ديكورات زينة الكريسماس لأول سنة جديدة في عشكم الجديد
ديكورات زينة الكريسماس ممكن تحسوا إن لسة بدري على التخطيط ليها، بس لو كنتم قربتوا تتجوزوا خلاص أو لسة متجوزين جديد.
فده معناه إنكم قريب هتحتفلوا بالسنة الجديدة مع بعض، وهانت كلها أربع شهور وهيعدوا هوا ونلاقي نفسنا بنحتفل فيها.
وفي زحمة التحضير للجواز والفرح وشهر العسل وفرش الشقة وكل التفاصيل دي هتلاقوها فجأة هلت علينا.
واحنا مش مستعدين ليها خالص، فعشان متضيعوش على نفسكم فرصة الاحتفال بأول سنة جديدة ليكم مع بعض بعد جوازكم.
لازم تكونوا عاملين حسابكم من الأول بايه اللي هتحتاجوه عشان تتحضروا ليها؟
وعشان كدة فاحنا هنا في المقال ده جمعنا لكم كتير من التفاصيل اللي هتحتاجوها.
وانتم بتزينوا عشكم الجديد في استقبال أول سنة جديدة ليكم مع بعض، وكمان لو اللي بيقرأ المقال ده حد مش متجوز جديد.
فممكن يستفيد برضه من بعض الأفكار اللي فيه لتزيين بيته في المناسبة دي.
أو كمان ممكن تاخدوا منها أفكار لهدايا تجيبوها لحد متجوز جديد في محيط عيلتكم أو دايرة معارفكم.
وهتكون هدية تذكارية جميلة تعيش معاهم في كل احتفال.
وعشان تعرفوا ايه هي الديكورات دي اللي تقدروا تستخدموها بأكتر من طريقة كدة تابعوا معانا المقال.
ديكورات زينة الكريسماس على باب الشقة:
ايه أول حاجة هتستقبل الناس لما يجوا يزوروكم مع نهاية وبداية سنة جديدة، وهتستقبلكم انتم كمان؟
في كل مرة هترجعوا فيها من برة سواء من شغلكم أو من أي خروجة عادية طبعاً باب الشقة أول حاجة هتكون في وشكم.
عشان كدة ده أكتر مكان تقدروا تستغلوه في انكم تحطوا عليه الزينة اللي تعبر عنكم.
وكمان ترحب بيكم وبضيوفكم بمظهر احتفالي مبهج.
فتقدروا تصمموا ميدالية من الورق المقوى على باب الشقة تكون ناحية منها عليها صورة رومانسية ليكم من فرحكم.
أما الناحية التانية فيكون عليها رسمة لشجرة عيد الميلاد مع كتابة حواليها بأساميكم وتاريخ جوازكم وإن دي أول سنة جديدة ليكم مع بعض.
علقوا الزينة على شجرة عيد الميلاد:
طبعاً أهم ديكورات زينة الكريسماس هي شجرة عيد الميلاد نفسها.
بس عشان تدوها حياة أكتر بنعلق عليها أشكال تانية مختلفة من الزينة والأجراس.
فمن أنواع الزينة اللي تقدروا تستخدموها في احتفالكم بأول سنة جديدة ليكم بعد جوازكم إنكم تصمموا دايرة خشبية صغيرة محفور عليها أساميكم وتاريخ جوازكم.
وتكون مفرغة بخرم من فوق يتركب فيها خيط تتعلق منه في الشجرة، وممكن كمان تضيفوا عليها أشكال تانية من الزينة.
زي إنكم تصمموا دواير زيها برضه بس من الورق المقوى أو الخزف وعليها صور ليكم من الناحيتين.
وتقدروا تكتبوا أساميكم تحتيها، وتكون متلونة بألوان احتفالية زي الأحمر والأخضر.
وممكن كمان تكون بتصميمات لأنشطة بتحبوا تمارسوها مع بعض زي ركوب العجل مثلاً.
فيبقى تصميم على الزينة بشكل عجلة ثنائية وحواليها أشجار عيد الميلاد.
أو يكون تصميم بنوع وموديل عربيتكم أو شكل العربية اللي استخدمتوها في الزفة، ومنقوش عليها أساميكم وسنة جوازكم.
أما بالنسبة للعب اللي بتتعلق على الشجرة؛ فممكن تخلوا منها تذكارات لشهر عسلكم، زي إنكم لو كنتم قضيتم شهر العسل في منطقة ساحلية.
فتقدروا تجمعوا رمل أو قواقع من على الشط، أو لو كنتم في منطقة بتتميز بزهورها ونباتاتها تقدروا تجمعوا أوراق ورد منها وتجففوها.
والتذكارات دي تجمعوها في قمع إزاز صغير تعلقوه على شجرة عيد الميلاد.
أجراس ديكورات زينة الكريسماس:
طبعاً أكتر حاجة بتميز أعياد الميلاد وبداية السنة الجديدة هي الأجراس؛ فالزينة عمرها ما هتكمل من غير ما يكون عندكم جرس يعلن بداية السنة الجديدة.
وعشان كدة لازم تجيبوا جرس تعلقوه في أوضة المعيشة قبل ما تحتفلوا ببداية السنة الجديدة مع بعض.
وأحلى منظر للجرس إنه يكون بلون دهبي وشريط أحمر متعلق منه، وتقدروا تحفروا عليه سنة جوازكم.
وبكدة هيكون ذكرى أبدية ليكم في كل احتفال بسنة جديدة ليكم مع بعض يفكركم بأول سنة بقيتوا مع بعض فيها للأبد.
زينات مختلفة:
ديكورات زينة الكريسماس مش منحصرة بس في باب الشقة وشجرة عيد الميلاد، إنما تقدروا تملوا البيت بالزينة في كل مكان.
وفيه أفكار مختلفة تقدروا تستغلوها في تزيين كل أوضة وكل ركن في البيت، ومش لازم كل الزينة تكون معتمدة على صور شخصية ليكم وذكريات جوازكم.
لكن تقدروا تستغلوا أفكار تانية تعبر عن حبكم لبعض وعلاقتكم الجميلة، زي إنكم تستخدموا زينات من التحف والهدايا التذكارية.
فتقدروا تعلقوا تحفة لحمامتين في وضع رومانسي على إكليل دهبي متزين بالتوت الأحمر.
وبكدة يبقى عبر عن حبكم وجوازكم وفي نفس الوقت استخدمتوا الألوان الاحتفالية المناسبة للاحتفال بالسنة الجديدة.
وفي النهاية نتمنى إننا نكون قدرنا نقدم لكم أفكار ديكورات زينة الكريسماس اللي تسهل عليكم الاحتفال بأول سنة جديدة في عشكم الجديد.
ونتمنى لكم إنها تبقى أحلى ذكرى ليكم في بداية جوازكم تعيش في ذكرياتكم للأبد، وتفتكروها دايماً بابتسامة حب وسعادة.
هل محتوى المقال دة كان مفيد بالنسبة لك؟
نعم، مفيد!لا!
