جلد الوزة… الأسباب، و 4 طرق للعلاج

جلد الوزة من أكتر المشكلات اللي بتواجه عرايس كتير، وخصوصا لو حتتجوزي في فصل الشتاء.. في المقال دة حنقولك على أسبابها، وطرق مختلفة لعلاجها.

جلد الوزة Keratosis pilaris أو التقرن الشعري عبارة عن تكون طبقة على سطح الجلد من مادة اسمها الكيراتين، والمادة دي بتعمل حماية للجلد، وبالتالي تؤدي لسد المسام وبوصيلات الشعر.

عشان كدة بتلاحظي نقط منتشرة على الجلد وفيها نقط سوداء صغيرة، والنقط السوداء دي عبارة عن الشعر اللي موجود تحت الجلد، ومش بيطلع بسبب انسداد المسام.

اسباب جلد الوزة

لحد دلوقتي مفيش أسباب واضحة للمشكلة، ولكن الأطباء خمنوا أنها أسباب جينية، بالإضافة أن جفاف الجلد سبب رئيسي وعلشان كدة بنات كتير بتلاحظ مشكلة جلد الوزة في فصل الشتاء.

ايه هو شكل الجلد في الحالة دي؟

بيكون فيه حبوب صغيرة غير مؤلمة على سطح الجلد، وحتلاحظي بجفاف شديد في منطقة الإصابة وتكون طبقة بيضاء على البشرة، ولون الحبوب دي بيختلف حسب لون البشرة فمثلا:

• لو البشرة فاتحة: بيكون لون الحبوب دي أحمر.
• لو البشرة بنية أو سمراء: بيكون لونها غامق.

امتا بيختفي جلد الوزة من الجسم؟

الأبحاث بتقول أنه بيختفي بعد عمر التلاتين من جسم المرأة.

علاج جلد الوزة

1. الترطيب هو الحل السحري في العلاج، لأنه بيساعد على زيادة رطوبة الجلد، وحتلاحظي ده من أول استخدام للمرطب. 
2. ممكن تستخدمي مقشرات طبية زي الريتينول وحمض الساليسيليك  وحمض اللاكتيك وحمض ألفا وبيتا هيدروكسي.
3. اسكراب من مواد طبيعية، وتقدري تعمليها في البيت بكل سهولة.

أمثلة لمرطبات ومقشرات من الصيدلية

• كريم بانثينول وماكرو بانثينول “الكريم ولوشن الجسم”.
• كريم يوريكير، وكريم كارباميد وهيبتا كارباميد لاحتواءهم على مادة اليوريا، وهي من أقوى المرطبات للبشرة.
• غسول ستارفيل أو غسول سيباكلار.
• كريم أكرتين أو جيل أدابالين.

ازاي تستخدمي المرطبات والمقشرات بشكل صحيح؟

• المرطبات: استخدميهم صباحًا ومساءًا على مكان وجود جلد الوزة، والتزمي باستخدامهم لمدة شهر على الأقل وحتلاحظي نتيجة مبهرة!
• الغسولات: استخدميهم مرة أو مرتين في اليوم لضمان نتيجة أسرع.
• كريم أكرتين أو أدابالين جيل: استخدمي أي واحد منهم مساءًا حطي منهم كمية صغيرة وسبيه لمدة نص ساعة وبعدين اغسلي البشرة كويس جدا ورطبيها بأي مرطب عندك.

أمثلة لمقشرات من مواد طبيعية

1. سكراب ستاركي وفيه منه بالخيار والبطيخ والتوت والفحم والمشمش.
2. سكراب بوبانا واللي فيه منه بالقهوة والفحم.
3. سكراب ستيفز وفيه منه اللي بالمشمش والأفوكادو والعسل.

ودول تقدري تدخليهم في روتينك الأسبوعي خصوصا وأنتي بتاخدي الشاور بتاعك.

خللي بالك وأنتي بتاخدي شاور!

لازم تستخدمي الماء الدافئ في روتينك في العلاج من جلد الوزة، وبلاش تستخدمي الماء الساخن لأنه ممكن يزود الالتهاب بشكل أكبر، ويزود المشكلة.

امتا لازم تروحي للدكتور؟

لو حسيتي أن العلاج مش عامل معاكي أي نتيجة، لأن المشكلة بتكون أكبر بسبب وجود التهابات وحكة في منطقة الإصابة، والدكتور حيقولك تستخدمي كريمات موضعية مضادة للالتهاب، ومهم جدا تستخدميها الفترة اللي بيحددها الدكتور بس.

الليزر وجلد الوزة

في حالة أن جلد الوزة منتشر في جسمك كله، وحالتك المادية تسمح بالذهاب لمركز تجميل، اعملي جلسات بالليزر وحتحسي بالفرق بعد فترة صغيرة جدًا.

نصيحة مهمة ليكي!

خليكي دايما فاكرة أننا بشر وجسمنا أكيد فيه عيوب، وبنحاول أننا نعالجها بطرق كتير بس متخليش الموضوع دة عامل لكي قلق دايما، وخللي عند ثقة في نفسك حتفرق معاكي نفسيًا خصوصا في فترة قبل الفرح مع وجود قلق كتير ومشاوير كل يوم.

اقرأ أيضا: أسطورة الحبة الزرقاء.. حقيقة ولا خيال؟