ديكورات كتب كتاب جديدة ومختلفة تناسب ذوقك

تقريبًا اهتمام العروسة باختيار ديكورات كتب كتاب جديدة أصبح لا يقل عن اهتمامها باختيار قاعة الفرح أو اختيار الفستان بقى على نفس درجة الأهمية من اهتمامها بالتفاصيل وتماشي الديكور مع شخصيتها وفستانها وحتى وضعيات التصوير اللي عايزة تتصورها.

وعشان أهمية الديكور ليكي هنهتم بكل تفصيلة فيه وهنساعدك تختاري أنسب حاجة تبسطك وتميز يومك.

إزاي تختاري ديكورات كتب كتاب جديدة ومميزة؟

مبدأيًا هو الاختيار مش صعب، خاصة لو حددي شوية نقاط تساعدك على الاختيار. والاختيار هيبقى أسهل وأسهل كل ما عرفتي تحددي اللي إنتي محتاجاه. واحنا هنسهل عليكي بإنك تحددي اختياراتك في النقاط دي:

أولًا: الفكرة العامة للديكور

يعني الاستايل اللي هيقوم عليه الديكور كله، سواء بقى الغالب فيه الزهور. أو مثلًا تحبي اللمحات الكلاسيك شوية. أو عايزة ديكور جريئ ويدمج أكتر من حاجة في نفس الوقت. وطبعًا تحديد لون الديكور أو اللون الغالب فيه.

أول حاجة لازم تفكري فيها لما تختاري ديكورات كتب كتاب هي الفكرة العامة أو الثيم اللي عايزة تعتمدي عليه. لازم تسألي نفسك، هل بتحبي الديكورات الكلاسيكية ولا بتحبي الحاجات العصرية والجريئة؟ لازم كمان تختاري الألوان اللي بتحبيها وبتتناسب مع ألوان فستانك أو حتى مع المكان اللي هيتم فيه كتب الكتاب.

ثانيًا: المساحة المتاحة

عشان تختاري ديكورات كتب كتاب جديدة ومميزة لازم تتناسب مع المساحة المتاحة. يعني لو هتعملي الديكور في البيت يبقى تشوفي مساحة الغرفة اللي هتستخدميها. أو في قاعة مثلًا نشوف برضو المساحة المتاحة. بحيث ميكونش الديكور كبير على المساحة فالدنيا تبقى زحمة. أو يبقى صغير عن المساحة فيبقى مش ظاهر كفاية.

ثالثًا: ملابس كتب الكتاب

دا برضوا هيحدد معاكي اختياراتك للديكور. لو الفستان اللي هتلبسيه رقيق وبسيط هتحتاجي ديكور رقيق جدًا. وطبعًا لو الفستان مش بسيط وحجمه كبير يبقى هنحتاج ديكور كبير عشان نديه مساحة إنه يظهر.

أفكار هتخلي ديكورات كتب الكتاب مختلفة

طيب إنتي دلوقتي قدرتي تحددي الديكور المناسب. ومحتاجة تخليه مميز أو مختلف وغير تقليدي. هنا ممكن تضيفي لمسة على الديكور تعكس اهتماماتك أو شخصيتك:

• ممكن تضيفي على الكراسي لون زهور معين أو زهرة معينة محببة ليكي.
• تضيفي شموع لها شكل مميز ولكن يكون حجمها كبير بحيث تبقى واضحة.
• إلعبي في الإضاءة قدر الإمكان لأنها بتدي جو مختلف خالص للديكور.
• حاولي تختاري شكل مميز تكتبي عليه اسمك واسم العريس.
• لو في تاريخ مهم بالنسبالكم ممكن تعملي شكل يدوي مميز وعليه التاريخ.

أفكار لتنسيق ديكورات كتب كتاب جديدة مع فستانك

دلوقتي بقى عايزين نعمل ماتشينج لطيف بين فستانك وديكور كتب الكتاب. فهنساعدك إزاي تظهروا بشكل مميز جدًا:

• ممكن تلبسي فستان سمبل جدًا ورقيق بدون طبقات وبدون اكسسوارات لامعة. وهنا هنضيف في الديكور شرايط لامعة وديكورات ليها ضوء بحيث تنعكس على فستانك.
• لو هتلبسي فستان فيه اكسسوارات لامعة وفيه طبقات يبقى هنختار ديكور بسيط ولكنه مش بسيط. يعني ألوانه بسيطة ورقيقة وبدون شرايط لامعة ولكن حجمه يكون كبير بحيث ميختفيش ورا الفستان.
• الألوان بقى مش لازم نعمل تطابق بين الديكور والفستان. يكفي إننا نركز على اختيار زهرة بلون الفستان. أو خلفية الديكور بلون الفستان.

أفكار لصور تتناسب مع ديكورات كتب كتاب جديدة

طبعًا احنا بنهتم بالديكور والفستان وكل التفاصيل عشان نعرف نتصور صور مميزة. عشان كدا هنساعدك بأفكار صور تخلي صور كتب الكتاب لطيفة جدًا:

• اعملي ركن مخصص في الديكور لصورك مع العريس. زي ركن بدون ديكورات كتيرة ولكن ليه خلفية لطيفة.
• استخدمي الإضاءة بكل طريقة ممكنة. يعني تتصوري مع ضوء الإضاءة وعكسها، ومع انعكاسات الإضاءة على الديكور.
• طبعًا معاكي وضعيات كتيرة جدًا لإظهار الدبلة. إنكم تقدموا الإيد للأمام والوش يظهر في الخلفية. أو مع بوكيه الورد، أو مع صينية الدبلة.
• إعملي مجسم لصورة تجمعكم إنتم الاتنين في الخطوبة. واتصوروا معها صور تدل على اختلاف وضعكم من مخطوبين لمتزوجين.
• اتفرجي كتير على صور مناسبات واحتفظي بيها عشان توريها للمصور.

وطبعًا أي ديكورات كتب كتاب جديدة هتحتاج ينفذها حد خبرة عشان تطلع بشكل مميز. عشان كدا حاولي تختاري حد متمكن وله نماذج كتير تقدري تقيمي شغله من خلالها.

اقرأ أيضًا: أفضل فنادق شهر عسل في إسطنبول.

اقرأ أيضًا: أرخص أماكن شهر العسل خارج مصر.