ديكور حائط التلفزيون أفكار هتخلي الليفينج روم أخر شياكة

ديكور حائط التلفزيون بقى أمر محير جداً في الفترة الأخيرة.

زمان كان التلفزيون صغير وبيتحط على ترابيزة صغيرة في جنب من الليفنج روم.

وكان ده بيخليه متاح لكل اللي قاعدين انهم يشوفوه لو بيتفرجوا على حاجة وخلاص على كدة.

لكن مع التكنولوجيا الحديثة التلفزيون بقى شاشة كبيرة بتتعلق ع الحيطة، وده يخلينا طول الوقت نفكر إزاي ندمجه بشكل يتناسب مع بقية الديكور في المكان.

وعشان كدة دايماً التلفزيونات ليها سمعة سيئة مع مهندسين الديكور.

فعلى الرغم من أهمية الجهاز ده لينا كلنا كوسيلة ترفيه وإعلام ومفيش بيت يقدر يستغنى عنه.

إلا إن مهندسين الديكور بيشوفوا انه مستطيل أسود قادر يبوظ لهم كل الديكور اللي اشتغلوا عليه.

لكن ده مش معناه إن مفيش حل.

لا في حلول تقدر تاخد التكنولوجيا دي في حضنها بدل ما تبقى الحرب دايرة بينهم طول الوقت.

وعشان كدة احنا في في المقال ده جبنا لكم أفكار مختلفة تقدروا تنفذوها بحيث يدمجه في الديكور.

وبكدة يبقى المظهر العام متداخل ميتحسش فيه بأي تنافر بين مكوناته؛ فتابعوا معانا المقال.

مكتبة وتلفزيون:

من أكتر الأفكار الشائعة حالياً هي دمج التلفزيون مع مكتبة وراه.

وده بإن ديكور حائط التلفزيون يكون عبارة عن مكتبة حقيقية.

وبكدة نبقى دمجنا كل وسائل الترفيه والتثقيف مع بعضها، فالمكتبة هي شهادة فعلية على ثقافتكم ومهاراتكم الفكرية.

وده غير إن أغلفة الكتب الملونة هتديكم خيارات أوسع في التصميم واستخدام الألوان، وهتدي عناصر جذب للمكان.

ديكور حائط التلفزيون بورق الحائط:

ومن الاتجاهات الحديثة هنا هي إننا نخلي الحيطة نفسها مختلفة ومزخرفة عن بقية حيطان الأوضة.

وده باستخدام ورق حائط مخصوص ليها، فعلى حسب المختصين في الديكور إن الزخرفات دي هتضيف عمق وجذب بصري للمكان.

والرائع في ده إنه هيكون من غير ما تغطي على الديكور في المكان كله.

ومن الأفضل إن ورق الحائط في الحالة دي يكون ورق ملون، والنوع الأفضل هو اللي يكون بشرايح رأسية أبيض واسود، وده عشان يبقى متناسق مع التلفزيون وهو مطفي.

دولاب حيطة مخصص للتلفزيون:

ومن الأفكار اللي تقدروا تستخدموها في تنفيذ ديكور حائط التلفزيون هي إنكم تصمموا له دولاب في الحيطة اللي هيتحط عليها، وفيها مكان مخصص ليه.

وده بحيث إن الجزء العلوي من الدولاب بيكون مفتوح فيه مكان كبير للشاشة وحواليها أرفف صغيرة تسمح ان يتحط فيها أنتيكات صغيرة أو كتب أو حاجات من النوع ده.

أما من تحت فبيكون مقفل بأبواب وأدراج للتخزين، ممكن تستخدموها في تخزين أي مستلزمات مش حابين انها تظهر في المكان أو تعمل كركبة في الأوضة.

وممكن تصميم الدولاب ده يكون بتصميم كلاسيكي تقليدي لو ده الاستايل اللي انتم معتمدين عليه في شقتكم أو في شكل الليفنج روم تحديداً.

أما لو انتم معتمدين على الاستايل المودرن أو العصري؛ فممكن تعتمدوا في تصميمه على المعدن الأنيق أو الخرسانة الصناعية.

أو ممكن برضه تعتمدوا على تصميمات الخشب بس في شكله المودرن اللي مبيكونش فيه أي زخرفات، واللي بتكون ألوانه غامقة في درجات البني.

نصايح تلائم بين ديكور حائط التلفزيون والمكان:

حطوا في اعتباركم إن التلفزيونات وهي مقفولة بيكون لونها أسود وبس.

وعشان تعملوا تناسق لوني بينها وبين الديكور في المكان هيكون من الأفضل إنكم توزعوا عناصر لونها أسود في الأوضة.

وعلى سبيل المثال ممكن تستخدموا كرسي جانبي أسود بذراعين وشكل هندسي، وده هيناسب الديكورات المودرن والاستيل.

كمان ممكن تحطوا إضاءات فرعية في المكان حوالين التلفزيونات ده هيدي حيوية للمكان.

وتقدروا تستخدموها لوحدها في لياليكم الرومانسية قدام التلفزيون.

وفي نهاية المقال نتمنى إننا نكون قدرنا نفيدكم ونقضي على حيرتكم في إزاي تخلو ديكور حائط التلفزيون جذاب وشيك وتدمجوه مع باقي الديكور في المكان.

ونتمنى لكم بداية جديدة لحياة أبدية سعيدة في عشكم الجديد اللي بتختاروا كل تفصيلة فيه مع بعض.