دور العريس في التخطيط للفرح

عادة بتكون العروسة هي المهتمة بكل تفاصيل الفرح، وهي اللي بتخطط وتجري وتروح تسأل هنا وهناك في كل تفصيلة، وأكيد ده بيخليك تسأل عن دور العريس في التخطيط للفرح.

أكيد طبعاً يا عريسنا انت ليك دور ودور كبير كمان.

يمكن العروسة بتكون مهتمة بالتفاصيل أكتر لإن ده اليوم اللي حلمت بيه طول عمرها.

وعلى الرغم من كده إلا إن اليوم ده عمره ما كان هيبقى موجود إلا بوجودك، وعشان كدة انت ليك دور كبير أوي كمان فيه.

احنا عارفين إنك عايز تحس إنك مفيد وبتعمل حاجة مفيدة وسط الدوشة دي كلها.

وكمان ليك رأي وكلمة مسموعة في اختيار التفاصيل مع عروستك مش هي لوحدها اللي بتختار.

عايز تبان في الصورة وتكون فعال وفي نفس الوقت تكون مرتاح ومش مضغوط.

فلازم تعرف إن في حاجات كتير بتأثر على تفاصيل التفاصيل في اختيار كل حاجة من ترتيبات الفرح.

يمكن الموضوع يبان صعب شوية على العرسان الرجالة ومش متعودين عليه؛ لان الرجالة عادة مبيهتموش بالتفاصيل.

بس إحنا هنا عشان نساعدك، وجيبنا لك في المقال ده كل اللي هتحتاج تفهمه عشان تقدر تنفذ دور العريس في التخطيط للفرح بأعلى جودة وتبهر عروستك فتابع معانا.

ايه أكتر المجالات اللي ممكن تكون مفيد فيها؟

دي إجابة بتختلف من شخص للتاني، شوف انت ايه الجوانب اللي بتعرف تشتغل فيها أكتر وحاول تكون مسئول عنها.

فمثلاً ممكن تشوف ايه الحاجات اللي عروستك مبتعرفش تعملها بسهولة وحاول تتولاها انت بدالها.

طبعاً ده من غير ما تحسسها إنك بتعمل ده عشان هي مش عارفة تعمله.

وإلا هتحس إنك بتقلل من مجهودها وده هيوترها أكتر.

وبشكل عام فالحاجات اللي فعلاً رأيك بيكون مفيد وضروري وتعتبر من أهم مهام دور العريس في التخطيط للفرح هي:

فمثلاً تقدر تساعد عروستك في تحديد قايمة الضيوف وتضييق عددها لو محتاجين ده بسبب إمكانياتكم المادية أو ضيق مكان الفرح.

انك تختار مع عروستك الأغاني اللي هترقصوا عليها واللي هتشتغل طول الفرح بحيث تكون مناسبة لذوقكم انتم الاتنين.

وبرضه انك تختار معاها هتقدموا ايه للضيوف خلال الفرح من أكل وشرب، ونوع التورتة اللي هتقطعوها مع بعض وشكلها.

دور العريس في التخطيط للفرح إنه يختار اللي هيلبسه:

أكيد ده أهم دور ليك يا عريس.

متزودش مهام عروستك بإن هي كمان اللي تشيل هم انها تختار لك لبسك وتطقم لك اكسسواراتك مع بعضها.

مفيش قاعدة بتقول إنك لازم تختار بدلة رسمية شبه كل البدل اللي ممكن أي حد من المعازيم يجي بيها.

ولأن عايزين نساعدك أكتر فتقدر تعرف زيادة عن الموضوع ده من مقال لينا قبل كدة عن إزاي تتميز ببدلة فرحك عن المعازيم.

فتقدر تختار لنفسك بدلة مميزة مع إكسسوارات لايقة عليها تديك منظر مميز كعريس جنب عروستك وتبهرها بأناقتك وستايلك.

تقليل التوتر:

عروستك غالباً مبسوطة بفكرة سحلتها في التحضير للفرح، ده كان حلم بتحلمه طول عمرها وأخيراً بيتحقق وبتشكله بإيدها.

لكن مهما كانت مبسوطة فطبيعي تحس بالتوتر والضغط لانها عايزة كل حاجة تطلع مظبوطة ومفيهاش غلطة.

دور العريس في التخطيط للفرح في النقطة دي إنه يكون ذكي بالقدر الكافي اللي يخليه يقدر يزيح الضغوط والتوتر عن عروسته.

قدر إن طبيعي جداً انكم تختلفوا على بعض التفاصيل؛ فمتحاولش تشد جامد معاها في كل اختلاف.

اختار معاركك بحكمة، متنشفش دماغك معاها غير على حاجة انت شايف انك مش هتقدر تتقبلها أبداً.

وساعتها اقعد معاها بالراحة ورتب أفكارك واتناقشوا بهدوء.

وفهمها إن ده يوم مهم بالنسبة لك زي ما هو مهم بالنسبة لها، وانك مش هتكون مرتاح في التفصيلة دي.

وارد جداً تلاقيها استجابت بسرعة وبكل هدوء ليك لانها مكنتش واخدة بالها أصلاً انك معترض على الأمر ده.

لإن هي كمان أكيد مش حابة تضايقك وان اليوم ميكونش حلو معاك بسبب حاجة هي اختارتها غلط من غير ما تعرف.

وخليك مهتم دايماً بالأوقات اللي بتقضوها مع بعض، حاول تاخدها في خروجات رومانسية بعيد عن كل جو الترتيبات ده.

وأكد لها في كل وقت بتقضوه لوحدكم إن الأهم من ده كله هو حبكم اللي هتبنوا عليه حياتكم الجاية.

ده أهم من اختيار القاعة والمعازيم وأغاني الفرح اللي في الآخر كلهم هيخلصوا في كام ساعة وانتم بس الباقيين لبعض للأبد.

وفي نهاية مقالنا نتمنى إننا نكون قدمنا لك معلومات ونصايح مفيدة عن دور العريس في التخطيط للفرح تقدر تنفذها مع عروستك فعلاً.

وبكدة تقدر تشيل عنها شوية من ضغط التحضيرات دي، وتحسسها قد ايه انت داعم ليها وهتكون جنبها في كل ضغوط الحياة اللي جاية.