خطوبة في البيت | أفكار لحفلة اقتصادية أنيقة.

ولأن فكر كتير من المصريين مؤخراً اتغير تجاه البذخ والمصاريف الغير مبررة في حفلات الأفراح والخطوبة، اتجه كتير لفكرة عمل حفلة خطوبة في البيت بأفكار اقتصادية تناسب الميزانية ومش تهدر فلوسنا بلا داعي. تقدري تعملي أجمل حفلة لخطوبتك بدون ما تصرفي كتير. خلينا نعرف في المقال ده سوا إزاي الحفلة تكون بسيطة وجميلة واقتصادية…

إزاي تخلي خطوبة في البيت جميلة واقتصادية

مش لازم تكون ميزانيتنا كبيرة علشان نعمل حفلة خطوبة أنيقة وجميلة، نقدر نعمل احتفال رائع لعروستنا بس بذكاء وترتيبات اقتصادية وحضارية أكتر…

مكان مثالي للحفلة

أول خطوة في تجهيزات حفلة خطوبة رائعة هو اختيار مكان مناسب للحفلة. شقتك هتكون مكان اقتصادي جداً ومثالي جداً لخفلة الخطوبة وبتكون ذات جو دافي وسط الأهل والناس القريبين جداً وبعيدة عن صخب القاعات.

في حال إن شقتك مش مناسبة أو محتاجة تعزمي عدد معازيم أكبر من مساحتها، ممكن نلجأ لعمل حفلة الخطوبة على الروف أو في أي جنينة صغيرة تابعة للبيت أو نقدر نستأجرها. كمان ممكن نستأجر كافيه لساعتين بسعر معقول وبمساحة مناسبة للعدد.

ديكور خطوبة في البيت بسيط

ثانياً بالحديث عن البساطة في الحفل تقدري تعتمدي على ديكورات بسيطة وغير مكفلة بشكل باهظ، زي مثلاً تصميم هادي من البلالين أو الورود الجانبية أو الاضاءة المسندلة البسيطة (Fairy Lights). وتقدري تعلقي الإضاءة على ستائر ركن الكوشة أو بتصميم بسيط على القماش الأبيض الناعم. اعرفي إن الأزواق والألوان الهادية مع الإضاءة الذهبية أو البيضاء بتدي أناقة وجمال للحفلة.

غير كده تقدري تضيفي ركن للتصوير بديكور بسيط أو بلافتة عليها اسم العروسين، وتقدري تضيفي طاولة جانبية مفروشة بشكل بسيط وأنيق لتقديم الضيافة للمعازيم.

اعرفي أكتر: كوشة في البيت | أفكار وديكورات ونصائح.

فستان الخطوبة

وطبعاً خطوبة في البيت يعني فستان غير مُتكلف ومناسب للمكان، بمعنى إنه فستان مش منفوش ولا أوفر، أو سالوبيت بسيط أو بيلزر وبنطلون بلون ناعم وأنيق زي الأبيض أو الروز.

تقدري تستأجري فستان سواريه بدل من شراءه للتحكم في التكلفة، أو تقدري تشتري فستان بسيط من محلات الملابس المحلية. لا تنسي إن الإكسسوار الناعم ممكن يضيف للإطلالة جمال وأناقة، حلق بسيط أو اكسسوار للشعر أو شابو بسيطة على الحجاب هتكون إضافة لطيفة.

اعرفي أكتر: صنية الشبكة | اعرفي أكتر عن أحدث صيحاتها في 2025

مكياج العروسة

مش شرط تتفقي مع Makeup Artist لليوم، لأن الخطوبة في البيت مش محتاجة غير مكياج بسيط لو بتعرفي تعمليه لنفسك أو تخلي واحدة من صحباتك شاطرة فيه تتولي المهمة دي.

تصوير الفرح

لخطوبة في البيت بسيطة واقتصادية، نقدر نعتمد على أصدقائنا وأهلنا في التصوير بدلاً من الاتفاق مع فوتوجرافر. بمعنى آخر تقدروا تعتمدوا على أحد الأصدقاء أو الأهل اللي معاه كاميرا كويسة أو شاطر في التقاط الصور الجميلة. افتكروا دايماً ان صورة جميلة يعني إضاءة كويسة وجودة كاميرا جيدة وفرحة حقيقية للعروسين وسط الأحباب.

مكبرات الصوت وقائمة الأغاني

تقدري تستأجري مكبرات صوت صغيرة، ثم تجهزي ليها قائمة بالأغاني المُفضلة. ولو عندكو جهاز كومبيوتر تقدروا تستعينو بالسماعات الخارجية الخاصة بيه. اختاري الحل الأقل تكلفة لأن خطوبة في البيت مش محتاجة أكتر من سماعة كومبيوتر أو مكبرات صوت صغيرة.

قائمة معازيم خطوبة في البيت

خطوبة في البيت يعني أجواء دافئة وسط الأهل والأحباب المقربيين، ومش مضطرين خالص نبعت دعوات لعدد كبير من المعارف. تقدروا تخلو قائمة المعازيم مقتصرة على المقربين فقط.

ضيافة المعازيم

لحسن الحظ الخطوبة مش مقرونة بتقديم الأكلات والأصناف الكبيرة للمعازيم، وتقدري تعتمدي على تقديم مجموعة من الحلويات والعصائر البسيطة اللي تضفي بهجة على الأجواء وتنشر السعادة.

أيضاً تقدري تنوعي في الحلويات أو المشروبات بحيث تناسب المرضى من الضيوف، أو تكون قائمة الحلويات فيها جزء أقل في السكر أو فيها أصناف حادقة أو مشروبات خاصة.

خلاصة الكلام، خطوبة اقتصادية في البيت هي فكرة مناسبة جداً لكتير من الأسر لمختلف الأسباب. غير كده هي فكرة حضارية بعيدة عن البذخ الغير مبرر لحفلات الخطوبة والزفاف. تقدري بأساليب كتير تقللي تكاليف الحفل ورغم ذلك تفضلي محافظة على أناقة وجمال الأجواء. افتكري إن كل ما كانت الأجواء بسيطة ومرتبة كل ما كان الحفل أجمل وسط الأهل والأحباب.

تقدري تعرفي أكتر عن نصائح الزفاف:

فساتين زفاف 2025 | نظرة على أحدث صيحات بيوت الأزياء المصرية.