خطوات التخطيط للفرح خطوة خطوة

خلاص اتفقتم على الجواز وأهاليكم وافقوا على جوازكم وخلصوا كل الاتفاقيات المادية وكل دوشة الجواز دي؟ نفضى بقى للتخطيط للفرح اللي مستنينه طول عمرنا، خطوات التخطيط للفرح بتعتمد هنا على تخيلاتكم اللي عشتم عمركم كله تتصوروا ان فرحكم هيتم عليها.

دلوقتي احنا هنحول الخيالات دي لواقع؛ فلازم نمشي خطوة خطوة مع بعض عشان نشوف ايه فيها ينفع ننفذه فعلاً على أرض الواقع.

وايه كان خيالي زيادة عن اللزوم وهنضطر نتخلى عنه؟ وكمان لازم نحاول نوفق بين توقعات العروسة وتوقعات العريس.

ودي هتكون أول خطوة تتعلموا فيها مع بعض إزاي توفقوا دايماً بين توقعاتكم ورغباتكم في حياتكم الزوجية اللي جاية.

وده لإن في كل مرحلة من حياتكم ممكن توقعاتكم تصطدم ببعضها، ولازم تتعلموا انكم بتكملوا بعض مش بتحاربوا بعض.

فمفيش حد فيكم هيطلع كسبان وحد خسران لما ينفذ اللي هو عايزه خدوا بالكم انكم موجودين مع بعض عشان تسوقوا مركب واحدة وتختاروا مع بعض الأنسب ليكم ولحياتكم انتم الاتنين.

وهنا دي أول بداية ليكم؛ فيلا بينا نشوف هنخطط للفرح مع بعض إزاي؟

تحديد موضوع الفرح:

وفي أول خطوة في خطوات التخطيط للفرح هي إنكم تختاروا مع بعض موضوع الفرح.

هل عايزينه فرح تقليدي عادي ولا عايزين يكون له موضوع محدد؟

الموضوع ده بتقدروا تختاروه بناء على هواياتكم وميولكم، وده اللي بيحدد الديكورات اللي بتستخدموها في القاعة وحجم القاعة.

يعني ممكن مثلاً يكون الموضوع إنه حفلة عائلية صغيرة؛ فبتختاروا قاعة صغيرة وتعزموا قرايبكم بس، وبتعتمدوا على ديكورات مستوحاه من الجو العائلي.

وكمان ممكن الموضوع يكون مستلهم من مهنة العريس والعروسة مثلاً لو هم بيشتغلوا في مجال واحد أو مجالات متداخلة.

فلو إنهم لو دكاترة مثلاً؛ فممكن ديكورات القاعة والترابيزات يبقى فيها تصميمات مستوحاه من أشكال الأدوية مثلاً أو الكوشة تبقى على شكل شازلونج.

أو لو بيحبوا أفلام الكارتون مثلاً أو نوعية معينة من الأفلام ممكن تصميمات القاعة تاخد شكل شخصيات الأفلام دي، وأغاني الفرح تبقى فيها مجموعة من الأغاني دي وهكذا.

ولو هواياتكم وميولكم مختلفة ممكن تدمجوها مع بعض في موضوع الفرح بطرق مختلفة

وده ممكن يبقى دلالة على انكم بتكملوا بعض على الرغم من اختلافكم.

تحديد مكان الفرح من خطوات التخطيط للفرح:

بعد ما قررتم موضوع الفرح المناسب ليكم تيجي الخطوة التانية في انكم تختاروا مكان الفرح اللي هيناسب الموضوع ده.

هل محتاجين قاعة كبيرة ولا صغيرة، ومكانها هيكون فين؟ وفي أكتر من عامل بيحدد اختياركم للمكان زي ميزانيتكم اللي بتحدد نوعية القاعة اللي ممكن تحجزوها.

كمان لازم تراعوا في النقطة دي فكرة سهولة الوصول للقاعة بالنسبة للمعازيم من عدمها.

وإن هيكون في مواصلات سهلة يقدروا يوصلوا بيها للقاعة لو المكان بعيد عنهم ولا لا؟

وبرضه هل في أماكن لركن العربيات بالنسبة للمعازيم اللي هيجوا بعربياتهم؟

خيارات تحديد مكان الفرح وطبيعته:

بناء على الخطوات اللي فاتت فانتم تقدروا تحددوا إذا كنتم عايزين فرح كبير ولا صغير.

ومن الخيارات المتاحة قدامكم في الحالة دي:

التخطيط لفرح في قاعة: ده لو عاوزين فرح كبير تخططوا انتم بنفسكم كل تفاصيله ويكون كافي لعدد معازيم كبير.

فرح في فندق: عادة الفنادق بتوفر إمكانية إنهم يتولوا كل شيء خاص من خطوات التخطيط للفرح وده هيزيح عنكم عبء التفكير في الموضوع ده ويوفر لكم وقت وجهد تبذلوه في حاجات تانية.

فرح في مطعم: ده في حالة انكم ناوين تعملوا فرح صغير على قد أهلكم والمقربين جداً منكم بس؛ فتقدروا تحجزوا مطعم ويكون الفرح عبارة عن وجبة وجلسة عائلية لذيذة مع بعض مش أكتر.

فرح في المسجد أو الكنيسة: ده لو ناويين تتخلوا عن أجواء ومصاريف الأفراح التقليدية وتكتفوا بإشهار الجواز في المسجد أو الكنيسة، والناس تيجي تبارك لكم في المكان.

وبكدة كمان هتبقوا وفروتوا فلوس الفرح تعملوا بيها حاجة تانية زي إنكم تروحوا رحلة شهر عسل في مكان جديد أو برة مصر.

  ودي كانت نصايحنا ليكم في مراحل خطوات التخطيط للفرح نتمنى انها تكون مفيدة ليكم وتساعدكم في اختيار نوعية الفرح المناسب ليكم، ويكون يومكم جميل وممتع متنسهوش أبداً.