4 حاجات العريس مينفعش ينساها يوم فرحه

طبعاً أشهر المواقف اللي بتظهر في الأفلام الأجنبية بالذات انهم ينسوا يجيبوا خواتم الجواز، وده أكيد مبيحصلش عندنا لإنها هي نفسها دبل الخطوبة وبنغير مكانها في الفرح بس، لكن غير ده في حاجات العريس مينفعش ينساها يوم فرحه.

يمكن موضوع زي الخواتم ده يكون مستفز للعروسة كمان.

بس في مواضيع تانية مهمة للعريس في اليوم ده ممكن من كتر الضغط ينسى يعملها.

ومش شرط تكون الحاجات دي في صميم الفرح نفسه لكنها ممكن تكون مهمة في التخطيط لليوم وتظبيط طاقتك ومجهودك كعريس.

وده عشان متحسش إنك طول اليوم بتلف في ساقية ومش فاهم انت بتعمل ايه ولا معملتش ايه؟ وايه اللي ناقص؟ وايه اللي خلص؟ وجسمك محتاج ايه؟

وتيجي آخر اليوم تبقى مش قادر تجمع حاجة خالص وفصلان من الناس كلها.

حتى عروستك نفسها تبقى مش قادر تتكلم معاها كلمتين على بعض من كتر التعب والدوشة اللي في دماغك.

عشان كدة احنا هنا في المقال ده هنحاول نساعدك، ونقولك ايه اللي انت محتاج تعمله خلال اليوم.

ونحاول نمشي معاك حاجة حاجة في حاجات مينفعش العريس ينساها يوم فرحه عشان تحطها على قايمة مهامك لليوم ده وتنفذها.

فهات ورقة وقلم وركز وتابع معانا.

حاجات العريس مينفعش ينساها إنه ينام كفاية:

أول حاجة لازم تعملها ليلة فرحك هي إنك تاخد وقت كافي من النوم.

عارفين إن ممكن التوتر والقلق وخوفك من ترتيبات اليوم ميخليكش تعرف تنام، بس الحقيقة إن عدم نومك هيزود الطين بلة.

مش هيخفف أبداً من أي سلبيات ممكن تحصل، بالعكس هيبان عليك الإرهاق طول اليوم.

وده هيأثر على تركيزك وتعاملك مع المواقف اللي ممكن تحصل فجأة وهيخليك عصبي طول الوقت ومش مستحمل أي حاجة حواليك.

فعشان تتجنب كل ده ريح أعصابك وافصل وادخل نام بدري في هدوء.

واصحى من بدري ظبط كل اللي محتاجه وخلص كل اللي وراك بدون ضغط أو توتر.

الترطيب وشرب المية:

من أكتر الحاجات اللي بننساها عموماً في حياتنا هي شرب المية.

لكن في اليوم ده بالذات فهي من حاجات العريس مينفعش ينساها يوم فرحه.

قلة شرب المية هيخلي ريقك ناشف وهيسبب لك إجهاد خصوصاً إنك هتبذل مجهود كبير خلال اليوم.

طول اليوم هيبقى عندك مشاوير كتير بتخلصها واستعدادات بتعملها وبعد كدة هتروح تجيب العروسة من عند الكوافير.

ولسة هتطلعوا على الفوتوسيشن اللي غالباً هيكون في مكان مفتوح بالنهار تحت الشمس.

وبعد ها هتروحوا على القاعة ويبدأ الفرح والرقص لآخر اليوم، والمجهود ده كله طبيعي هتعرق فيه وجسمك هيفقد مية حتى لو كنا في الشتا.

فلازم تتأكد إنك بتشرب كميات كافية من المية خلال اليوم وكل ما يكون ده متاح ليك.

الحلاقة حاجات العريس مينفعش ينساها:

حتى لو كان ستايلك ومظهرك بدقن؛ فبرضه هتحتاج تظبطها وتظبط شعرك وتتأكد من إن مفيش أي زوايد وان المظهر العام متناسق مع بعضه.

اتأكد إنك بتستخدم شفرة حلاقة جديدة أو مكنة مظبوطة عشان متحصلش أي مفاجأت غير سارة وانت بتحلق تبوظ لك مظهرك كله.

ولو كان عندك وقت كافي يبقى من الأفضل انك تحجز في صالون حلاقة وتستمتع بمميزات حلاقة مخصوصة للعريس.

افتكر كويس إن مظهرك النهائي ده هو اللي هتظهر بيه في صور الفرح اللي هتعيش معاكم للأبد؛ عشان كدة الحلاقة من حاجات العريس مينفعش ينساها يوم فرحه.

خد بالك من صحابك:

أحياناً الرجالة لما بيتجمعوا في الأفراح الأمور بتخرج عن السيطرة، لو في تصرفات معينة عارف إن صحابك بيعملوها ممكن تبقى مزعجة لعروستك أو لأهلها أو للمعازيم بشكل عام.

أو لو في سلوكيات معينة متفقين انت وعروستك انكم مش حابين إنها تحصل في فرحكم أو أغاني محددة مش عايزينها تشتغل، وفي احتمالية إن صحابك ممكن يعملوا ده.

فمن حاجات العريس مينفعش ينساها إنه يأكد على صحابه أكيد بايه اللي هو مش حابب إنه يحصل في فرحه.

ولو الموضوع هيبقى مرهق بالنسبة لك ومش هتعرف تكلمهم كلهم ممكن تكلف واحد من صحابك اللي بتثق في قدرته انه يأثر عليهم بإنه يبلغهم الرسالة ويكون هو اللي مركز معاهم في باقي يوم الفرح.

وفي نهاية المقال نتمنى إننا نكون ساعدناك في إنك تاخد بالك من حاجات العريس مينفعش ينساها يوم فرحه.

وتكون دي علامة تفكرك بيهم في اليوم ده، ونتمنى إنه يكون يوم سعيد مليان فرح وحب ويمر بسلاسة بدون أي ضغوط أو مشاكل.