خواتم خطوبة غير تقليدية لعروسة مميزة

خواتم خطوبة غير تقليدية هي أحلى حاجة ممكن تقدمها لعروستك عشان تعبر لها عن تميزها واختلافها وانك شايفها غير كل الناس.

دايماً العادي إن دبل الخطوبة للعروسة بتكون دبلة دهب عادية أو خاتم ألماس سوليتير.

لكن ده مفيهوش أي تميز أو اختلاف أي حد يقدر يجيب دبل عادية زي دي.

وحتى لو ميزانيتك متسمحش بالألماس والسوليتير اللي ممكن تبهرها بيه إلا إن يفضل موجود اقتراحات كتير أرخص.

وده يخليها مناسبة في حدود ميزانيتك وفي نفس الوقت يكون ليها تصميم فريد يبرزها بين باقي الدبل.

ويخلي عروستك مميزة وسط صحابها وقرايبها؛ ففي أسباب كتير تخليك تفكر في الخواتم البديلة عن الألماس.

غير ميزانيتك وإن سعرها أقل، وأهم عامل في ده هو مدى روعتها وجمالها.

ففي أحجار كريمة كتير غير الألماس تقدر تجذب العين وتشد القلب وتخلق تميز مختلف في علاقتكم.

ودي زي حجر السترين الأصفر والتورمالين الوردي الفاتح والياقوت الأزرق الغامق وغيرهم كتير.

فدايماً في بديل عن الألماس من الأحجار الكريمة المختلفة التانية تناسب كل الأذواق.

وفي الحقيقة الألماس لحد القرن العشرين مكنش بيدخل في دبل الخطوبة.

وده معناه إن مفيش أي مشكلة لما تتخطوه لو مكنش مناسب لذوقكم أو ميزانيتكم، وتقدروا تستبدلوه بخواتم أحلى منه.

وفي المقال ده احنا حاولنا نجمع لكم أفكار لأفضل خواتم خطوبة غير تقليدية بديلة عن الألماس ودبل الخطوبة العادية.

فلو مستعد لكسر التقاليد وإنك تجيب لعروستك خاتم مميز يربطها بيك للأبد ويحسسها باختلافها وتميزها في عينك، تابع معانا المقال.

خاتم بيضاوي من الياقوت الأزرق:

الخاتم ده بيكون من الدهب الأبيض وفصه الأساسي عبارة عن حجر بيضاوي من الياقوت الأزرق الغامق.

وطبعاً شكله بيكون مميز جداً وملفت للنظر في ايد أي واحدة، وخصوصاً لو عروستك لون بشرتها أبيض.

فهيكون محقق تناسب كبير في المظهر، ولو لسة حابب فكرة الألماس ومش عايز تتخلى عنها.

ففي خاتم زي ده تقدر تضيف عليه برضه لمسة صغيرة من الألماس.

وده بإنك تختار واحد يكون فيه مجموعة صغيرة من فصوص الألماس، وتكون مرصوصة بشكل مش متماثل على جنب منه.

وده هيديله بريق أكتر ويحقق لك رغبتك في انك تقدم خاتم ألماس لعروستك وفي نفس الوقت يكون بشكل مختلف ومميز.

خواتم خطوبة غير تقليدية من حجر الأكوامارين:

الحجر ده بيتميز بلونه الأزرق الشفاف الرقيق، وده السبب في اسمه اللي متاخد من كلمة لاتينية معناها زرقة مية البحر.

ومن الأقوال المنتشرة عنه إنه بيساعد على قوة التعبير عن المشاعر وبيزود الشجاعة.

وعشان كدة أغلب الفنانين في المجالات المختلفة بيستخدموه.

وده معناه برضه إنه هيساعدكم على التعبير عن مشاعركم بشجاعة؛ فتقدر تختار لعروستك خاتم جميل مميز زيها بالأحجار دي.

الخاتم ممكن يبقى عبارة عن خاتم من الدهب الأصفر مع تلات أحجار أكوامارين بحيث يكون حجر كبير مستطيل في نص الخاتم.

والحجر الكبير ده محاوطينه حجرين مستطيلين بحجم صغير من الجانبين.

وعلى قد ما الخاتم ده هيكون أنيق في ايدها إلا إنه برضه مختلف ومميز.

خاتم الياقوت الوردي:

خواتم خطوبة غير تقليدية من الياقوت مش بس محصورة في الياقوت الأزرق اللي اتكلمنا عليه.

لا حجر الياقوت ليه أنواع وألوان مختلفة، ومن أنواعه دي الياقوت الوردي اللي بيعتبر التجسيد المثالي للجمال والسحر والرقي وبيعبر عن الأنوثة والرومانسية.

لدرجة إنه بيتقال إنه المفتاح لفتح قلب أي أنثى، وعشان كدة بيعتبر خيار مثالي لخواتم الخطوبة والجواز.

وعشان كدة تقدر تختار خاتم ياقوت لعروستك وانت مطمن، ومن أشيك الأشكال اللي ممكن تختارها للخاتم ده.

وهي إنك تختاره بتلات أحجار مرصوصين جنب بعض مقطعين على شكل وردة مع فصوص من حجر الباڤيه مرصع الخاتم من الجانبين.

وده هيخلي الخاتم يتألق ببريق مالوش مثيل في ايد عروستك، ويحسسها قد ايه هي مميزة ومختلفة.

خواتم خطوبة غير تقليدية من حجر التوباز الأزرق:

أحجار التوباز الأزرق معروفة بإن ليها طاقة مهدئة ومريحة للأعصاب بتخليها تكون جاذبة لمشاعر الصداقة والرومانسية.

وكمان بيساعد على تصليح العلاقات المكسورة بقلب متسامح.

وده سبب من الأسباب اللي خلى حجر التوباز من الأحجار الكريمة البديلة لخواتم الألماس في دبل الخطوبة.

عشان كدة تقدر تختاره وانت مطمن لعروستك، وتحطه في ايدها بكل حب، وتقدر تختار خاتم مميز منه.

وده بإنه يكون خاتم من الدهب الأصفر بحلقتين واحدة فيهم هي اللي فيها الحجر ومترصع جنبه فصوص من حجر الباڤيه.

والحلقة التانية كلها مرصعة بحجر الباڤيه، وبكدة يبان وكأنه خاتمين في خاتم مش خاتم واحد.

وفي نهاية المقال نتمنى اننا نكون قدمنا لك أفكار مختلفة تقدر تستخدمها وانت بتختار خواتم خطوبة غير تقليدية لعروستك المميزة.

ونتمنى لكم بداية حياة زوجية سعيدة تدوم للأبد وتفضل مليانة طول الوقت بالحب والفرح والسعادة.