوع فول سوداني، كاجو، عين جمل، فستق اي حاجة.

بدائل الشوفان

رغيف عيش بلدي، أو رغيف توست بني، أو 4 معالق بطاطس مهرووسة.

بدائل الحليب

3 معالق فول، أو معلقتين جبنة خفيفة ملح، أو 2 بيض اومليت، أو شريحتين شيدر لو هتعرف وتتدلع.

السناك بين الوجبات لرجيم صحي

الاسناك الأول:

كوباية زبادي، أو كوباية زبادي يوناني، أو كوباية حليب خالي الدسم، أو 2 تمرة. + معلقتين كاكاو أو قرفة لزيادة الحرق.

السناك التاني:

تفاحة، أو قطعتين شيكولاتة دارك تقدري تعمليها في البيت بمعلقتين كاكاو وملعقتين زيت جوز هند ومعلقة صغيرة سكر أو من غير سكر.

نقدر نشرب قهوة طول اليوم لغاية 3 كوبايات أو شاي.

نصائح نجاح النظام الغذائي

علشان نخس أحسن وزن ودهون من غير جسم مترهل لازم نعمل تمارين علشان نشد الجسم ونبني عضلات. ويساعد على كده البروتين ال بناكله مع النصائح دي:

• مشي نص ساعة يوميا غير النشاط اليومي العادي بتاعنا + تمارين كارديو زي الجري والسباحة أو تمارين الرقص مثلآ.
• تمارين مقاومة مرتين ع الاقل في الاسبوع، وهي التمارين بالأوزان أو بوزن الجسم زي تمرين بلانك، والاسكواتس. لأن الرياضة وصحتك مرتبطين ببعض.
• بدل العيش بالرز عادي لكن متوقفش كارب أو كربوهيدرات انت كده بتدمر جسمك.
• النزول في الوزن مش بس على الميزان، راقب شكل جسمك ولبسك عليك.
• اشرب ماية أقل حاجة 3 لتر في اليوم، منهم كوباية أول ما تصحى من النوم.
• نام بدري واصحى بدري 8 ساعات متواصلة في اليوم ضروري.
• قلل سكر على قد ما تقدر.
• لو بوظت الرجيم في وجبة اعتبر اليوم فري وكمل عادي تاني يوم.
• لو بوظت الرجيم يومين وتلاتة كمل عادي بعدها متوقفش.

وافتكر ان كل حاجة بتيجي بالاستمرار والإرادة، وخليك واثق في نفسك انت بتعمل كده علشان صحتك مش علشان حد وفي أسابيع قليلة هتلاقي نتيجة رجيم صحي لإنقاص الوزن قبل الزواج وحتى من غير من زواج.