ديكورات الزهور في الأفراح اتعرفوا على أجدد خطوط الموضة فيها

ديكورات الزهور في الأفراح هي اللي بتدي للمكان جو احتفالي راقي ومريح، وبتحسس المعازيم وكإنهم في حضن الطبيعة.

وعلى الرغم إن حفلات الزفاف في الأوقات الحالية بتتغير ديكوراتها كتير وبيطلع فيها كل شوية تقليعات جديدة.

إلا إن الورد هو الحاجة الأساسية اللي مبتتغيرش في أي وقت وأي تقليعة.

وبرضه مع وجود كتير من الورد الصناعي إلا إن جمال الورد الطبيعي مفيش حاجة تقدر تطغي عليه.

لكن طبعاً انتم ليكم مطلق الحرية إذا كنتم عايزين تختاروا ورد طبيعي ولا صناعي تستخدموه في ديكور يومكم المميز.

ففي أي حال الورود بكل أشكالها وألوانها هي الطريقة المثالية اللي ممكن تستخدموها في إنكم تدوا اليوم طاقة وحيوية وبهجة ألوانها.

وفي المقال ده هنحاول نعرفكم أحدث الاتجاهات في اختيار أنواع الورد وألوانه ليومكم المميز.

فتقدروا تستخدموا منها اللي يتناسب مع ميولكم ويعبر عن روحكم؛ فتابعوا معانا المقال.

ديكورات الزهور في الأفراح باللون الأرجواني:

اللون الأرجواني ده اللي هو شبه اللون البنفسجي لكنه أفتح منه.

وجمال اللون ده بيدي لمسة من الطاقة والحيوية على المكان.

وكل اللي محتاجينه بس إنه يكون موجود في الديكورات ومتوزع في مكان هنا وهناك.

وده تقدروا تحققوه بدمجه مع الديكورات التانية.

يعني مثلاً تقدروا توزعوا ورد باللون ده على ترابيزات المعازيم أو عند مدخل الاستقبال وهكذا.

الرقة في البساطة:

مش معنى إننا محتاجين لوجود ديكورات الزهور في الأفراح يبقى ده معناه إننا نستخدمها ببهرجة مبالغ فيها.

بالعكس التصميمات البسيطة مطلوبة أكتر.

وده نقدر نحققه بإننا ندي الأولوية للألوان الهادية البسيطة واللي بتحقق الفخامة في نفس الوقت زي الأبيض والكريمي والعاجي.

وكمان من الأفضل استخدام الورود الصغيرة الرقيقة، وميزة الأفكار دي في التصميم إنها بتخلق أجواء احتفالية هادية بسيطة.

هدفها إنها متشتتش الانتباه عن السبب الرئيسي للاحتفال اللي هو حبكم لبعض وجوازكم نفسه.

المفروض الناس جاية تشهد على قصة حبكم وتتويجها بلحظة الجواز؛ فمتشتتوش انتبهاهم عنكم ببهرجة مبالغ فيها.

وده مش معناه إنكم متهتموش بالتفاصيل في اختيار ورود فرحكم، لكن معناه ان اختياراتكم تكون محددة ومتعمدة.

وعارفين بالظبط انتم عايزين ايه مش بتضيفوا أي حاجة وخلاص لمجرد ان شكلها في الصور كان حلو.

فممكن بس تختاروا نوعين أو تلاتة بس من الورود اللي بتحبوها فعلاً وحابين منظرها اللي هيشارككم كل صور فرحكم وهتفضل موجودة معاكم في ذكرياتكم.

ديكورات الزهور في الأفراح المبالغ فيها:

أما لو مصممين وفعلاً حابين فكرة وجود ورود بكميات كبيرة في فرحكم.

فالحل المناسب لاستخدامها وإبرازها بشكل جميل وراقي هو إنكم تستخدموها كديكورات أسقف وحيطان.

وده بإنكم تستغلوا فراغ الحيطان في قاعة الفرح بإنكم تزينوه بالورود على طوله.

ولو في أسقف ساقطة في المكان ممكن الورد ينزل منه وكإنه ستارة من بداية السقف يوصل للأرض.

كمان تقدروا تتطلبوا تنفيذ شوية من الديكورات دي عند المدخل مثلاً بنفس الطريقة، وكمان ممكن تفرشوا المدخل بالورد.

الأعشاب والنباتات المجففة:

أما لو فرحكم في مكان مفتوح وغالباً الأفراح في الأماكن المفتوحة بتكون حدائق أصلاً مليانة بالورد والزهر الطبيعي.

في الحالة دي مش هتكونوا محتاجين تستخدموا ديكورات الزهور في الأفراح هي موجودة حواليكم بشكل طبيعي.

لكن ممكن تضيفوا لمسات بسيطة تدي طابع خاص بيكم.

وهي إنكم تضيفوا نوع من الأعشاب أو النباتات المجففة على ديكور المكان.

وأشهر نوع في الأعشاب دي هي نبات الحلفا أو عشب البامباس، ممكن تستخدموه بتوزيعه على الترابيزات في المكان.

وكمان ممكن تطلبوا تصميم أساور بسيطة من الأعشاب المجففة تستخدموها في تحية ضيوفكم اللي جم الفرح.

بحيث كل ضيف ياخد واحدة يربطها على إيده وهو داخل.

وفي نهاية مقالنا نتمنى إننا نكون قدمنا لكم أفكار ديكورات الزهور في الأفراح اللي تلاقوا فيها اللي يناسبكم وتقدروا تستخدموها في يومكم المميز.

ونتمنى لكم بداية حياة زوجية سعيدة ويوم فرح كله فرح وسعادة وزقططة.